Read Tangkhul Naga JEREMIAH 9 Bible Online

JEREMIAH 9 - Tangkhul Naga bible

JEREMIAH 9

¹O, ikui tara̱si kaje, imikna chāra̱wui ura̱si kaje sāthat kahai iwui mibingwui naongalava̱wui vang chapshon chapthaira!

²O, siwukli ramkazatabingwui ngasām khavai akha leisi kaje, iwui mibingli chihohailaga chili mavāpamhaikapai! Kaja athum saikora phokaphā, mikhanama mimāng sāthuihao!

³Athumwui malena malā thāda huna; khamashungwui vang maningla makhamashungna apam chili pangsanga, kaja athumna makaphāwui eina makaphāshong vai, kala athumna ili matheimana da PROHOna hānga.

⁴Saikorana khongnainaoli ning ngasharranu, achināli ning mahorsangaranu; kaja achinā kachiva̱ mikhanamana, khongnai kachiva̱ khamashātana.

⁵Athum kachiva̱na awui khongnaili minama, kala khipākhana khamashung tui mamatuimana; athumna maleli kakapik matui khavai tamchithei; athumna khayonkhamāng sāda ning ngateisida chotlaka.

⁶Rekakharektungli rekakharek ngarora, mikhanamtungli mikhanam, athumna ili matheingaimana, da PROHOna hānga.

⁷Chiwui vang, saikorawui PROHOna hithāda hānga: “Yanglu, athumli ina samathakhuilaga chāng tamyangra, kaja chili lāngda iwui mibingwui vang ina khisaura?

⁸Athumwui male hu kazanga malāthingna, china kapiklak eina matui; awui khamor eina ichichāwui khongnaili chingri khavai matui, kha awui wuklungle ali ngathirai ngarānpama.

⁹Otsakbing hiwui vang ina athumli tandi mamingayimala? Hikathā yurli ina athut makhuingayimala?” da PROHOna hānga.

¹⁰“Phungreibingwui vang vaoda chapngachālu; lamhāngwui seizātpamwui vang chapngachālu, khikhalajila chibing chi ramcho sāhaoda khipākhana mamakānvāmana, seikhonla mashāluimana, kazingli yongkazata vanaola, ramsāla yāmserhaira.”

¹¹“Ina Jerusalem hi ngayānghaida khorkazam kahaipam sāngasakra, ramfapam sāngasakra. Ina Judahwui keinung ngachakyāng ngasakhaida mi malei ngasakmara.”

¹²“Thangmeikhailakhaoda hi theishingkhuikashapa mi chi khipākhala? Hi lānchitheira da khipāli PROHOwui khamorna hanghailikhala? Khi sāthuda khipākhana mamakānkapai lamhāng thāda ngalei chi ramcho ngasāhaokhala?”

¹³PROHOna hānga: “Khikhalajila ina athumli mikahai ain chi horhaowa, kala iwuikhon manganāmana, kala chiwui athi shurdala mazatmana,

¹⁴kha ashāvā ngarāna tamchithei kahai thāda khalattawui kaphaning sātingtingda Baalwui thi shurthuihaowa.

¹⁵Chiwui vang, saikorawui PROHO, Israelwui Varena hithāda hānga: Yanglu, mibing hili ina thingkhā chishaira, kala athumli kathiriwui tara̱ mimangra.

¹⁶Ashāvā ngarānala, athumnala makatheiya yurwui alungli kashamyāngvāhaora; kala mathingakanranglakha eina tangda ina raighai chihora.”

¹⁷Ashangva̱wui PROHOna hithāda hānga: “Chukmaja̱lu, chapngachākathei sha̱naobingli ahokhuilu, sākathei sha̱naobingli rākhavai chiholu.”

¹⁸“Athumna thākta hili ithumwuitungli vaoda rāchapngachāranu, chithāda ithumwui mikli chāra̱ longtāranu, kala ithumwui mikkor eina tara̱ okshokranu.”

¹⁹Kaja Zionwui eina kachapkhon shai: “Ithum kathāda ngayānghao! Ithum maishichaohaira, khikhalajila ithumna ram chi horhaira, khikhalajila ithumwui shim athumna sātekmiserhaowa.”

²⁰“Nganāmilu, O sha̱naobing, PROHOwui tui, akhamor eina kahāng tui nathumwui khanāna shākhuiranu; naongalāva̱ ngarāli chapchāt laa tamchitheilu, mi ava̱va̱na khongnainaoli sikafa laa tamchitheilu.

²¹Kaja kathina ithumwui charfali rāngareikāhaira; china ithumwui konunglila kāzanghaira, chānreili kazat sha̱naobing, kayāng khareili khalei yaronnaobing katatthuiserhaira.

²²Hānglu, da PROHOna hānga: ‘Kathinguna khamasaipamli paih thāda tātungra, kahātabingwui thili lanji thāda, chi khipānakha makazipkhuimara.’”

²³PROHOna hithāda hānga: “Thangkhamana awui thangmeiwui vang malangsoaranu; kapingana awui pangshapwui vang malangsoaranu; kala kashāngana awui lanwui vang malangsoaranu.

²⁴ Kha langso khangaipā china hi theishingkhuida ili theiranu, kaja, okathuili lumashankatha, mashun, khangarong kasā chi PROHO ina; kaja hikathā otsakli ina ningyāng unglaka da PROHOna hānga.”

²⁵“Yanglu, ahui rimkashoka, kha ningli marimkashoka athum chili ina tandi khami atam rārāli da PROHOna hānga.

²⁶ Chibing chiya, Egypt, Judah, Edom, Ammonwui naomayarabing, Moab kala siwukpheili khalei kui sikatābing saikorana. Kaja miyur saikora hi ahui marimkashokbingna, Israelwui shimkhurla wuklungli ahui marimshokmana.”