Read Tangkhul Naga EZEKIEL 27 Bible Online

EZEKIEL 27 - Tangkhul Naga bible

EZEKIEL 27

¹PROHOwui tui chi ili rāhānga:

²“Ara miwui naomayara, Tyrewuitungli chapngachālu,

³kala, shamadrupheili kapambing, ngayiphei kachungkhali leihkhalona Tyreli hānglu, da Proho VAREna hānga: O Tyre, nana I khamathā kākashungana da hānga.

⁴Nawui thariva shamadrulungli khaleina; nali sakakābingna mathā khangasakna.

⁵Nawui matang chikhai, Senirwui eina sākhuisera; athumna Lebanonwui eina cedarthing akha khui, nawui marikhongwui akhoka pakra̱ sākhavai.

⁶Bashanwui shirimthing eina marikhong huikhavai sākhui; Cyprus ngayipheiwui matangthing eina chonnar sai, mafahā sāsanga.

⁷Egyptwui phorrei phorkasang kachon eina sihur sai, nawui philān sāvai. Elishah ngayipheiwui khamenga kazing machu kala hungreoseo kahai kachon nawui kachonshimna.

⁸Sidonnaobing eina Arvadnaobingna nawui marikhong hui; Zemerwui kathethembing marikhong kashireibingna.

⁹Gebalwui khararnaobing, kathemthembing nawuili lei, marikhong kakakai athumna saphinmi, ngayili khalei marikhong ot kasābingla nawuili leisera, nawui otbing ngatha̱mi khavai.”

¹⁰“Persia, Lud kala Putwui mi kachungkha nawui raimi sai; athumna chāngvei phunga, kuiropla ropa, athumna nali mai kāngasaka,

¹¹Arvad eina Helechwui mina kuimareida nawui phākholi pama, kala Gamadwui mina raikān pama, nawui phākholi athumna chāngvei hokthānghailaga nawui tekhamatei kāshung ngasaka.”

¹²“Nawui lan, lupāsā, mari, tinsā, hārsā kachungkha khaleiwui vang ot eina ngatha̱ khavai Tarshishwui eina leih khalon rai.

¹³ Javan, Tubal, kala Meshech athumna nali leih sāruma; nawui otwui vang athumna mi eina kala pithraiwui khorkhong eina ngatha̱ya.

¹⁴Beth-togarmahna sigui, raisigui, kala gadhā kathā eina nawui ot rāngatha̱ya.

¹⁵Rhodewui mibingla nali leih sāruma; ngayiphei kachungkha nawui leihngapha̱laka, nawui ot ngatha̱khui khavai athumna mafahā kala ebony thing khuirai.

¹⁶Nawui ot kachungkha khaleiwui vang Edomnala leih rākasāna; nawui aman kasaka ngalung, khamenga kachon, phorrei phorkasang ot, khamanaka kachon, changjeekor, agate eina ngatha̱khui.

¹⁷Judah eina Israelwui ngaleina nali leih sai; athumna nawui kehu, olivebing, khaorāthei, khuira̱, thao, kala balm rāngatha̱ya.

¹⁸Nawui lan kala otyur kachungkha khaleiwui vang Damascusnala Helbonwui atheira̱, sahā kachara,

¹⁹Uzalwui drakhāra̱ eina nawui ot rāngatha̱khui; mari, cassia, kala camulus eina nawui ot rāngatha̱ya.

²⁰Dedanna sigui sāpān sākhavai kachon rāyorsanga.

²¹Arabia kala Kedarwui wungnaobing nawui khamataiya yao, yaonao, me yorkasangabingna.

²²Sheba eina Raamahwui mibingna otyur khamathāthā, aman kasaka ngalung, sinā hikathā eina nawui ot rāngatha̱da leih khalon ot sai,

²³Haran, Canneh, Eden, Asshur, kala Chilmad athumla nawuili leih khalon rai.

²⁴Athumna kashankachon khamathāthā, kazing machu aphor phorkasanga, awon yekkasanga, kala maruikazazak kahai chonnarham hikathāwui leih khalon sai, kala nawuili rāyorsangsera.

²⁵ Tarshishwui marikhongna nawui ot yorkhavai phungmi. Nawui shamadru ngalei otna pemtinghaira.

²⁶Nawui marikhong kahuibingna tara̱ khangaphaoli huivāda zingshoshongwui masina marikhong ngayilungli ngaphumhaira.

²⁷ Nawui lan, mari ot thongthāng marikhong kasingbing kala kashireibing, kasemabing, ot yorkhamebing, kala nawui raimi nali khangaso saikora, nawui ngalemli khalei nali khangasobing na shimānthang shamadrulungli ngaphumserhaira.

²⁸Nawui marikhong kashireibingwui ringkhangā shālaga ngalemli khalei ngaleibing nganuka.”

²⁹“Kala huikazat athum hupta marikhongwui eina yāmtāsera. Kasingbing kala kashireibing ngayipheili nganinga

³⁰nawui vang sifaya kala kachapla chapa. Athumna kuili hotlā neoda chifali ngakhora;

³¹athumna nawui vang kui sitai, kala bora ngavai, kala malungringlak eina nawui vang chapngachai.

³²Malungringlak eina nawui vang athumna chapngachāda hānga: Tyre kathā shamadrulungli khipāli shimān ngasakhairakhala?

³³Nawui thongthāng shamadruwui eina khuikharā tharan mi kachungkhali ringphā ngasaka; nawui sorkhangasai ot kala lan china okathuiwui awungabingli shāngngasaka.

³⁴Kha ara shamadrulungli ngaphumda kathukali zanghaira; nawui otyur saikora, marikhong kahuibingla nali ngaphumrumserhaira.”

³⁵“Yireipheili khaleibingna nali theilaga ning saza̱laka; kala athumwui awungabingnala ngacheenahaida mai ngareithuihaowa.

³⁶Mibingwui ngachaili leih khalonbingna nali kasirora; na hukchihālak eina ngachanghaira kala mangakarluimara.”