Read Tangkhul Naga EZEKIEL 22 Bible Online

EZEKIEL 22 - Tangkhul Naga bible

EZEKIEL 22

¹Chili lāngda PROHOwui tui chi ili rāda hānga;

²“Miwui naomayara, mi shaokathata keinungli na bichar masarakhala, na bichar masārakhala? Chithakha awui ningkakachai otsak saikora ali lānmilu.

³Nana hithāda hāngra, Proho VAREna kahāngna: Keinung alungli ashee tākhangasaka kala meoma̱ sākhuida khalatta sākhamāng khangasaka keinung nawui atam rārāsara;

⁴Nana ashee tākhangasakwui vang yonhaira, kala nana sākakhui meoma̱na sākhamānghaida; nawui zimiksho na khalattana nganaisang ngasaka, nawui vang ngarān kahai zingkum rāhaira. Chiwui vang ina nali yurbingna zeikhavai kala ngalei saikorana mana̱shi khavai sāmi kahaina.

⁵Nganaida khalei kala tāda khaleinala rotkhamarāt pemting kahai khikha makankhanā nali mana̱shira.

⁶Yanglu, nawuili khalei Israelwui wungnaobingna kachichāwui pangshap athishurda ashee katā ot sai.

⁷ Nathumwui alungli ava̱ avāli ningkachaida sai, nathumwui alungli kha̱ramkazat milila takzai, marānaobing kala ra̱meinaobingli mashun mayangmimana.

⁸ Iwui kathara otli nana yangkharinghaira, kala iwui sabbathla makhao ngasakhaira.

⁹Nathumwui ngachaili shaothat khavai thara̱kasang mi lei, kala phungreili kashakazā kazā mila zanga, nathumwui alungli phokaphā mila leikapa.

¹⁰ Nathumwui ngachaili avāva̱wui khayāla lāna; kala nawuili kashankharā sha̱naoli ngasokape mila lei.

¹¹Akhana khongnai preiva̱li ngashāma, khangatei kaikhana arihāva̱li ngasopi; kaikhana avāva̱wui naongalāva̱ azarva̱li sākhamāngmi.

¹² Nathumwui ngachaili kaikhana shaothat khavai pheisā zai; khongnainaolila lupāranu, otranu, atār kachungkha khuida tongzai; laga ile malaikhokhaowa, da Proho VAREna hānga.

¹³“Yanglu, chiwui vang eina, nathumna makhamashung eina tongkazā kala nathumwui ngachaili ashee tākahai chiwui vang ina pāng kakaphena.

¹⁴Ina nali kharāk chitharan nathum khāngshapralā, lah nganingshapra̱la? PROHO ina hāngkahaina, kala hi ina sāra.

¹⁵Ina nathumli yurbingwui ngachaili kashamvāserhaora, kala okathui peida chaivāhaora, kaja nathumwui khamakhao saikora ina shimān ngasakra.

¹⁶Nathumwui vang yurbingwui mikyanli I shāt kāra; chitharan I PROHOna kaji theinaora.”

¹⁷PROHOwui tui chi ili rāhānga:

¹⁸“Miwui naomayara, Israelwui shimkhur iwui vang maripaih sāthuihaira; athum katonga, lupāsāla, pithraila, tinsāla, marila, hārsāla sharkha̱li sangda maripaih sāthuiserhaira.

¹⁹Chiwui vang Proho VAREna kahāngna: Khikhalajila nathum maripaih sathuiser kahaiwui vang ina nathumli Jerusalemli kazipkhuira.

²⁰Mina lupāsāla, pithraila, marila, hārsāla, tinsāla sharkha̱li mengkhavai mei eina kahur thāda, iwui malungkhavāt eina ina nathumli kazipkhuira, kala ina nathumli sangda mengngasakra.

²¹Ina nathumli kazipkhuilaga iwui malungkhavātwui mei eina malirorra, kala nathumli chiwui alungli mengtā ngasakra.

²²Lupāsā sharkha̱li mengkhangasak thāda; nathumlila chili mengngasakra; chieina PROHO ina nathumwuitungli iwui malungkakang heikharorna da nathumna theikhuira.”

²³Kala PROHOwui tui chi ili rāhānga:

²⁴“Miwui naomayara, ali hānglu, na malungkhavāt atamli masākhamathā lah kazing marokharora ngaleina da ali hānglu.

²⁵Awui wungnaobinga, kazingkha̱na nirmamānda sā kashai thāda, athumwui mibingwui manglā shaimihaira; athumna aman kasasaka otla lanla ngapaikhuihaira; athumna kachungkhali ra̱mei ngasakhaira.

²⁶Awui pāngmonbingna iwui ain kailaga iwui kathara ot sāmakhaomiserhaira; athum kathar eina khangachā chi mangatei ngasakmana, kala athumna iwui sabbathla matheimimana, chithāhaoda ili athumwui alungli makhao ngasaka.

²⁷Awui alungli khalei wungnaobing, khara̱ngna sā makeikakhanār thāda, ashee tāngasaka, makhamashung apong eina tongkhavai manglā sāshimāna.

²⁸Kala pāngmonbingna ayarli shunu kachar teikhaningda mang machutkhaninga kala khanong sākhaninglaga PROHOna makahahāngla, ‘Proho VAREna kahāngna’ da kakapik tui matui.

²⁹Mibingnala takkazā phama̱kashao otsakla sai; athumna khangazana kala khavātabingli rekhareka, kala kha̱ram kazata mibingwui eina takzāda mayangmimana.

³⁰Athumli masāshimānmi khavai athum eina iwui ngachaili nganingkhame mi akha ina phai, kha ina akhanida masamphangmana.

³¹Chiwui vang ina iwui malungkhavāt athumwuitungli heirorhaira. Iwui malungkhavātwui mei eina ina athumli yumngasakhaira, athumwui otsak athumwuitungli tāra da Proho VAREna hānga.”