Read Tangkhul Naga EZEKIEL 32 Bible Online

EZEKIEL 32 - Tangkhul Naga bible

EZEKIEL 32

¹Zingkum tharāda kakhanewui, kachang tharāda kakhanewui zimiksho kharethang, PROHOwui tui chi ili rāhānga:

²“Miwui naomayara, Egyptwui awunga Pharaohwui vang chapngachāda ali hānglu: Na khalatta yurbingwui ngachaili kazingkha̱ thāda phaninga, kha nava shamadruwui dragon kathāna; nawui kongli shokzatta, tara̱ naphei eina makhui ngasaka, kala athumwui kong nganamshi ngasaka.

³Proho VAREna hithāda hānga: Mi kachungkhali ngasoda ina khailan horsangra, kala nali ina iwui khailan eina horkhuira.

⁴Kala ina nali ngalei kathengli shireohaida, lamhāng khamasaili horhaora, kala yongkazat vānaoyur nali rāpa̱ ngasakra, kala ina okathuili khalei sāyurli rāshai ngasakra.

⁵Ina nawui asā kaphunglila yaovāserra, tampākbinglila nawui kathingunna pemra.

⁶Ina ngalei kala phungreibing eina tangdalila nawui longkazat ashee eina yingasakra; tara̱papamlila chipemvā ngasakra.

⁷ Nali ina shimitthang, kazing sākhammihaida; athumwui sirāla mahor ngasakmara; ina zimikli muiyā eina fakhamhaora, kachāngna awui kahor mamimara.

⁸Kazingramwui kahor saikora nawuitungli ina tangmang ngasakra, kala tangkhamang nawui ngaleili sangmira, da Proho VAREna hānga.

⁹“Nana makathei ngalei, kala miyurbingwui ngachaili tukkhavā tharan mi kachungkhawui ning ina ngatha̱ ngasakra.

¹⁰Iwui raighai eina sākachithei tharan mi kachungkhana nali theida ngacheera, awungabingnala ningrei-shingakra; nawui kashimān chi theilaga saikora ngacheeyikhaora.”

¹¹Kaja Proho VAREna hithāda hānga: “Babylon awungawui raighai nawuitungli tāra.

¹²Ina miyurbingwui ngachaili pangshap khaleiya, yurbingwui ngachaili sāshimeikap kaje athumwui raighai eina nawui mi katonga thingasakra.” “Athumna Egyptwui langkaso arema sāngasakra, kala chiwui mi katonga shimānserra.

¹³Tara̱pamli homkapam sha̱kei saikora ina yummira; kala chili mipheina kalā mashi ngasakluimara, lah sha̱keiwui pheichonna athumli kalā mashi ngasakluimara.

¹⁴Chiwui thili tara̱ chi ina mathing ngasakra, kala kong kachiva̱ thao khalong thāda longngasakra, da Proho VAREna hānga.

¹⁵Egypt ngalei ina ramchomi khangasak tharan, ngalei chipemda khalei saikora ina khuithuiser kahai tharan, chili pānkasā mibingli sāthat kahai tharan, I PROHOna da athumna theikhuinaora.

¹⁶Chapchāt hi laa thāda sāra; Egyptwui vang kala awui mi atongawui vang, yurbingwui naongalāva̱bingna hithāda chapchāt laa sāra da Proho VAREna hānga.”

¹⁷Zingkum tharāda kakhanewui, kachāng khare, zimiksho tharāda kaphangāthang, PROHOwui tui chi ili rāhānga:

¹⁸“Miwui naomayara, Egypt katongawui vang sifalu; awui kala khangama yurwui naongalāva̱bing, kazeiramli khaleibing chiwui Chomli horsangserhaolu:

¹⁹“Khamathā nana khipāli mataikhala? Taulu, kala ahui marimkashokbingli ngasopilu.”

²⁰“Raikhai eina kathibingli ngasoda athumla thira, kala ali ngasoda mi saikora thirumra.

²¹Athumna ningkakachaiya kala raighai eina thikahaibingli ngasoda pamkhavai kazeiramli khavā tharan, kapinga athumna, ‘Athumla rāhaira’ da hāngra.

²²“Assyria kala ali khangayur saikora, athum raighai eina kathibingwui chikhurna kuinamda chili piserdalei,

²³athumwui chikhur chomkhurwui kathukali lei, kala awui chikhurli ngasotnaobingwuina kuinama; mi kachiva̱li ngachee khangasakabing chi, raighai eina pitāserhaira.

²⁴“Elam kala awui mibing raighai eina pitā kahaibingli ngasoda chili piserda lei, kharingabingwui okathuili ngachee-ngacham ngasaka, athumna ahui marimshokla kazeiramli zanga, kala akhurli tākazanga athumli ngasoda maikashi phungruma.

²⁵Athumna awui pet, pitā kahai awui mibingwui ngachaili sāmi, raighai eina sāthat kahaibing, ahui marimkashokabingwui chikhurna ali kuimareiya; athumna okthuilakha yurbingli ngachee-ngachām ngasaka, kala akhurli tākazanga athumli ngasoda maikashi phungruma; athumla pitā kahaibingwui ngachaili chipeta.

²⁶“Meshech eina Tuballa aniwui shipaibingwui chikhurna kuimarānda lei. Athum saikora ahui marimshokla raili sāthatserhaira. Kha atam akhali athumna mibingwui malung kashamkhaimisai.

²⁷Athumli achālakhawui kaping kapangabingwui thāda khayākalāk eina machifamana, raighai khumkuili masangmimana, changveila machiphunmana. Kaping kapangabing hi atam akhali kharingabingli malung kashamkhaimishapsai.

²⁸“Hithāda Egyptnaobingla ahui marimkashoka raili sāthat kahaibingli ngasoda chithitra.

²⁹“Edomna awui awunga kala ngalei khamungabing chili ngasopamdalei. Athum pangshap khaleiya raimibing sāsai, kha ara kathebingwui ramli ahui marimkashoka raili thikahaibingli ngasoda pida lei.

³⁰“Atungshongwui wungnaobing kala Sidonnaobing saikora leiser dalei. Atam akhali athumwui pangshapna malung kashamkhaimisai, kha ara ahui marimshokla, raili kathebingli ngarumda maishiri athum zanghaira, kala kathinaobingwui ramli tākazanga athumli ngasoda maikashi phungruma.

³¹“Raili sāthat kahai saikora chi theida awunga Pharaoh kala awui shipaibingwui vang ninglum khavai ngasāra,” da Proho VAREna hānga.

³²“Kaja ana kharingabingwui ngaleili leilakha malung kashamkhaimi; chiwui vang eina ahui marimkashoka, Pharaoh kala awui mibing raighai eina sāthat kahaibingwui ngachaili maishiri eina chizanra,” da Proho VAREna hānga.