Read Tangkhul Naga EZEKIEL 17 Bible Online

EZEKIEL 17 - Tangkhul Naga bible

EZEKIEL 17

¹PROHOwui tui chi ili rāhānga:

²“Miwui naomayara, Israelwui shimkhurli chāntam akha hānglu, kala tamkhuikapai khararchān eina hāngchitheilu;

³Proho VAREna hithāda kahāngna da hānglu: Hakkhamahā angachāng eina ngasoda amareng kasanga, vānaohā machu kachungkha khamanāta khalāng akha Lebanonwui cedarthingtonli rāpa̱ya;

⁴ana chiwui aton reokhuilaga leih sākhavaipam akhali khuivai, kala leihkhalonbingwui keinungli vāhaiya.

⁵Chieina ana ngalei chiwui atha khuilaga tara̱ makhavāta ngalei katumpamli yaosanga. Kala willowphāng thāda lingsanga,

⁶ashon shonshokta nemlak eina khangachuiya drakhārong ngasahaowa, kala aphāngna awuishong ngareivai, angayungna apamli phora. Chithāda drakhārong ngasāhaowa, kala aphāng kachungkha shokta anāla timfahai.

⁷“Kha angachāng kahakva̱ kakā, ahāla chungmeikhar kaji khangatei khalāng akhala leisai; kala yanglu, drakhārong hina tara̱ yikmi khavai arong chiwui angayungla, aphāngla awuishong ngareivāhaowa. Lingsang khavai apam chiwui eina

⁸ana mathāmeida phor khavai, aphāng chungmeida shok khavai, kala athei chungmeida mathei khavai, ngaleikatum, tara̱ makhavāt apam akhali ashomhaowa.

⁹“Proho VAREna hithāda kahāngna da hānglu: Chi kharrala? Ana chi angayung phurda ashon kashonbing chi chathaida mangahuimarala? Angayung eina phurkhuisida kapanga lah mi kachungkha darkar masāmana.

¹⁰Yanglu, chi shomsangluishit kaji eina mathāda phorrala? Zingshoshongwui masi phankharā tharan china lingsang khavaipam chili mangahuithatmarala?”

¹¹Chiwui thili PROHOwui tui chi ili rāhānga:

¹² “Ara ngakaikashe shimkhur chili hānglu, nathum chāntam hiwui kakhalat khikhala kaji matheikhala? Athumli hānglu, yanglu, Babylon awungana Jerusalemli rāda awungali, wungnaobingli Babylonli tukvāserhaira.

¹³Kala ana wungnao akhali khuida tuingashit sālaga shākhi sāngasaka. (Ana ngalei chiwui akhoka mibingli tukthuihaowa,

¹⁴kaja wungram hi maishiri eina mangakarthuklui khavai kala awui tuingashit mayonda nganingshap khavaina).

¹⁵Kha ana ali ngakaishida Egyptli wungmathun chihovālaga siguila kala raimila kachungkha samphang khavai sai. Ana ungshungshaprala? Hikathā kasā mina yāmshokshaprala? Tuingashit chi ana kailaga yāmshokshaprala?

¹⁶“Kachangkhat eina ina kahāngna, da Proho VAREna hānga, kachangkhat eina awunga sākhangasaka awunga awuipamli kapama, awui khangashitli ningkakachaia, ali ngarumda sākahai tuingashit sakakhaia chi, a Babylonli thira.

¹⁷Kuimareida raipan rāsaphin kahai kala shairon ronkahai chi theilaga Pharaohna awui raimi thānlaga kachilikha marāngachonlakmara.

¹⁸Khikhalajila, ana shākhi sākahai kala tuingashit kaikahaiwui vang, apāng katatsanghailaga hikathāthā kasāwui vang, a mayāmshokpaimara.”

¹⁹“Chiwui vang Proho VAREna hithāda hānga: Kachangkhat eina ina kahāngna, ana ningkakachai iwui shākhi, kala iwui tuingashitla ana sākhaihaoda, ina awuitungli angathut hāngsangphalungra.

²⁰Ina awuitungli khalen rānra, a iwui khalenli manra, kala ana iwuitungli kakapikwui vang ina ali Babylonli khuivāda chili bichar sāra.

²¹Kala awui kapangkakhui raimibing raighai eina thira, kala taikahaibing chi masili chiphanyānghaora; kala nathumna, PROHO ina kahāngna da theinaora.”

²²Proho VAREna hithāda hānga: “I khalattana khamatona cedarthingwui aton reokhuira; atonli kashok ashon chi khuilaga I khalattana kaphung khamaso akhali lingsangra;

²³ Ina Israelwui kaphung kajuili lingsangra, chieina aphāng shokta, atheila matheira, kala khamaho cedarrong ngasāra; kala chiwui azingli sāyur ayāyāva̱ ngasāmra; kala aphāng chiwui khaya̱li vānaoyur kachiva̱ athip sāra.

²⁴Chieina luili khalei thingrong saikorana, PROHOna da theira, ina kajujuiya thing nem ngasakra, kala khanema thing juida phor ngasaka, khamateka thingrong theng ngasakra, kala kathenga thingrongli nganaozao eina khar ngasakluishitra. PROHO Ina hāngkahaina, kala Ina chi sālakra.”