Read Tangkhul Naga EZEKIEL 13 Bible Online

EZEKIEL 13 - Tangkhul Naga bible

EZEKIEL 13

¹PROHOwui tui china ili rāhānga:

²“Miwui naomayara, Israelwui marānbingli makhamayā tui marānlu, kala athumwui ning eina marānphāphā kaje marānbingli hānglu: ‘PROHOwui tui nganālu!’

³PROHOna hithāda hānga, khikha matheila kachichāwui ning eina sākazata, mangkhama̱ marānbing chili khonkashi ngasāranu!

⁴O Israel, nawui marānbing chi ja̱tā kahai keinungli khalei ramfa kathāna.

⁵Nathumna mintā kahai phākholi mavāyangranga, lah PROHOwui zimikshowui raili nganingshap khavai Israel shimkhurwui vang phākhola masākāranga.

⁶Athumna mikhanam tui matui kala kakapika khanong sai; athumna PROHOna machiholala ‘PROHOna kahāngna’ da hānga, laga athumwui kaphaning ungshung khavai ali chihānkhaninga.

⁷Nathumna mikhanama khamahā, kala kakapika mang hāngda ina mahānghailala, ‘PROHOna hānga’ da mamatuiyangrangla?”

⁸Chiwui vang eina Proho VAREna hithāda hānga, “Khikhalajila nathumna mang sāda kashiman chi hangphāphā kajiwui vang yanglu, ina nathumli makhamayāna da Proho VAREna hānga.

⁹Minamda khamahā kala kakapik khanong kasā marānbing chili ipāngna mamayāmara, athum iwui hangva̱ masāpaimara, kala Israelwui mishānlila mazangpaimara, chili lāngda Israelwui ngaleilila mazangpaimara, kala nathumna I Proho VAREna da theira.

¹⁰ “Kachiwui vangkhala kaja athumna iwui mibingli, chingri kahai makhalei atamli ‘Chingri eina lei’ da nguida tamchithei; kala mibingna phākho sakakā tharan marānbingna leishi-leishai neokatotmihai.

¹¹Phako chi leishi-leishai neokatotmihaida tekkhavai kasābingli hānglu. Tara̱ phongra hakkhamahā theihla tāra, siphan zingrot ngasoda phanra;

¹²kala phākho chi ja̱katā tharan nali, ‘Ari khaneo chi kali vāhao?’ da mahāngmarala?”

¹³“Chiwui vang Proho VAREna hithāda hānga: Iwui malungkhavāt alungli siphan zingrot ngathung ngasakra; kala iwui malungkhavāt alungli tara̱ phongra, kala hakkhamahā theihla sāshimān khavai tāra.

¹⁴Nathumna leishi-leishai teikatot kahai phākho chi ina sākhaira, kala chi ngaleili ngachamda sakhaimihaida shimphungala amei-amā matheimara; chi kongkhalui tharan, nathumla chiwui alungli thisangra, kala nathumna I PROHOna da theira.

¹⁵“Chithāda iwui malungkhavāt phākhowuitungli kala chili leishi-leishai neokatot kahaibingwuitungli tāra; kala ina nali, phako chi kala leishi-leishi eina neokatot kahaibing chila maleithura,

¹⁶Jerusalemwui pongli khamarān marānbing, chingri makahai tharan, chingri kahaiwui khamahā katheibing saikora chila kuphaira da Proho VAREna hānga.

¹⁷“Miwui naomayara, kachichā aningsasak eina marānkazat nawui mibingwui naongalāva̱ ngarāli makhamayā marānda hānglu,

¹⁸kala hānglu, Proho VAREna hānga: “Laivā sālaga pāngtamra̱ hāsangkhami kala kashāng-kharei mateila saikorawui vang mairār kasemabing manglā shimān khavai kasā sha̱naobing chi kakhanang ngasāranu! Nathumna iwui mibingwui manglā shimān khavai sālaga nawui tongzā khavai khangateibingwui manglā ringkhavai kasāla?

¹⁹Lang pāngmayākhawui vang kala khamuitang akhawui vang, iwui mibingwui ngachaili, nana ili makhao ngasaka; kala iwui mibingli kapikta mathiki kajibingli thingasaka, thiki kajibingli mathingasakmana.”

²⁰“Chiwui vang eina Proho VAREna hithāda hānga: Yanglu, manglā shimān khavai nawui laivāwui pāngtamra̱ chili ina mamayalakmana, saikora chi napāngtheiwui eina sāshatmihaida, nana manglā shimān khavai kasā athumli vānao thāda yongthui ngasakhaora.

²¹Nawui mairār chila ina sākazamihaida iwui mibingli napāngwui eina kanmira, kala sāshai thāda nawui pāngli maleiluimara, chieina I PROHOna da nathumna theira;

²²“Khikhalajila ina ali ning masuitā ngasaklala, nana khangarongbingli ning suitā ngasakta kala makhayā mili athumwui makhayā apong eina ngareiungda athumwui manglā mangatangkhui khavai kakatomwui vang,

²³ara nathumna mikhanam khamahā matheiluimara, khanongla masāluimara; ina nathumwui pāng eina iwui mibingli kanshokra. Chitharan I PROHOna da nathumna theinaora.”