Read Tangkhul Naga EZEKIEL 20 Bible Online

EZEKIEL 20 - Tangkhul Naga bible

EZEKIEL 20

¹Kashine kum, kachāng kaphangāwui zimiksho katharāthang, Israelwui khararnao kaikhana PROHOwui tui chi ngahān khavai iwui mangāli rāpama.

²Kala PROHOwui tui chi ili rāhānga:

³“Miwui naomayara, Israelwui ararnaobingli hithāda hānglu, Proho VAREna hānga, iwui tui rāngahānkida kharāla? Ina kachangkhat eina kahāngna, nathum ili mangahānpailakmara da Proho VAREna hānga.

⁴“Athumli nana bichar saralā, miwui naomayara, athumli nana bichar sarala? Chithākha athumwui avāva̱ ngarāwui ningkakachai otsak chi theiranu,

⁵kala athumli hānglu, Proho VAREna hithāda hānga: Israelli ina kapangkhuithang, Jacobwui atheili ina khangashit sāda, I khipākhala kaji Egypt ngaleili leilakha I khalattana chitheihaira, kala I Proho nathumwui VAREna da khangashit sai.

⁶Ina athumli tuingashit sāthang, Egypt ngaleiwui eina thānshokmida athumwui vang ina phāshok kahai, khuira̱ eina seina̱ khalong ngalei saikorali tekmateimeikap kaja lam mira da ina ngashit kahaina.

⁷Kala athumli, nathumwui mikna ngayamlak eina khayang ningkakachai ot nathum kachiva̱na horhaolu, kala nathum Egyptwui meoma̱ eina masākhamāng ngasaklu da hānga; I PROHO nathumwui Varena da hānga.

⁸Kha athumna ili ngakaishida iwui tui makhuimana; athum saikorana ningkakachai ot lah athumwui mikna ngayamlak eina khayanga Egyptwui meoma̱bingla mahorhaithuwa. Chieina ina iwui malungkhavāt heirorda Egyptli leilakha athumli sāmihaora da phaninga.

⁹Kha imingwui vang phaninglaga, Egypt ngaleili I khipākhala da chithei kahaiwui vang, athum miktāli masāchitheimara da khikha makathāna.

¹⁰“Chiwui vang eina ina athumli Egypt ngaleiwui eina lamhāngli thānshokmi.

¹¹Athumli ina iwui shiyan-chikan mihaira kala ain chitheihaira, kala chi khamayon mina kharing samphangra da hāngchithei.

¹² Chili lāngda ina athumli tharngasak kahaina kaji theikhavai athum eina iwui ngachaili sabbath lei kajila hāngmihaira.

¹³Kha lamhāngli leilakha Israelshi shimkhurna ili ngakaishi; athumna iwui shiyan-chikan mamayonmana kha athumna chi khamayon eina mibingna ringra kaji iwui shiyan-chikan khalanhaowa; kala iwui sabbathbing athumna hakmahālak eina sāmakhaohaowa.

¹⁴Kha iwui mingwui vang phaninglaga, athumli ina thānshokkhamina kaji yur saikorana thatheilaga masāthatchitheikhangaina.

¹⁵ Chili lāngdai ina athumli lamhāngli tuingashit sai kaja ina athumli mikahai khuira̱ eina seina̱ khalong tekmateimeikap kaji ngaleili mathānsangmara da ina ngashita,

¹⁶kaja athumna iwui shiyan-chikan khalanhaowa, kala iwui ain mamayonmana; kaja athumwui ningna meoma̱li phaninghaida iwui sabbathla makhao ngasakhaowa.

¹⁷“Chithālalai ina imik yangkheimihaida lamhāngli leilakha makachithitna kala mayumkhamina.

¹⁸Kala anaomayarali ina lamhāngli leilakha, navā ngarāwui ain mashuralu, kala shiyanbing mamayonalu, lah nathum khalatta athumwui meoma̱ eina masākhamāngalu da hānga.

¹⁹PROHO I, nathumwui Varena, iwui shiyan kala ainbing mathālak eina mayonlu,

²⁰kala I PROHO nathumwui Varena da theikhavai kala iniwui ngachaili khamachut sākhavai iwui sabbath tharmatheng ngasaklu.

²¹“Kha naongarāna ili ngakaishi; athumna iwui ain mamayonmana, kala chikan mangarangmana; khangarang eina mina ringki kajina; athumna iwui sabbathbingla sāmakhaowa.

²²Kha ina iwui mingwui vang, kala yur kateiwui miktāli hikathā masāchitheiphalungmara da ipāng ngalan kahaina.

²³Chili lāngda lamhāngli leilakha, yurbingwui ngachaili ina yaoyānghaira, kala athumli lam khangateili chaiyānghaira da hangtāhairasai;

²⁴kha athumna iwui shiyanbing mamayonla, kala iwui ain khalanhailaga iwui sabbathla makhao ngasaka, kala avāva̱ ngarāwui meoma̱li shitsanga.

²⁵“Chili lāngda athumli makankhanā shiyan-chikan kala ringkhavaiwui apong makhaning ainbing ina athumli mi;

²⁶kaja ina athumli sākhamāng ngasakta athumwui naochizai saikora meili riktāda chigat ngasaka, chithāda ina athumli ngachee ngasak khavai sai; ina chithāda kasā chi I PROHOna da theipai khavai kasāna.

²⁷“Chiwui vang, miwui naomayara, Israelwui shimkhurli hithāda hānglu, Proho VAREna hithāda hānga: Hilila navā ngarāna ili yomlak eina chipatta sai.

²⁸Kaja ina ngashit kahai lam chili thānkhaung tharan, kaphung kajujui kala thingpompa̱ theikachida athumna pha̱kaphayā ot sāda machigat khangayili chigata, chili athumna nganamkaphā otyur riktāda ra̱shakchigat chigata.

²⁹(Kaphung kajuili nathumna khavā khiwui vangkhala? da ina hānga. Chiwui vang aja eina tangda apam chili Bamah kahona).

³⁰Chiwui vang Israel shimkhurli hānglu, Proho VAREna hānga: Navā ngarāwui sākakhamāng thāda sachingralā kala yangkakharing otsak chili shurchingrala?

³¹Aja eina tangda nathumna lemmet kachigat kala nanao mayara ngarāli meili rikkatā hi nathumwui meoma̱ saikora chi eina nathum khalatta sākakhamāngna. Laga nathumna ili ngathingpairalā, O Israel shimkhur? Kachangkhat eina ina kahāngna, ili nathumna mangasanpailakmara, da Proho VAREna hānga.

³²“Nathumna phaningda khalei, ‘Ithumla yurbingwui thāda sāsa, kha̱li khalei yurbingwui thāda thingli ngalungli khorumsa’ kaji chi maungshunglakmara.

³³“Ina kachangkhat eina kahāngna, da Proho VAREna hānga; kaja lungvāt eina ngasoda pangshapa ipāng katingshokta athumwuitungli awunga sāra.

³⁴Ina nathumli mibingwui eina khuishokra kala nathumli chaiyāng kahai kha̱bingwui eina shupkhuira, malungkhavāt eina ngasoda pangshapa ipāng katingshokra;

³⁵kala ina lamhāngli thānvāda chili mai eina mai yangngasungda bichar sāra.

³⁶Egypt ngaleili navā ngarāli ina bichar kasā thāda nathumlila ina bichar sāra,” da Proho VAREna hānga.

³⁷“Ina nathumli khāmshui azingli makānkā ngasakra, kala ina kateokhamāngli zangngasakra.

³⁸Ngakaikashebing, kala ili khayon ot kasābing chilila ina athumna leikasā apamwui eina thānshokra, kha athumna Israelwui ngaleili kazang masamphangmara. Chitharan I PROHOna kaji nathumna theinaora.”

³⁹“Nathumwui vanga, O Israelwui shimkhur, da Proho VAREna hānga: Nathumna ili manganāsangmara jiakha; thuiulu, arui kala hiwui eina thuida ichichāwui meoma̱li akhorumulu, kha nathumwui lemmet kala meoma̱ china iwui katharaming mamakhao ngasakpailuimara.”

⁴⁰“Kaja Proho VAREna hānga, Iwui kathara kaphung, Israelwui kajuiya kaphungtungli, iwui mi Israel shimkhur saikora, athum saikora, ngalei chili ili otram ngatha̱ra, chili athumli ina khuisangmira, kala chili nathumwui khami kala phameikap kaje kachigat kala kathara pha̱kaphayā chi khuisangmira.

⁴¹ Mibingwui eina nathumli shupkhuira, yāmkazatpam kaphungphungwui eina kazipkhuira kala ningyāngkhaung nganamkaphā thāda ina khuisangra; kala yurbingwui mangāli iwui tharkhamathengrin chi nathumwui alungli chitheira.

⁴²Navā ngarāli mira da ngashit kahai Israelwui lamli thanungkhami tharan, nathumna I PROHOna da theikhuira.

⁴³ Chitharan rida zatkasā kala nathumwui otsakna makhao khangasak saikora chi phaningunglaga, makaphā ot sakahahai chiwui vang nathum khalatta ningkachaira.

⁴⁴Kala O Israelwui shimkhur, nathumwui makaphā apong, minamkazā ot chiwui vang maningla, kha imingwui vang sākhami chi kathei tharan, I PROHOna da nathumna theikhuinaora da Proho VAREna hānga.”

⁴⁵PROHOwui tui chi ili rāhānga:

⁴⁶“Miwui naomayara, azingshong namai ngareitāda chishong tamchitheilu kala Negebli makhamayā tui marānlu;

⁴⁷Negebwui ngahongli hānglu, PROHOwui tui nganālu: Proho VAREna kahāngna, Yanglu, ina nathumwui alungli mei sharkāra, kala china thing kharing katheng chuituptāhaora, meiwon chi khamit mavaimara, kala azingshong eina thuilaga atungshong khalei mai saikora china chuira.

⁴⁸Mei hi PROHO ina kasāna kaji mi kachiva̱ theira; mei chi khamit mavaimara.”

⁴⁹Chieina ina hānga, “Iyavo Proho VARE! Athumna ili chāncham hangkhanganao maningmala, jihaowa.”