Read Tangkhul Naga EZEKIEL 24 Bible Online

EZEKIEL 24 - Tangkhul Naga bible

EZEKIEL 24

¹Kachiko kum, kachāng katharāwui zimiksho katharāthang, PROHOwui tui chi ili rāhānga:

² “Miwui naomayara, zimiksho hiwuichao aming kapikhuilu. Aja zimik Babylonwui awungana Jerusalem khuikhavai rākuinamhaira.

³kala ngakaikashe shimkhur hili tamkhuikapai khararchān eina hithāda hānglu, Proho VAREna hithāda hānga: Ham pāngkālu, tara̱la sanglu;

⁴kala sāmarim aphibing chi chili sanglu, khamathā amarimbing, apheisā kala apāngsā; shaikaphā ara̱kui eina chipemlu.

⁵Asā phāmeikap kaji yaonao khuilu, thing phāsanglaga sā chi hānglu, ara̱kuila sāsanglu.”

⁶“Chiwui vang Proho VAREna hithāda hānga: Ashee katā keinung, maripaih kashutla makatā ham chi kalākashi ngasāranu! Chiwui eina sā malim chi makapangla amalim ava̱va̱ khuishoklu.

⁷Kaja ana tākhangasak ashee chi aruila awuili leichingda lei; ana ngaleili heitāda zithui khavai masāla tāngpat kahai lunghārtungli heirora.

⁸Malung thuida athut khuikhavai ana ashee heiror kahai chi mathumpai khavai ina lunghār chiwuitungli pama.”

⁹“Chiwui vang Proho VAREna hānga: Ashee tākhangasaka keinung chi kalākashi ngasāranu! Inala rikkhavai thing kachungkha phāsangra.

¹⁰Thing kachungkha pongsanglu, mei sākalu, sā chi mathālak eina hānglu, kala ara̱ chi heishoklu, kala ara̱kuibing chuitā ngasaklu.

¹¹Chiwui thili ham chi khamasai eina sākhavai meithātungli phumkālu, chiwui pithraila chuira, chiwui khamakhaobing chi chili mengsangra, chiwui maripaihla chuitāra.

¹²Aremali ina chotkachāngna; maripaih shātok kahai chi meinala marontārarthuwa.

¹³Chiwui maripaih kapai chi nawui sokhamasapna. Nawui khamakhao chi ina sāmathākhui khavai sai, kha nawui khamakhao matharkhuipaithuwa; iwui malungkhavāt nawuitungli manemranglakha eina tangda na masāmathākhuipaimara.

¹⁴PROHO ina hangkahaina, hi ungshunglakra, ina chi sālakra, ina mangalanlakmara, ina mahailakmara, ining mangacheilakmara, nawui kasākhavā otsak athishurda bichar sāra, da Proho VAREna hānga.”

¹⁵PROHOwui tui chi ili rāhānga:

¹⁶“Miwui naomayara, yanglu, nawui mikli khangayam chi ina kashuirak eina khuithuimihaora, chithālala nana masifamara kachapla machapmara, nawui chāra̱la malongtāmara.

¹⁷Sifalala, akhon mashokmara; kathiwui vang makhanangmara. Nawui kuitei teilu kala pheihopla sanglu, nakhamor makatimlu, lah sikafabingwui zāt mazālu.”

¹⁸Chiwui vang eina ina mibingli ngathorshong tui hi hāngchithei, kala ngazinshong ipreiva̱̱ thihaowa. Kala akhama kathā ngathorshong ili kakaso chiwui athishurda ina sai.

¹⁹Kala mibingna ili hānga, “Nana hithāda ithumli kasā hi ithumwui vang kakhalat khi leikhala?”

²⁰Chieina ina athumli ngahānkai, “PROHOwui tui china ili rāhānga:

²¹Israel shimkhurli ahānglu: Proho VAREna hithāda hānga: Yanglu, nathumwui lāngso khavai pangshap, mikwui khangayam kala nathumwui manglāna kakahao iwui kathara shim chi ina makhao ngasakta, nanao ngarā sha̱naola mayarnaola nothā kahaibing chi raighai eina chithitra.

²²Kala ina sākahai thāda nathumna sāra; nathumwui morchai makatimara, lah sikafabingwui zātla mazāpaimara.

²³Nathumna kuiteila teira, pheihopla sangra; nathumna masifa lah kachapla machapngachāmara, kha nathum khayonkhamāngwui alungli akha eina akha ngahui ngarokra.

²⁴Chiwui vang eina Ezekiel hi nathumwui vang machut akha ngasāra; ana kasāsā saikora nathumla sāra. Hi ungkashung tharan I Proho VAREna da nathumna theira.”

²⁵“Kha na, miwui naomayara, athumwui raipan, athumwui khamathān khamareo, mikwui khangayam, athumwui ningwui kakahao, anaongarā sha̱nao mayarnao, ina khuikathui tharan,

²⁶chithanghon yāmkazat mi akhana chānpao chi nali hāngkhavai rāra.

²⁷Chithang zimik nakhamor makāda yāmkazata chili chān ngazekra, khak mangasha̱luimara. Chithāda nana athumli machutkhui khavai ngasāra; kala I PROHOna da nathumna theikhuira.”