Read Tangkhul Naga EZEKIEL 14 Bible Online

EZEKIEL 14 - Tangkhul Naga bible

EZEKIEL 14

¹Chiwui thili Israelwui khararnao kaikha iwuili rai, kala iwui ngalemli rāpama.

²Kala PROHOwui tui chi ili rāhānga:

³“Miwui naomayara, mibing hina meoma̱ athumwui ningli phumhaida athumwui ngaphok khavai morei otsakmāngli yanga; iwui pongli athumna ngahān khavai mayāra da phaningla?

⁴“Chiwui vang eina athumli hithāda hānglu, Proho VAREna hithāda hānga: Israelwui shimkhur mi akhana meoma̱ ningli phumhaida awui phei ngaphok khavai morei otsakmāngli yanglaga, marānli rāngahānakha; awui meoma̱ kachungkha chiwui vang PROHO ina ali ngahānkāra;

⁵chiya iwui eina mai ngareithui kahai meoma̱li kaphaninga Israelwui shimkhurli tandi mikhavaina.

⁶“Chiwui vang Israelwui shimkhurli hānglu, PROHOna hithāda hānga: Ning ngateilu kala nathumwui meoma̱wui eina ngareithuihaolu kala ningkakachai saikorawui eina mai ngareithuilu.

⁷“Kaja Israel shimkhurwui eina, lah athumli ngasokazatbingwui eina, kachikathāna ili horhaida meoma̱li ningli phumhailaga awui phei ngaphok khavai morei otsakmāngli yanglaga marānli iwui kachithei rākhangahān mi chili PROHO I khalattana ngahānkāra;

⁸kala chikathā mi chili ina mamayāmara, kala iwui mibingwui eina katatmihaida miwui mangāli khamachut sākhavai kala tantak tākhavai chānjam sāmira; chieina I PROHOna da nathumna theira.

⁹“Marānnala kapikta matuiphāphaakha, chipālila PROHO ina thāda ali mahaimara, kala awuitungli ipāng katingshokra, kala iwui yur Israelwui eina ali shimān ngasakra.

¹⁰Kala athumna athumwui tandi phungphalungra— marānwui tandila kala rakhangahānabingwui tandila ngaraichāra—

¹¹chiya Israel shimkhur iwui eina mayāmlui khavai, lah athumwui khayonkhamāng ot saikora chieina athum khalatta masākhamāng ngasakluila; kha athumna iwui mi sāra kala ina athumwui Vare sāra,” da Proho VAREna hānga.

¹²Kala PROHOwui tui chi ili rāhānga:

¹³“Miwui naomayara, ngalei akhana shitkasang maleilakla iwuitungli morei saakha, kala ipāng katingshoklaga mamayāla chāmrei rāngasakakha, kala chiwui eina mila sāla shimān ngasakhaiakha,

¹⁴Noah, Daniel, Job ashi kathum zangsālala, athum kathumla athumwui khamashung khangarong mangā eina athumāng shokra,” da Proho VAREna hānga.

¹⁵“Ina apam hili sāyurbing chihorāda athumna sākazammiserhaida sābingwui vang mi marāpailala;

¹⁶athumwui alungli ashi kathum hi leisālala, ina kahāngna, athumna naomayara kala naongalāva̱bingla makanmirarmara; athum khalattamāng kankhuira, kha lamva ramchohaora da Proho VAREna hānga.

¹⁷“Lha kalikha ina apam chili raighai chihorāda, kala apam kachiva̱li raighai akha chihovālu da kasolaga; ina mila sāla apam chiwui eina sathatakha;

¹⁸ashi kathum chiwui alungli leisālala, kachangkhat ina kahāngna, athumna naomayarabing kala naongalāva̱bingla makanrarmara, kha athum khalattamāng kanshokra.

¹⁹“Lha kalikhada apam chili ina mimao shivātta; kala iwui malungkhavāt chiwuitungli ashee eina heirorda, mila sāla chithitakha;

²⁰Noah, Daniel kala Job eina tangda leisālala, athumna naomayarabing kala naongalāva̱bingla makanmirarmara; kha athumwui khamashung khangarong mangā eina athum khalattawui manglāmāng kankhuira.”

²¹ “Kaja Proho VAREna hithāda hānga: Jerusalemli ina kasaka bicharwui tandi mati mira chiya, raighai, chāmrei, sākashe sā, kala kazātkashi mida mila sāla chithitserra.

²²Athumwui ngachaili mathila yāmkashok zangda naomayarabing kala naongalāva̱bingli thānshok khavai nathumwuili kharā tharan, kala athumwui kasākhavā theilaga Jerusalemli ina kalāshāt khuikharā hi ngayilaka da nathumna ningkhalum samphangra.

²³Athumwui kasā khavā kathei tharan, china nathumli ningnganung ngasakra; kala athumli kasā saikora hi angalang maleilakla masāhaimana da nathumna theira,” da Proho VAREna hānga.