Read Tangkhul Naga EZEKIEL 25 Bible Online

EZEKIEL 25 - Tangkhul Naga bible

EZEKIEL 25

¹ PROHOwui tui chi ili rāhānga:

²“Miwui naomayara, Ammonnaowuishong ngareivāda athumli makhamayā tui marānmilu.

³Ammonnaobingli hānglu, Proho VAREwui tui nganālu: Proho VAREna hānga, Khikhalajila nathumna iwui kathara shim sakhamakhao tharan, Israelwui ngalei ramcho kahai tharan, kala Judahwui shimkhur raithā kahai tharan ‘Aha!’ da kahāngwui vang;

⁴ina zingshoshongwui mibingwui pāngli nathumli horsangkhamina; kala athumna nathumwui ngachaili shim rāsāpamda nathumwui athei athumna shaimihaora, kala nathumwui seina̱la mangmihaora.

⁵Ina Rabbah ut homphung sāngasakra, kala Ammonnaobingwui keinung yaohomphung sāngasakra. Chieina I PROHOna da nathumna theikhuira.

⁶“Kaja Proho VAREna hithāda hānga: Khikhalajila Israelwui ngaleili mamayāmada nathumna pāng kakaphewui vang kala phei kakathangwui vang,

⁷yanglu, iwui pāng ina nawuitungli katingshokhaira, nali yurbingna ngaponkakhui ngasā khavai horsangmira; kala ina nathumli mibingwui eina katatmihaida ngaleiwui eina shimān ngasakra; Ina nathumli sākazamhaora. Chieina I PROHOna da nathumna theikhuira.”

⁸ “Proho VAREna hithāda hānga: Khikhalajila Moabna, Yanglu, Judah yurla khangatei yur thāserpapama da hānghaoda,

⁹chiwui vang Moabwui zingshoshong khalei khamathā keinung Beth-jeshimoth, Baal-meon kala Kiriathaim hibing hiwui khāmong shomihaora.

¹⁰Ammonnaobingli ngasoda hibing hi zingshoshongwui mibingli ina khuikhavai mira, chithāda yurbingwui alungli athumli maphaningungluimara,

¹¹kala Moabwuitungli ina bichar sāra. Chitharan I PROHOna da athumna theikhuira.”

¹² “Chithāda Proho VAREna hithāda hānga: Khikhalajila Edomna Judah shimkhurli athut khuingairareo kala sāshilak eina mamayāmada athut kakhuiwui vang,

¹³Proho VAREna hānga, Edomwuitungli ipāng katingshokra, kala chiwui eina mila sha̱keila katatmihaora, kala ina chi ramcho sāngasakra; Temanwui eina thuilaga Dedan vāpeida athum raighai eina thira.

¹⁴Kala Edomnaobingli iwui mi Israelnaobingwui pāng eina iwui athut hāngsangra, kala Edomli athumna iwui malungkhavāt kala iwui malungkakang athishurda Edomli sāmira; chieina athumna iwui athut kakhui theira, da Proho VAREna hānga.”

¹⁵ “Proho VAREna hithāda hānga: Khikhalajila Philistinenaobingna athut khuingairareo kala ningkhāchir eina yangkashi katang mavaila athut kakhuiwui vang;

¹⁶Proho VAREna hānga, Yanglu, Philistinenaoli ipāng katingshokra, kala ina Cherethbingli katathaora, kala ngayipheili khalei kateibing sākazamserhaora.

¹⁷Malungkanglak kahai hāngkhamachin eina ngasoda athumli kasaka athut khuira. Ina athut kakhui tharan I PROHOna da athumna theikhuinaora.”