Read Tangkhul Naga EZEKIEL 11 Bible Online

EZEKIEL 11 - Tangkhul Naga bible

EZEKIEL 11

¹Manglā china ili khangkālaga PROHOwui shimwui zingshoshong ngareikashoka zingsho ngaveili khuivai. Kala yanglu, ngaveiwui khāmongli mi maga̱da phangā leisai; athumwui ngachaili, mibingwui wungnao, Azzurwui naomayara Ja-azaniah eina Benaiahwui naomayara Pelatiah zangsai.

²Kala ana ili hānga, “Miwui naomayara, keinung hili makaphā awor sāda morei sākhangasaka kala makhayā ot hāngkachitheia mibing chi hina.

³Athum chi ‘Shimbing sakhuiki kaji atam vātfaya; keinung hiya sā hampai kathāna, ithumna sā kathāna’ da kahāngabingna.

⁴Chiwui vang eina, O miwui naomayara, athumli makhamayā tui marānmilu.”

⁵Iwuitungli PROHOwui manglāna tāmida, ana ili hānga, “PROHOna hithāda hānga da hānglu: O Israelwui shimkhur, nathumna hithāda kaphaningna; kaja nathumwui ningli rākazang chi ina theisera.

⁶Kala keinung hiwui alungli nathumna shaokathat mataisang ngasaka, kala chiwui chānreili minguna chipema.

⁷“Chiwui vang Proho VAREna hithāda hānga: Nathumna shaothat kahaibing chi sāna, keinungna sā hampaina; kha nathumle chiwui eina khuishokra.

⁸Nathumna raighaili ngacheeya; kha ina nathumwuitungli raighai khuirāra da Proho VAREna hānga.

⁹Kala ina chiwui eina nathumli khuishokta makathei yurbingwui pāngli horsangmira, kala nathumwuitungli bichar sāra.

¹⁰Nathum raighai eina thira; ina nathumli Israelwui tharili bichar sāra; kala chieina nathumna I PROHOna da theira.

¹¹Keinung hi nathumwui sā hampai masāmara, lah nathumla hiwui sā maningmara; Israelwui tharili ina bichar sānaora;

¹²chieina nathumna I PROHOna da theira; kaja nathumna iwui shiyan-chikan mamayonmana, kala ain athishurda masāmana, kha nathumwui kuikhamareili khalei yurbingwui ain athishurda sai.”

¹³Ina marānmida leilakha hithāda shoka kaja, Benaiahwui naomayara Pelatiah thihaowa. Chieina ina mashunzangda akhon panglāk eina shokta chaplaga hānga, “Iyavo Proho VARE! Israelwui shākkahai hi kānmikachangkhathaorala?”

¹⁴Kala PROHOwui tui chi ili rāhānga.

¹⁵“Miwui naomayara, nachināngarā, nali khangaso, nali raithākharumbing, Israelwui shimkhur saikora, athum katonga, Jerusalem hili khaleibingna, ‘Athumna PROHOwui eina katāva̱li thuihaira; ithumwui vang ngalei hi mikahaina’ da hāngkahai china.

¹⁶Chiwui vang eina hānglu, ‘Proho VAREna hithāda hānga: Miyurbingwui alungli kala lam katātāva̱li ina kashamkhayangvāhailala, athumna kapapam chili ina kasha̱khawui vang athumwui kathara shim ngasāmira.’

¹⁷Chiwui vang eina hānglu, ‘Proho VAREna hithāda hānga: Mibingwui eina ina nathumli hokhuiluira, kala nathumli chaiyāngvā kahai ngaleibingwui eina kazipkhuilaga Israelwui ngalei nathumli mira.’

¹⁸“Kala athumna chili khaung tharan, mayangkhangai ot, ningkakachai ot saikora khuishokserhaora.

¹⁹ Kala athumli ina ning khokkha kasā mida manglā kadhar sangmira; kala athumwui ngalung kathā ning khamarar chi khuishokmihaida phasāwui malung sangmira,

²⁰chithāda athumna iwui shiyan-chikan kala sharphahorbing mayonda iwui kahāng nganāra; kala athum iwui mi ngasāra, kala I athumwui Vare ngasāra.

²¹Kha mayangkhangai kala ningkakachai otli kashurabing chili, athumwui otsak athishurda athut khuira da Proho VAREna hānga.”

²² Chiwui thili cherubbing china kāngpheibing ngasoda angachāng hāruwa, kala Israelwui Varewui tekhamatei chi athumwuitungli lei.

²³PROHOwui tekhamatei china keinungwui eina kāmamānda zingshoshong khalei kaphung chiwuitungli kānganinghaowa.

²⁴Kala Varewui Manglāna mahākhamiwui eina Manglā china ili raithā kahaibingwui kapampam Chaldea ngaleili khuivāmi. Kala ina kathei khamahā chi iwui eina atungshong kāhaowa.

²⁵Chieina ina raithā kahaibingli PROHOna ili kachithei saikora chi hāngsera.