Read Tangkhul Naga EZEKIEL 29 Bible Online

EZEKIEL 29 - Tangkhul Naga bible

EZEKIEL 29

¹ Kum katharā kachāng katharāwui zimiksho tharāda kakhanethang, PROHOwui tui chi ili rāhānga:

²“Miwui naomayara, Pharaohwuivāk mai ngareivāda ali kala Egyptwuitungli marānmilu;

³kala hānglu, Proho VAREna hānga: Yanglu, Egyptwui awunga Pharaoh, ina nali mamayāmana. Awui kongli khalei, ‘Nile kong ina sakhuiya, chi iwuina’ da kahānga pangshap khalei dragon.

⁴Nali ina khānghui eina namakhāli huikhuira, kala khaihbingna nawui ahorli hokthāngra; kala hokkathāng khai saikora chili ngasoda nali tara̱wui eina khāngshokra.

⁵Nalila, kongkhaihbing chilila lamhāngli horhaida ngalei kathengli ina shireohaira, kachifala machifamara. Ramsā kala yongkazat vānaobingna nali shaikhavai ina mikahaina.

⁶ Chieina Egyptnao saikorana I PROHOna da theikhuira.” “Khikhalajila Israel shimkhurwui vang nathum titi khāmshui sāthuihaoda,

⁷athum singakha tekhaida athumwui yartui saikora shirkhai; kala athumna nali zungakha tekhaida kashan zangngapoi;

⁸chiwui vang Proho VAREna kahāngna: Yanglu, ina rai ngarar ngasakta mila, sha̱keila chithithaora;

⁹kala Egypt ngalei hi khikha masā khavai ramcho sāngasakra. Chitharan athumna I PROHOna da theikhuira. “Kachiwui vangkhala kaja, ‘Nile kong ina sākhui, iwuina’ da nathumna hānga.

¹⁰Chiwui vang, yanglu, ina nathumli, nathumwui kongli mamayāmana; kala Egypt ngalei hi, Migdol eina thuilaga Syene vāshung, Ethiopia vāshungda, khikha masā khavaia ramcho sāngasakra.

¹¹Mikumo khipākha phei marāchonsangmara, kala sā eina tangda marāchonmara; kum hangmati khikha maokthuimara.

¹²Ngalei saikorali ramcho kahai lam saikorawui ngachaili Egypt ngalei ramcho ngasakra; kala sākathān kahai keinung saikorali ngasoda kum hangmati ramchora. Ina Egyptnaobing yur kateibingli chaiyāngmihaira.”

¹³“Proho VAREna hithāda hānga: Kum hangmatiwui thili, yur kateiwui ngachaili chaiyāng kahaia Egyptnao saikorali ina kazipkhuiluira;

¹⁴kala athumna rida pamkhavai Pathros ngalei chili khuiungmida Egyptwui shimlui ina hanmiluira; kala khangazana wungram akha sāda okthuira.

¹⁵Ngazanmeikap kaje wungram ngasāda yurbingwui ngachaili khayā makāmilakmara, kala ina yurbingwuitungli mamungluilak khavai athumli teongasakhaora.

¹⁶Kala Israelwui shimkhurna, rida athumli ngasoda morei kasāsā chi phaningunglaga athumli machihānluimara. Chieina I PROHOna da athumna theikhuira.”

¹⁷Zingkum maga̱da kashine kum, kachang kharewui kharethang, PROHOwui tui chi ili rāhānga:

¹⁸“Miwui naomayara, Tyreli ngarar khavai Babylon awunga Nebuchadnezzarna raimi kachungkhali chotchānglak eina ot sāngasaka; kui saikora simihai kala yartui saikora ngahaka, chithālala a kala awui shipaibing chotman Tyrewui eina khikhala masamphangmana.

¹⁹Chiwui vang Proho VAREna hānga: Yanglu, Babylonwui awunga Nebuchadnezzarli Egypt ngalei ina mihaora, kala athumna lan, ot ngaponkhuida raimibingwui talop sāvaira.

²⁰Ina Egypt hi ali mikahaina kaja, ana iwui vang ot samida awui chotman khamina da PROHOna hānga.

²¹“Chithang zimiksho ina Israelwui shimkhur eina angaji akha shokngasakra, kala ina athumwui alungli nathumwui morchai shomira. Chitharan I PROHOna da athumna theira.”