Read Tangkhul Naga EZEKIEL 30 Bible Online

EZEKIEL 30 - Tangkhul Naga bible

EZEKIEL 30

¹PROHOwui tui chi ili rāhānga:

²“Miwui naomayara, marānlu, kala hānglu; Proho VAREna hithāda hānga: Iyavo, ungshungkachanghaira da sifalu!

³Atam ungshungrāli, PROHOwui atam nganaihaira; tangkhamanga zimik ngasāra, yurbingwui kashimān atamna.

⁴Egyptli rai rātara, Ethiopia sipsāra; Egyptli mibing thikasang, lan ngaponkakhui; shimphunga nganukyik kahai tharan,

⁵“Ethiopia, Put, Lud, Arabia katonga, Libya kala mijang kasā athum saikora, athumli ngasoda thirumra.”

⁶PROHOna hithāda hānga: “Egyptli kahuibing thira, awui lāngsot pangshap kongluitāra; Migdol eina haophoklaga Syene eina tangda raighai eina thiserra, da Proho VAREna hānga.

⁷Okathuiwui ramkachobing thāda Egyptla ramchohaora, kala sākathānmi kahai keinung thāda, awui keinungbingla sākathānmihaora.

⁸Egyptli mei thotkatā tharan, ngachonkhamebingli chithit kahai tharan, I PROHOna da athumna theikhuinaora.”

⁹“Chithanghon yansāngsa̱ eina khalei Ethiopianaoli iwui eina kathaka paome akha ngachee ngasak khavai chihora; Egypt shimānthang khangachee-khangachā athumwuitungli rāra; kaja, yanglu, chi rāhaira!”

¹⁰“Proho VAREna hithāda hānga: Babylonwui awunga Nebuchadrezzarwui pāng eina; Egyptwui lan ina kānmi ngasakra.

¹¹Miyurbingwui sāshimeikap kajipāli awui mibingli ngasoda, ngalei sāshimānmi khavai chihorāra; kala athumna Egyptli raighai ngawutra kala kathinguna ngalei pemra.

¹²Kala Nile kong ina theng ngasakhaora, kala ngaleila sākashe mili yorsanghaora; ina yur khangateiwui mi chihosangda ngalei machomiserhaora; PROHO ina hāngkahaina.”

¹³“Proho VAREna hānga: meoma̱bing ina sākathānra, Memphiswui meoma̱ ina shimān ngasakra, Egypt ngaleili wungnao maleiluimara; chithāda ina Egypt ngaleili khangachee sangmira.

¹⁴Pathros ina ramcho ngasakra, Zoan mei sa̱tāra, kala Thebeswuitungli bichar sāra.

¹⁵Egyptwui khangazipa raipan Pelusiumwuitungli ina iwui malungkhavāt chihotāra, kala Thebeswui mibingli katathaora.

¹⁶Ina Egypt mei sa̱tāra, Pelusium chotchirhaora; Thebes vākkhamhaida ngaveila sākhaimiserhaora.

¹⁷On eina Pibesethwui yaronnaobing raighai eina thira, sha̱naobing tukthuiserhaora.

¹⁸Tehaphnehesli ngashun tangmanghaora, Egypt wungram ina sakakhai tharan; awui langkaso pangshap ngalathaora, ali muiyāna ngachuiphinhaora; kala awui naongalāva̱bing tukthuiserhaora.

¹⁹Chithāda ina Egyptwuitungli bichar sāra. Chieina I PROHOna da athumna theikhuira.”

²⁰Zingkum tharāda kharewui kachāng kharewui zimiksho kashinethang, PROHOwui tui chi ili rāhānga:

²¹“Miwui naomayara, Egypt awunga Pharaohwui pāng ina sātekmihaira; kala yanglu, raighai masingthuklui khavai chonshi eina neilaga khamā raikhavai masāmimana.

²²Chiwui vang Proho VAREna hānga: Yanglu, Egyptwui awunga Pharaohli ina mamayāmana, awui pāng kakanga kala khamākaza̱ khanini chi sātekmihaida raighai apāng eina tātung ngasakra.

²³Ina Egyptli yurbingwui ngachaili kala ngalei apam kachiva̱li chaiyangvā ngasakra.

²⁴Kala ina Babylon awungawui pāng pangsang ngasakra kala iwui raighai apāngli sangmira; kha ina Pharaohwui pāng sātekmira, kala ana khamā maphungkhararra miwui ringkhangā thāda ringāra.

²⁵Ina Babylon awungawui pāng pangsang ngasakra, kha Pharaohwui yang kanhaora, chieina athumna I PROHOna da theikhuira. Ina Babylonwui awungali iwui raighai kachisin tharan, ana Egyptli rai sāra;

²⁶kala ina Egyptnaobingli yurbingwui ngachaili kala ngalei apam kachiva̱li chaiyāngva ngasakra. Chitharan athumna I PROHOna da theikhuira.”