Read Tangkhul Naga EZEKIEL 18 Bible Online

EZEKIEL 18 - Tangkhul Naga bible

EZEKIEL 18

¹PROHOwui tui chi ili rāhāngluishita:

² “Israel ngaleiwui pongli nathumna, ‘Avāva̱ ngarāna drakhāthei kathur shai, naomayarabing hā sheihaira’ da chānjam hānglui hānglui kajiwui kakhalat khikhala?”

³“Ina kachangkhat kahāngna, chānjam hi Israelwui alungli nathumna masāluilakmara da PROHOna hānga.

⁴ Yanglu, manglā saikora iwuina; avāva̱ ngarāwuila anao ngarāwui manglāla iwuisera: morei kasā manglā chi thira.

⁵“Kachikathā khamashunga mina ainwui athishurda mashun eina saakha—

⁶ana phungreitungli mashaiakha lah Israel shimkhurwui meoma̱li mik mangareikaakha, awui khongnaiwui preiva̱li masākhamāngakha lah shanaoli makathar kazat atamli mangasoakha,

⁷khipālikha marekharekla, kha kashuka mili awui hamkahai chi tāchamda hankhame, miwui ot makhale, kathai kacham mili mikazā, khamasai eina kazat mili kashankachon ngavaikhame,

⁸chishutlala atār makakhuia, morei kasāli makakahaowa, mi kachiva̱li ngaraichāda bichar sakhame,

⁹ iwui shiyan-chikan kala ain khamayona, a chi khamashungana, a kachangkhat eina ringra da Proho VAREna hānga.

¹⁰“Kalikhada ana khale nao pharākhuiakha, ashee shok khangasaka,

¹¹hāngkahai sārānbing hi masāla, kha phungreili kapha̱sā shaiakha, awui khongnai preiva̱li sākhamāngakha,

¹²khikha makhalei khangazana kala khavata mili rekharekakha, khalee ot saakha, hamkahai mahanmiakha, meoma̱li mik ngareivaakha, ningkakachai ot saakha,

¹³atar eina shināmda, kala henda khuizaakha; mi chi ringrala? A maringmara. Ningkakachai ot saikora hi ana sāhaira; a thiphalungra; awui ashee chi akhalattawuitungli tāphalungra.

¹⁴“Kha kachikathā mi akhawui naomayarana avāva̱wui morei kasāsā chi theilaga ngacheeda masaakha,

¹⁵phungreitungli kaphasā mashaiakha lah Israelwui meoma̱li mik mangareikaakha, awui khongnai preiva̱li masākhamāngakha,

¹⁶mili khayon ot masaakha, shimlui maham ngasakakha, khali ot masaakha, kha kathai kachām mili mizaakha, kala khamahongali farormiakha,

¹⁷morei kasāwui eina pāng ngaranhaiakha, atarla makakhuiya, iwui shiyan-chikan khamayona kala ain alungli kazata mi chi avāva̱wui moreiwui vang mathimara; a kachangkhat ringra.

¹⁸Kha avāva̱na mili namkazāwui vang, achināwui ot khaleewui vang, kala awui mibingwui alungli makaphā kasāwui vang, yanglu, awui moreiwui vang a thira.

¹⁹“Laga nathumna, ‘Kachiwui vang eina avāva̱wui morei naomayarana maphungmara̱khala?’ da hānga. Naomayara china sākhangayi athishurda mashun eina kasā kala iwui kakaso eina shiyan-chikan khamayon tharan, anaomayara chi kachangkhat ringra.

²⁰ Morei kasā manglā chi thira. Avāva̱wui moreiwui vang naomayarana makhanangpaimana, lah naomayarana morei kasāwui vang avāva̱ makhanangpaimana; khamashungawuitungli khamashung khangarong tāra, kala makhayā mi chiwuitungli makhayā tāra.

²¹“Kha kachikathā makhayā mina awui morei kasāwui eina ngalatthuihaida iwui shiyan-chikan mayonakha kala sākhangayi chiwui athishurda saakha, chikathā mi chi ringkachangkhatra, a mathimara.

²²Ana khayonkhamāng sākahai chi malaimihaora; kaja ana khamashung khangarong kasā chiwui vang a kharing samphangra.

²³ Makhayā mi kathi chiwui vang ina ringkaphā khi leikhala? da Proho VAREna hānga; ana awui zatta khaleiwui eina latungda ringtharanu majimarala?

²⁴“Kha khamashung khangarong mina awui khamashung khangarongwui eina thuihaida, makhayā mina kasā thāda ningkakachai ot saakha, chikathā mi ringpairala? Ana khangarong ot sākahahai akhala maphaningungmara; awui yonsak eina kasāwui khangui kala morei kasā chiwui vang a thiphalungra.

²⁵“Laga nathumna, ‘PROHOwui apong mamashungmana’ da hānga. Ara nganālu, O Israelwui shimkhur: Iwui shongpong mashun maleimala? Mashun makhalei apong chi nathumwui apong maningmala?

²⁶Khamashung khangarong mina khamashung shongpongwui eina ngareithuida morei kasā tharan, ana morei sākahai chiwui vang thiphalungra.

²⁷Latluida makhayā mina awui makhayā kasā shongpongwui eina ngareiungda khangayi mashun chi saakha ana awui mirin huikhuira.

²⁸Khikhalajila ana chukmaja̱laga ana morei sākahai saikorawui eina latkhaungwui vang, a kachangkhat eina ringra, a mathimara.

²⁹Chithālala Israelwui shimkhurna, ‘PROHOwui otsak mamashungmana’ da hānga. O Israelwui shimkhur! Iwui otsak mamashungmala? Makhamashung chi nathumwui shongpong maningmala?

³⁰“Chiwui vang eina, O Israel! nathum ava̱va̱li kachichāwui shongpong athishurda bichar sāra da Proho VAREna hānga. Ning ngateida nathum morei saikorawui eina latunglu, chi maningakha khayon chi eina shimānra.

³¹ Ili makhamayā kasā nathumna khayonkhamāng sākahahai saikora chi chihoserhaolu; kala nathum ning kala manglā kadhar sangkhuilu. Khiwui vang nathum thikida, O Israelwui shimkhur!

³² Kaja kachikathā mi akha kathiwui vang ili ringkaphā maleimana, da Proho VAREna hānga; chiwui vang ringkhavai latunglu.”