Read Tangkhul Naga EZEKIEL 31 Bible Online

EZEKIEL 31 - Tangkhul Naga bible

EZEKIEL 31

¹Zingkum tharāda kharewui, kachang kakathumawui zimiksho kharethang, PROHOwui tui chi ili rāhānga:

²“Miwui naomayara, Egyptwui awunga Pharaohli kala awui mi saikorali hānglu: Nawui khangam thāda khipā leikhala?

³Yanglu, ina Lebanonwui cedarthingli nali chānsam sāra; khamathā thingphāng, juimatailaka, aton kazing kāzoka, ngahong thāda khaya̱ sāmi.

⁴Tara̱na nganaoda juilak eina phora, phorkhavai apamli ura̱ shokta kong longngasaka, ngahongthing saikorali aza̱sera.

⁵Chithāda tara̱ kachungkha samkaphangwui vang, aphāngla kahahak asānla sānglaka; ngahongwui thing saikorali juimeithui kaje thing ngasai;

⁶ Khamasaili yongkazata vānaobingna aphāngli athip sai, thingpheili sāna anao rāpharāsanga; kala awui khaya̱li yur kahakbingna okthui.

⁷Angayungna kathukva̱li zangda tara̱ kachungkha samphanga, kala aphāng kasangsangva̱ kāda, chiwui hakkhamahā chi mathālaka.

⁸ Varewui yāmguili khalei cedarthingna chili mangaphan, firnala[2] aphāng matimmeirar; sycamore thingla khikha mangatampai; Varewui yāmguili khalei thing chiwui khamathā thāda mazanglakmana.

⁹Chiwui aphāng katonga ina mathālak eina sāmi, kala Varewui yāmgui Edenli khalei thing saikorana kahaowa.

¹⁰“Chiwui vang Proho VAREna hithāda hānga: juishun eina phorda muiyā kākazokwui vang, awui ningli langsohaoda,

¹¹ina miyurbingwui ngachaili pangshap khaleiya chiwui pāngli horsangmira; kala awui makaphā makhayā athishurda ana sāmira. Ina horsangmi kahaina.

¹²Sāshimeikap kaje miyur khangateina ta̱teklaga horhaora. Kaphunglila tampāklila aphāngnaobing horkathānvāhaora, kala aphāng kahahak chila kongpamli teksangra, kala okathuiwui mikumona chiwui khaya̱pam eina thuiserhaora.

¹³Ngayāng kahai chiwui aphāng ngachachaili sāyurna rāpira, vānaona rāngayinra.

¹⁴Hiwui eina thuida tara̱pamwui thingrong kajuiya muiyā makāzokluimara; kaja tara̱ zimkhamanga thing khangachā chiyākha majuiluimara, athumli chithit kahaina, kazeikhurli zangkahai kathinaoli ngasoda tangmangting kahai apam chili pamrumra.”

¹⁵Proho VAREna hithāda hānga: “Kathewui ramli khavā tharan kathuka china sifara, kala kong thenghaida tara̱ kachungkha malongmara. Lebanonli ina tangkhamang eina shaksāmira, kala luili khalei thingrong saikora chiwui vang eina ngahuihaora.

¹⁶Ina Chomli khavā athumli ngasoda Kathewui ramli horkasangwui akhon shālaga miyurbing nganukra; tara̱na khanganaowa Edenwui thingrongbing, mathāmeikap kaji kala phāmeikap kaji Lebanonwui thingrong saikora kazeiramli ringphāra.

¹⁷Raikhai eina thikahai athumla Kathewui ramli zangra; mha, yurbingli ngasoda chiwui khaya̱li okathuibing shimānserra.

¹⁸“Edenwui thingrong ngachaili hakkhamahāliranu, tekhamateiliranu, na khipali ngaruikhala? Edenwui thingrongbingli ngasoda nalila kazeiramli vāngasakra; ahui marimkashokbing kala raighai eina kathibingli nana ngasoda pamra.” Hi Pharaoh kala awui mi katongana da Proho VAREna hānga.