Read Tangkhul Naga EZEKIEL 19 Bible Online

EZEKIEL 19 - Tangkhul Naga bible

EZEKIEL 19

¹Kala na, Israel wungnaobingwui vang chapngachāda hānglu:

²Kazingkha̱ ngachaili nava̱ chi kachikathā kazingkha̱ ava̱ ngasāsā! Anao ngalemli piya, anao nganaoda.

³Kala ana awui nao akhali nganaokhui; a kazingkha̱nao ngasahaowa kala ana sāshai katuk tamphoka, ana mila shai.

⁴Ali tukkhui khavai yurbingna ngazeka, athumwui chomli tāzanghaowa, kala athumna khānghui eina hokkhuilaga Egypt ngaleili khuiunga.

⁵Shokkhavai kachihān maleimana da phaninglaga anao khangatei nganaokhuida rarngasaklui.

⁶Kazingkha̱wui ngachaili ana zata; kala kahakva̱ sathuihaowa, kala ana sāshai katuk tamphoka; ana mila shai.

⁷Kala ana athumwui raipan sakhaimi, kala keinungla sākathānmihaowa; kala ngalei chili leikasābing maphakhuithu, awui kakhangangkhon shālaga.

⁸Chieina yurbingna kuimareida ali khalen sanga, athumwui chomli tāzanga.

⁹Khanghui eina khalaplaga keishimli sanghaowa, kala ali Babylonwui awungali khuiungmi; khuiungda ungnarhai. Israel phungreili awui khon mashāluilak khavai.

¹⁰Nava̱va yāmguiwui drakhārong thai, tara̱na lingsangda aphāng kachungkha shokta athei kachungkha mathei, tara̱ kachungkha samkaphangwui vang.

¹¹Chiwui makangmeikap kaji akung china khamungawui khānthing [1] ngasāhaowa thingphāng saikorawui ngachaili a juimeikapsai; awui aphāngla juishun eina thei.

¹²Kha malungvavāt eina arong phurshokta ngaleili horsanghaowa; zingshoshongwui masina thengmihaida atheila pa̱tāserhao. khamakanga akungla ngahuihaida meina chuitāhaowa.

¹³Ara chi tara̱ makhalei tākok kahai lamhāngli phurshomhaira.

¹⁴Apam eina mei chuishokta aphāngla atheila chuitāserhaira, chithāda khamakanga akungla maleilui, khamungawui khānthing maleiluimana. Hi malung kharing otna, chapngachā khavaina.