Read Tangkhul Naga CHAPCHĀT 2 Bible Online

CHAPCHĀT 2 - Tangkhul Naga bible

CHAPCHĀT 2

¹Malungkhavātwui alungli PROHOna Zionwui naongalāva̱li muiyāzingli kathāda haihaokhala! Ana Kazingramwui eina okathuili Israelwui tekhamatei hortāhaira; awui malungkhavāt atamli awui pheinai eina tangda maphaningungmana.

²PROHOna lukhamashan maleila Jacobwui mi saikora sākazamhaira; awui malungkhavātwui alungli ana Judahwui naongalāva̱wui raipanla sha̱shiruimiserhaira; wungram eina khamungabingli maishi ngasakta, ngaleizingli khuitāmihaira.

³Malungvātsir eina Israelwui pangshap saikora sātekmihaira; yangkashebingwui miktāli awui yāpang khuithuihaowa; meiwon thāda Jacobwui kuikhamareili khalei saikora ana thottāhaowa.

⁴Yangkashe thāda malā ana hunhaira, yangkashe thāda yapāng khānga; kala Zion naongalāva̱wui kachonshimlungli ana ithumwui mikna yangkhangai saikora sāthatserhaira; awui malungkhavāt chi mei thāda heitāhaira.

⁵Yangkashe thāda PROHOna, Israelli sākazamhaira. Ana konung saikora sākazammihaira, raipanbing sākathānmihaira. Judah naongalāva̱wui sikafa, chapchāt mataisang ngasaka.

⁶Awui langchin sākahai phanitshim; yāmguiwui rām thāda pheimihaira, Zionli PROHOna langchin sākahai phanit eina sabbath, kala lungvāt eina awunga kala pāngmonbingli chinserhaira.

⁷PROHOna awui hanphutpamli yangkharinghaira, kala katharapam nothāhaira; awui konungwui phākhobing yangkashibingli horsangmihaira; PROHOwui shimli langchin kahai phanit kasā thāda athumna maphākakhuikhon vaowa.

⁸Zionwui naongalāva̱wui phākho shimān ngasak khavai PROHOna machukhaira; ana chiwui leirin khānhaira; shimān khangasakwui eina apāng makhāmmana; ana raipan eina phākholi chapngachā ngasakta athum khanang ngaruma.

⁹Awui ngaveila ngaleili ngaphumhaira; marila akha̱ sāthuiserhaira; awui awunga kala wungnaobing miyurbingwui alungli lei; ainla maleiluimana, kala awui marānbingla PROHOwui eina khamahā masamphangthura.

¹⁰Zionwui naongalāva̱wui ararbingna akhon akhak mashokla ngaleili pama; athumna bora ngavaida kuili hotla neowa; Jerusalemwui ngalānaobingna kui mashunda ngaleili yangzanga.

¹¹Imik chāra̱ tāsānhaira; imanglā kakhananglungli lei; Iwui mibingwui naongalāva̱wui kashimānwui vang, khikhalajila naoshinaobing angangnaobing kathaina keinungwui chānreili vānserhaowa.

¹²Athumna ava̱va̱ ngarāli, “Zāt kala drakhāra̱ kali leili?” da keinungwui chānreili khamā kaza̱ mi thāda athumna vānda pikatā tharan, kala ava̱ ngarāna avam eina thihaowa.

¹³O Jerusalemwui naongalāva̱! Ina nawui vang khi hāngra? Nali khi eina chānsamsido? O Zionwui kachinga naongalāva̱, ina nali ninglum khavai khi eina suira? Kaja nawui kashimān shamadru khamashā thai; nali khipāna khāngmathotra?

¹⁴Kaja nawui marānbingna nawui vang khangui, kala kakapik mahāmi; nawui shimlui hanshok khavai athumna nawui khayonkhamāng machitheimana, kha nawui vang khamarān tui chi kachipat kala thānkhanguina.

¹⁵Shongfa rākhamakān saikorana nali athumwui pāng kapherora; athumna kasida kala kui khayitta, Jerusalemwui naongalāva̱li, “Okathuiwui khamathā kākashungva saikorawui mathān khavai keinung chi hila?” da athumna zei.

¹⁶Nawui yangkashebingna ngashānyangda mana̱shi, athumna kasiya, ahā kachat-kachipa, athumna, “Ithumna ali sākhayāngmihaira! Iya, zimiksho hi ithumna honkasāna; ara ithumna hi samphangda; theihaira!” da athumna vaowa.

¹⁷PROHOna kharin chi sākachanghaira, ana ngarān kahai chi sāhaira, mangapatma achā hāngkahai thāda, ana lukhamashan maleila sakhayāngmihaira; ana yangkashibingli nawuitungli mathān ngasaka, kala nawui yangkashewui pangshapli masot mingasaka.

¹⁸PROHOli panglāk eina vaolu! O Zionwui naongalāva̱! Nawui chāra̱ kong khalong thāda ngathor ngazin longshon longthairanu! Na khalatta mangasāmkhui ngasakalu namikla mangasāmkhuiaranu!

¹⁹Ngakarthuilu, ngayāshong ngakaolu, ngayā khamayon haokaphok tharan; PROHOwui mangāli naning tara̱ thāda heishoklu, chānrei haokaphokpam kachida kathaiwui eina vānda khalei nanao ngarāwui mirinwui vang napāng katingshoklu.

²⁰Yanglu, O PROHO, kala theimilu! Khipāli nana hithāda sāyanghaira? Ava̱ ngarāna athumwui khaluma naongarāli shairala? Pāngmon kala marānli kathara shimli shaothatrala?

²¹Khararnaosan mateila chānrei chifatungli pitai; iwui yāron ngalā raighai eina pitāhaira; nana malungvātshunhaithang athumli lukhamashan maleila sāthatserhaira.

²²Langchin sākahai phanitli hokakhui thāda, apam kachiva̱wui eina nana ina khangacheebingli hokhui; kala PROHOna malungvāthang khipākha mayāmshokmana, kharingla maringmana; Ina pharākakhui kala lumtir eina nganaokakhuibing chili, yangkashebingna sākazamhaowa.