Read Tangkhul Naga EZEKIEL 26 Bible Online

EZEKIEL 26 - Tangkhul Naga bible

EZEKIEL 26

¹ Kum tharāda kharewui kachāng chiwui kharethang, PROHOwui tui chi ili rāhānga:

²“Miwui naomayara, khikhalajila Jerusalemwui pongli Tyrena, ‘Aha, mibingwui ngavei kaihaira, iwui vang shomihaira, ā ara sāshimānhaoda I mathun khavai sāra,’ da kahāngwui vang,

³Proho VAREna hānga: Yanglu, ina mamayāmana, O Tyre! ngayi khangaphao thāda nali ngarar khavai ina yur kachungkha khuirāra.

⁴Athumna Tyrewui ngaveila, raikānphungla sakhaimihaida nawui leithaola seoshokmihaora, lunghār thāda haimira.

⁵Ngayilungli khaih kaphābingna khailan hārkhavai apam ngasāhaora; kaja ina hānghaira da Proho VAREna hānga; kala ali yurbingna ngaponnganao khavai sāra;

⁶kala anao ngalāva̱bing kha̱lungli raighai eina thira. Chitharan I PROHOna da athumna theikhuira.

⁷“Kaja PROHOna hithāda hānga: Yanglu, Tyreli ngarar khavai atungshongwui eina, Babylonwui awunga, awungabingwui awunga Nebuchadrezzarli chihorāda, sigui, siguigari, sigui katonga raimi, shānda makakhui shipai kachungkha thānrāra.

⁸Kayāngkhareili nanao ngalāva̱bingli ana raighai eina shātthatra, mayāmshok khavai kuimareida ngalei thongkāda ngaveiphinhaora.

⁹Nawui raipan phākho sākazam khavai kala ngahā eina nawui raikānphung sātekmi khavai chihorāra.

¹⁰Awui sigui chungnāhaida keinung chifana mikmai matheimara; ana nawui ngaveili rākazang tharan, ngayāng kahaiya keinungli kazang thāda, ana nawui ngaveili rākazang tharan, sigui raimiwui, siguigariwui akhon china ngavei nganukyikhaora.

¹¹Nawui chānrei kachiva̱ awui siguina pemtaihaora, ana nawui mibingli raighai eina shātthatra; kala nawui khamakanga pakra̱la pitāserhaora.

¹²Nawui lan kala nawui leihkhalon ot saikora ngaponkhuira, athumna nawui ngaveila sakhaimihaida nawui khamathā shimbing sakhaimihaora; thingla, ngalungla, ngaleila tara̱lungli horsangmihaora.

¹³ Kala ina nawui nganākhangai laa ngasām ngasakhaora, kala mazuila makhong ngasakluimara.

¹⁴Ina nali lungzilunghārmāng sāmihaida khaih kaphābingna khailan phuikhavai sāra; nawui keinung masākāluilakmara kaja PROHO ina hāngkahaina da Proho VAREna hānga.

¹⁵“Proho VAREna Tyreli hithāda hānga: Nana mayuithuda, khamā kaza̱bingna ringkhangā, kathibingwui akhon shālaga ngayipheili khaleibing manganukmarala?

¹⁶ Chieina ngayi ngalemli khalei wungnaobing wungpamkhongwui eina tungda wungnaosāri raihaida kala aphor phorkasang kachon raihaida kathirri eina pamra; athumna ngaleitungli pamda mikkhayip kachida kathirra, kala nali theilaga ngacheeyikhaora.

¹⁷Kha nawui vang malung ringda chapngachāra: kala nali hāngra, ‘Yireiwui eina kathāda shimānhao, O aming kazata keinung, pangshapa shamadru sākasā, na kala nawui mibing, ramrei kachida ngachee khangasaka sākasā na.

¹⁸Ara nawui kashimān zimiksholi yikuirambingna kathira; mha, na kashimānwui vang yikuiram saikora matakhakhaiya.’

¹⁹“Proho VAREna hithāda hānga: Ina nawui keinung sākathānmi kahai tharan, mi maokkathui keinung thāda nali shimān ngasakthang, ina nawuitungli kathuka kala hakkhamahā tara̱na tumkhangasak tharan,

²⁰ina nali Chomli zangki kajebingli achālakhawui mibingli ngasoda horsangra, kala Chomli tāzang kahai athumli ngasoda, achālakha ngayang kahai apam, kazeiramli okthui ngasakra, chithāda kharingabingwui ngachaili maokthuiluipaimara.

²¹Hukchihaklak eina khangachang ina khuirāra, na kaho maleiluimara; nali phālala masamphangluimara da Proho VAREna hānga.”