Read Tangkhul Naga EZEKIEL 28 Bible Online

EZEKIEL 28 - Tangkhul Naga bible

EZEKIEL 28

¹PROHOwui tui chi ili rāhānga:

² “Miwui naomayara, Tyrewui wunganaoli hānglu, Proho VAREna kahāngna: Nawui ningna langsohaoda, nana ‘I vare akhana, shamadrulungli varebingwui pamli pama’ da hānga; kha na mikumona, vare maningmana nana nakhalatta vare thāda thangmeiya da phaninglala.

³Mha, Danielli na thangmeimei; nawui eina ngathum kahai khikha maleimana,

⁴nawui thangmei kala theikakhui eina nana lan kazipkhui, kazipshimli nana sinā kala lupāsā kazipsanga;

⁵leih khalonwui pongli thangmeihaoda lan kachungkha kazipkhui; kala chiwui vang nawui ningna langsoi—

⁶“Chiwui vang Proho VAREna hānga: Nala vare akha thāda thangmeiyada kaphaningwui vang,

⁷yanglu, yurwui ngachaili sāshimeikap kaje makatheiya kha̱mibing ina khuirāra; kala athumna nawui thangkhameiwui khamathā chili raighai singda ngararra, kala nawui khayā sākhamāngra.

⁸Athumna Chomli horsangra, na chili zangthisangra, shamadrulungli.

⁹Nali shaokathatbingwui mangāli, nali pāng kakā khamā za̱khami athumwui miktāli, vare maningla mikumosālala ‘I varena’ da hāngfarala?

¹⁰Ahui marimkashokawui kathi thāda na, yur kateibingwui pāngli thira; kaja ina hānghaira, da Proho VAREna hānga.”

¹¹Chili lāngda PROHOwui tui chi ili rāhānga:

¹²“Miwui naomayara, Tyre awungawui vang chapngachālu kala hānglu, Proho VAREna hānga da hānglu: Nava thangkhameiwui kala kākashungwui pongli shoi khutop akha sāsai.

¹³Varewui yāmgui Edenli pamsai; aman kasaka ngalungyur saikora nawui sāri ngasāsai, carnelian, topaz, kala jasper, chrysolite kala onyx, sapphire, carbuncle, kala emerald saikora nana sināli ruksangnganaowa. Nali sāthang chibing chi nawui vang sākahaina.

¹⁴Tharchisinmi kahai yangkhame cherub akhali nali mayon ngasaka; na Varewui kathara phungreili leisai meiwui ngalungtungli nana zātsai.

¹⁵Nali sākhuithang eina thuida shāt makāsalakmana, khayonkhamāng ot masāranglakha eina tangda.

¹⁶Leih sālaga kashāng eina nana sākashi ot sai, kala nana moreila sai; chiwui vang eina Varewui phungrei eina, makathara ot thāda nali khuishok kahaina, mayonkhame cherubna nali ngalung meipamwui eina kashamhaowa.

¹⁷Nawui khamathāwui vang nana langsoi, nawui tekhamateiwui vang nawui thangkhamei shimān ngasaka. Awungabingna nali theikhavai ina athumwui mangāli nali konglui khangasakna.

¹⁸Mikhanama leih sāda morei kachungkha kasāwui vang, nawui kathara shim nana makhao ngasaka; chiwui vang ina nathumwui alungli mei shokngasak kaji china nali chuiya, kala ina nali katheibingwui mangāli hotlā sākhangasakna.

¹⁹Nali kathei athumna ning khananglaka; na hukchihālak eina ngachanghaira, mathuirarluilakmara.”

²⁰ PROHOwui tui chi ili rāhānga:

²¹“Miwui naomayara, Sidonshong ngareivāda makhamayā tui marānlu,

²²kala hithāda hānglu, Proho VAREna hānga: Yanglu, O Sidon, ina nali mamayāmana; iwui tekhamatei nathumwui alungli chitheira. Ina ali bichar kasā tharan; iwui tharkhamatheng awui lungli theikhangasak tharan; I PROHOna da nathumna theira;

²³kaja ina chāmrei shirātrāra, awui chānrei kachida ashee tāra; kala apam kuimareida raighai eina thiserra. Chieina I PROHOna da athumna theinaora.”

²⁴“Kala Israel shimkhurwui vanga athumli zakshilāk eina kasā kala khamashātabingwui mangāli, lenghuina mapharikluimara, ka̱shātna marungluimara. Chitharan I Proho VAREna da athumna theikhuira.”

²⁵“Proho VAREna hithāda hānga: Ina Israel shimkhurli, athumna yāmkazatpam kachiva̱wui eina kazipkakhui tharan, kala athumli iwui kathar chikathei tharan, iwui rao Jacobli mikahai athumwui lam chili somluira.

²⁶Kala athumna ning nganungkhung eina panda shim sāra, lui vāsangra. Athumli zakshilāk eina sāda mana̱kashi khongnainaobingli ina bichar kasā tharan athumva ningnganungkhung eina pamra. Chitharan I athumwui Proho VAREna da athumna theikhuira.”