Read Tangkhul Naga CHAPCHĀT 3 Bible Online

CHAPCHĀT 3 - Tangkhul Naga bible

CHAPCHĀT 3

¹Awui malungkhavātwui sājeili kachotkachāng theikahai mi chi ina;

²kahor makhaleipam, tangkhamangli kashamvāda ili chizata.

³Kachangkhatta, iwuitungli apāngna langpongda latlui latluida shaopama.

⁴Iphasā kala ahui ana shimān ngasakta, ara̱kuila yapkachupmiserhaira;

⁵kakhanang kachot sipkasāwui alungli ili tuknarhaowa.

⁶Achā thikahai mi thāda ana ili tangkhamangli pamngasaka.

⁷Ana ili mayāmshokpai khavai phākho ngaveikhama; ana ili kharita mari khānghui eina khalaphai.

⁸Ngachonmi khavai ina ngakaolala, iwui seihā kasā ana makhuisangmimana;

⁹Iwui apong ana shānkakhui ngalung eina phinmihaowa, iwui shongfa khayeikazammihaowa.

¹⁰Iwui vanga a rimkapama singom thai, rimkapama kazingkha̱ thai;

¹¹shongfa kānda ili thānthuihaida ili serkazama, ana ili ngachakyāng ngasakhao;

¹²awui malā hunda malāthingna ili pāntamnganaowa.

¹³Awui malākhongwui malāthing imalungli kāpsangmihaowa;

¹⁴I mi saikorawui mana̱shi khavai ngasāhaira, langpongda mibingwui laa eina mana̱shida khanang ngasaka.

¹⁵Ana ili kakhā ara̱ eina chipemmi, ana thingkhā eina sānngasaka.

¹⁶Ana iwui ahāla lunghailātungli nurngasaka, kala ili hotlāwui alungli ngakhor ngasaka.

¹⁷Imanglā chingri kahai maleimana, ringkaphā kaho chi I malaihaira;

¹⁸Chieina ina hānga, “Iwui tekhamatei thuihaira, kala PROHOwui eina kachihānla.”

¹⁹Iwui kachot, iwui mirin-kashi, thingkhā eina athi kathā phaningungmilu.

²⁰Imanglāna chi phaningungchinga kala ining kurhaowa.

²¹Kha hi ina phaningunga, kala chiwui vang ina kachihān lei:

²²PROHOwui makhangachei leikashi katang mavaimana, awui lukhamashan katang mavaimana;

²³ngathor kachida athum chi dharchinga, nawui ning katong chi hakmahālaka.

²⁴“Iwui vang PROHOmāng lei,” da imanglāna hānga. “Chiwui vang ina ali chihānra.”

²⁵PROHOli khangaraibing, ali kaphā manglābingwui vang a hi phālaka.

²⁶PROHOwui huikhamili ning nganungda kahon hi phālaka.

²⁷Nganuilakha mi akhana kharit otphun kaphung awui vang phālaka.

²⁸Ali kachiphun tharan, kasaikha ja̱pamranu;

²⁹chifali akhamor chizunlaga pamranu kachihān leisāpai;

³⁰kashaowabingli amai ja̱miranu, kala zeikakharui eina chipemranu.

³¹Kaja PROHOna horchao kahai masāmara,

³²kha, ana khanang ngasaklala, awui makhavāta makhangachei leikashi chiwui athishurda ana lumashanmira;

³³kaja mayāngairareo makhanang ngasakmana lah miwui naomayarabingli machot ngasakngaimana.

³⁴Okathuiwui phātop saikora pheizingli naikazam khavai;

³⁵juikhamataiawui miktāli mi akhawui mashun khayeithuimihai khavai,

³⁶mi akhawui ngalang masho-ngacheimi khavai PROHOna mamayāmana.

³⁷PROHOwui sākahai maningla khipāna ngateida sāshapkhala?

³⁸Kashila kaphāla Reikhamataiawui eina kashok maningmala?

³⁹Khisāda kharinga mi akhana, awui moreiwui vang tandi khami tharan mamayāngaimana chipairakhala?

⁴⁰Ithumwui apong ithum khalatta machukyangsa, kala tamyangda PROHOli mai ngareiungsa!

⁴¹Kazingramli khalei Vareli wuklung kala pāng khāngkāda seihā sāsa:

⁴²“Ithumna ngakaishida morei sāhaira, kala nana mapheomiranga.

⁴³“Nana malungkhavāt eina shaksāda, ithumli kharomkhuida lukhamashan maleila shaothata;

⁴⁴nana muiyā eina shaksāda ithumwui seihā kasā makāshung khavai sai.

⁴⁵Ithumli mibingwui alungli thothāp thāda horhaida masā khavai sāngasakhaowa.

⁴⁶“Ithumwui yangkashe saikorana mana̱shida zei,

⁴⁷kashimān kala sākakhayāng, khangachee kala tātungkapaina ithumli yuihaira.

⁴⁸Iwui mibingwui naongalāva̱li sākashimānwui vang imikli chāra̱ kongra̱ thāda longa.

⁴⁹“Iwui chāra̱ khangasām mavaila longshon longthaira;

⁵⁰PROHOna kazing eina yangtāda matheimiranglakha eina tangda;

⁵¹keinungwui naongalāva̱ saikorawui kalākashi hi theilaga, imikna ili wukhanang ngasaka.

⁵²“Angalang maleila ili yangkashebingna vānao thāda ngatānzata;

⁵³chomli kharing eina horsangda iwuitungli lunggui horsanga;

⁵⁴tara̱na ili tumhaida, I ashimān hina da ina hānga.

⁵⁵“Kathuka chomwui eina, O PROHO, namingli ina ngakaoli;

⁵⁶nana iwui khangakao shāmilu, ‘Ili ngachonmi khavai khavao nakhanā makafakhamihailu!’

⁵⁷Ina khangakao tharan nana rānganaimida ‘Mangacheealu!’ da nana hānga.

⁵⁸“O PROHO, nana iwui angalang theimi, nana imirin ngatangmihaira.

⁵⁹O PROHO, ili khayon kasā nana thei; iwui mashun bichar sāmilu.

⁶⁰Athumna ili athut kakhui saikora, ili thikhavai kasā saikora nana theihaira.

⁶¹“O PROHO, athumna khamashāt saikora nana shāhaira, ili thikhavai kasā saikora nana theihaira.

⁶²Langpongda iwuitungli machukta sui sai.

⁶³Yanglu, athumna ngathor eina thuida ngazin eina tangda, ili mana̱shinganaowa.

⁶⁴“O PROHO, athumna kasāwui athishurda tandi khamilu.

⁶⁵Athumli khonshida ngachāngchatsui kahai ning milu;

⁶⁶Nana malungkhavāt eina athumli kharomra kala nawui kazingramzingli athumli sāshimānra O PROHO,”