Read Tangkhul Naga EZEKIEL 16 Bible Online

EZEKIEL 16 - Tangkhul Naga bible

EZEKIEL 16

¹PROHOwui tui chi ili latluida rāhāngluishita:

²“Miwui naomayara, Jerusalemli awui ningkakachai ot chi chitheimida hānglu,

³ kala, Proho VAREna Jerusalemli hithāda hānga da hānglu: “Nathumli Canaan ngaleili pharai. Nashavā Amornaona, kala nashava̱ Hitnaona.

⁴Nali pharāthang nahaitongkhara̱ khipanakha mareoshatmana, lah mara̱vaimimana, machi einala manurmimana, naokhalui einala makhaluimimana.

⁵Hikatha hi sami khavai nali khipanakha malumashanmimana; nali pharāthang, khipanakha nali maleishimana. Kayāng khareili horhaiya.”

⁶“Chieina ina nali rākakān tharan nawui ashee tottāt eina ngaleopikasā chi theida, ‘Mathiaranu,

⁷arongwui akhar thāda okthuiranu’ da ina hānga. Chieina nana ngatarlak eina rarmamānda akhok kajuiva̱ ngalanao akha ngasāhaowa; ana̱la oka, kala nawui samla sāngsanga, chithālala na mahonghathai.

⁸“Ina nali rakānluishit kaji tharan, yanglu, na leikashi khalei atamli leisai; kala ina iwui kachon fasangmida nawui khayā ngarinmi: mha, nali khuira da ina tuingashit sai, kala na iwui ngasāhaowa da Proho VAREna hānga.

⁹Chiwui thili ina nali tara̱ eina ra̱vaimi, nawui ashee pheotāmida nali thao neomi.

¹⁰Ina nali aphor sākasang kachon ngavaimi, kala sāhuiwui pheihop sangmi; khamanaka kachon eina khaluimi kala silk kachon eina farormi.

¹¹Kala nali ina sāri shaksāmida pangtheili kazao sangmi, kala nakahungli chā ngachāmi.

¹²Kala ina nawui nātāngli nārenra̱ sangmi, kala nakhanāli unra̱ ngathetmi, kala nakuili khamathā kuihon akhala ngahonmi.

¹³Chithāda nali sinā lupā eina sāri sāmi; kala nawui kashankachon khamanak kala silk kachon, aphor phorkasanga kachonmānga; nana khamanaka mathir kala khuira̱ eina thaomāng zai. Na ngalā mathākachangkhata rarkai kala awungawui shimlui samphanga.

¹⁴Kala nawui azak khamathāwui vang naming yurbingwui alungli ngachāna, kaja nali mathā khangasaka chi ina. Hi Khamunga PROHOna kahānga.

¹⁵“Kha naming zathaoda nawui khamathāmāngli ning horsangda makachingva̱wui ot sāzata, kala rākakān saikorali mavātlakla yora.

¹⁶Nana nawui kashankachon ngayarda khuilaga khorum khavaipam sākhui, kala chili mashoklakrang kaji kala mashokluiki kaji khayorva̱ thada mi kachivali mayāmi.

¹⁷Kala iwui sināla lupāla nali khami chi nana mayarnaobingwui ama̱ sākhuilaga chili phophāpama;

¹⁸kala nana nawui aphor phorkasang kachon khuida chieina farora, kala iwui thaola, nganamkaphā otyurbing chiwui mangāli haihai.

¹⁹Kala ina nali kashakazā mi— mathāmeikap kaje mathir, olive thao, kala khuira̱— chila meoma̱bing ningyangung khavai pha̱kaphayā sāda chigathaowa. Hi Khamunga PROHO na hānga.

²⁰“Kala iwui vang nana pharākhami inaongalāva̱ naomayarabing pha̱phayā khavai riktai. Nawui khayorwui otsak hi teonāhaida

²¹inaongarāli shaothatta meili horsangda nana pha̱kaphayā ot kasāla?

²²Kala nawui ningkakachai ot kala khayorva̱̱wui otsak kasā hili na nganuilakhawui atam, khamahong eina ashee khaneokatotlaga leikasā chi maphaningungmana.

²³“Nawui makaphā makhayāwui vang (kakhanang, nali kakhanang ngasaranu da Proho VAREna hānga)

²⁴na khalattawui vang khamong rartit kahai kā akha sākhui, kala shongfa kachida khamasopam sakhui;

²⁵shongfaphei kachida khamasopam sakhuilaga chili nawui khamathā chi yorpama, rākakān kachivali mayāmida khayorva̱wui otsak mataisanga.

²⁶Ili malungshivāt khavai nana khamathang khamarang nawui khongnai Egyptnaobingli naphasā yorsangda khayorva̱wui otsak mataisanga.

²⁷“Yanglu, chiwui vang eina, ina nali mamayāmada ipāng katingshokra, kala nawui yar suitā ngasakra, kala nawui kākharām yangkashe, nawui makhayā otsakwui vang khayāmalākhamiva̱ Philistinewui naongalāva̱li nali horsangmihaora.

²⁸“Nana Assyrianaobinglila naphasā yorsanga kala na penhaira kaji mavaithuda; mha, nana athumli yora, chithālala na aruila ningyang maungranga.

²⁹Leihkhalon Chaldeanaobinglila khayorwui otsak mataisanga; chieina tangda nawui vang ningyang maungthuwa.

³⁰“Nawui leishāt wuklung kayākha kazāhaokhala, hiyākha maishāda khayorwui otsak kasa saikora hi; da Proho VAREna hānga;

³¹shongfaphei kachida shungtit kahai kā sākhuilaga, kayāng kharei kachida kajuipam saikhuiya. Laga nava khayorva̱̱ mathāmana, kaja nava pheisā eina khamasāli malungvāta.

³²Phokaphava̱ preiva̱, gaharawui mahutli kha̱mili khangasova̱̱!

³³Mibinga khayorva̱̱ kachiva̱li aman mi, kha nava nali leikashebingli mi, apam kachiva̱wui eina nawui khayorli rāzang khavai pheizā sai.

³⁴Chiwui vang eina nawui khayor hiya sha̱nao khangateiwui eina ngateihanghhai; yormi khavai nali khipanakha masuimana: kha nava nana pheisā mikhavai athumli phāzata, chiwui vang eina na ngateiphalunga.

³⁵“Chiwui vang eina O khayorva̱̱! PROHOwui tui chi nganālu:

³⁶Proho VAREna hithāda hānga; Kaja nawui khayākhamalā chi mahonghat kala nawui khayā leikashebingli lānchitheihaogada, kala nawui meoma̱bingwui vang, kala nana nanao ngarāwui ashee athumli khamiwui vang;

³⁷yanglu, nali ningyāng ungda khangarumbing saikora ina kazipkhuira, nana leikashibing kala nana ningkakachaibing saikora; apam kachiva̱wui eina ina kazipkhuilaga athumwui miktāli nawui khamahong chi theikhavai ina nawui khayā lānmira.

³⁸Kala shakazā otli makhao khangasak kala mi shaokathata sha̱naoli bichar kasā thāda nalila sāra, kala nawuitungli malungkhavātwui kala yuikashiwui ashee tāngasakra.

³⁹Kala ina nali nawui leikashebingwui pāngli horsangmira, kala athumna nawui shungtit kahai kā kala khamasopambingli sākahai apam saikora athumna sākazamihaora, athumna nawui kashankachon eina sāri khamathāthā ngapaikhuida nali khamahong eina haira.

⁴⁰“Athumna nawuitungli mi sorkhangasai thānrāda nali ngalung eina horthatra kala nali athumwui raighai eina shātkazamra.

⁴¹Kala athumna nawui shim thotāmihaora kala sha̱naobingwui mangāli nawuitungli bichar sāra; ina nali khayorva̱̱ masā ngasakluimara, kala nanala mamasāluimara.

⁴²Chithāda sāda nawuitungli iwui malungkhavāt kapenva̱ sākhuira, kala iwui mikpaikashi nawui eina thuihaora; I chingrihaora kala malungmavātluimara.

⁴³Khikhalajila nawui nganuilakhawui atam chi nana maphaningla, kha ot saikora hina ili malung thuikhangasakwui vang; yanglu, nawui otsakwui angathut nali mashoila hāngsangra da Proho VAREna hānga.” Ningkakachai ot saikorawuitungli nana khāngkaser ot masāmala?

⁴⁴“Yanglu, mi kachiva̱na chānjam kasā thāda, nalila ‘Ava̱va̱ thāda naongalāva̱la chipapama’ da chānsmra.

⁴⁵ Nava gaharali kala naongarāli kachinva̱wui naongalāva̱na; kala nava gahara eina naongarāli kachinva̱bingwui achinaova̱na. Nava̱ Hitlāna kala navāva Amornaona.

⁴⁶“Kala nachonva, anao ngalāva̱li ngasoda nawui atungshong khalei Samaria china; kala anao ngalāva̱li ngasoda azingshong khaleiva̱ Sodom nagatuiva̱na.

⁴⁷Chithālala nava athumwui thāda kazatli, kala athumwui ningkakachai otsakli mapenmada atam kasha̱khawui thili athumna kasā apongli nana zakshimeikharhaowa.”

⁴⁸“Kachangkhat eina ina kahāngna, na eina nanao ngalāva̱ ngarāna kasā thāda nagatuiva̱ Sodom eina anao ngalāva̱bingna masāmana da Proho VAREna hānga.

⁴⁹Yanglu, hi nagatuiva̱ Sodomwui moreina: a eina anao ngalāva̱bingna langsoi, mazākharar eina tangda zai, lekngasaisor eina okthui, kha khangazanbing kala khavātabingli mangachonmimana.

⁵⁰Athum hiklaka kala iwui mangāli ningkakachai ot sai; chiwui vang eina ina kathei chitharan athumli shimān ngasak kahaina.”

⁵¹“Samariana nawui morei kasā yākhawui tangkhai makāshungmana; nana athumli ningkakachai ot chungmeikharda sai, nana ningkakachai ot sākahai saikora china nachinaova̱bing khamashung kasā thāhaowa.

⁵²Nawui maikashi khānglu, kaja nachon ngarāli nana bichar mashung ngasakpaihaowa; khikhalajila nawui morei, ningkakachai ot chungmeikhar kahaiwui vang athum mashungmei haowa. Chiwui vang eina khayaklu, kala nawui maikashi phunglu, kaja nachon ngarāli nana mashung ngasaklak kahai thāhaowa.”

⁵³“Sodomshi vānaongarāwui shimlui ina hanmiluira, Samariashi vānao ngarāwui shimluila hanmira, kala nawui shimluila athumwui alungli hanmipapamra,

⁵⁴chithāda nawui maikashi kala nana sākahai saikorawui khayākhamalā athumwui vang ninglum khavai ngasāra.

⁵⁵Nagatuiva̱ Sodom eina anao ngalāva̱ ngarāna kharewui shimlui chili hanungra, kala nachon Samaria eina anao ngalāva̱ ngarāna ashiwui shimpam chili hanungra, kala na eina nanao ngalāva̱bingla nashiwui chili hanungpapamra.

⁵⁶Na malingshaplakha nachon Sodomli nana mangacha̱nsā nganaosāmala,

⁵⁷nawui makhayā kasā malanchitheiranglakha? Ara nala, Edomwui nao ngalāva̱bingwui kala awui khongnainaobingwui, kala Philistinewui nao ngalāva̱bingwui, kala nali yangkakharingbingwui mashāt khavai sāthuihaowa.

⁵⁸Nawui khāngkaser kala ningkakachai otsakwui vang tandi phungdalei, da PROHOna hānga.”

⁵⁹“Mha, Proho VAREna hithāda hānga: Nana tuingashitli ningkachaida sākakhaiwui vang inala nali sāmira,

⁶⁰chithālala na nganuilakha nali iwui tuingashit sākahai chi ina phaningungra, kala ina nali makhangachei tuingashit akha sāluishitra.

⁶¹Nachinaova̱ khanini Sodom eina Samariali, naongalāva̱ sāda ina nali khami tharan, khare kachāng nawui kasākhavā chi phaningunglaga na khayāmalāra; kha nali tuingashit kasā chiwui vang maningmana.

⁶²Ina nali iwui tuingashit sakāluishitra kala nana I PROHOna da theira,

⁶³kala nawui kasāsā saikora ina pheomi kahai tharan, nana phaningungda matakhak khayāmalāthak eina khituikha mamatuimara” da Proho VAREna hānga.