Read Tangkhul Naga EZEKIEL 33 Bible Online

EZEKIEL 33 - Tangkhul Naga bible

EZEKIEL 33

¹ PROHOwui tui chi ili rāhānga:

²“Miwui naomayara, nawui mibingli hithāda hānglu, ina ngalei akhali raighai chi khuiraakha, kala ngalei chiwui mibingna athum ngachaiwui eina mi akha khuida, ali athumwui shantri sāngasakta;

³mipā china raighai chi kharā theida, talla̱ khongda mibingli hāngmathinlaga;

⁴kachikathā mi akhana hāngkhamathin talla̱khon chi shālaga mashitsangakha, kala raighai china rāda ali khuithuiakha, awui ashee chi akhalattawuitungli tāra.

⁵Ana talla̱khon chi shāda, kala ning mangasharakha; awui ashee chi akhalattawuitungli tāra. Kha ana hāngkhamathin chi khuisangakha, ana awui manglā kahui samphangra.

⁶Shantripāna raighai kharā chi theilaga talla̱ makhongmimada mibingna raighai kharā chi makatheiwui vang kachikathāli rāsāthathaiakha, mipa chi awui khayon eina kathina jilala awui kashong chi shantripā chiwuitungli ina tāngasakra.”

⁷“Chiwui vang, miwui naomayara, Israelwui shimkhurwui vang ina nali shantri sākhavai sangkahaina; iwui tui kahahāng nana athumli hāngmathinmiki kajina.

⁸Makhayā mili ina, O makhayā mi, na thiphalungra da hānglaga, nana makhayā mi chili ning ngatei khavai mahāngmathinmiakha, makhayā mi china awui khayonwui vang thira, kha chiwui kashong chi ina nawuitungli tāngasakra.

⁹Kha nana ning ngatei khavai makhayābingli hāngmathinlaga ana manganāmada mai mangareiungakha, awui khayonwui vang a thiphalungra, kha nana nawui mirin kankhuira.”

¹⁰“Miwui naomayara, Israelwui shimkhurli hānglu, nathumna, ithumwui morei kala khayonkhamāngwui vang hiyākha ngazan kahaina, ara kathāda ringluipairakhala? da nathumna hānga.

¹¹ Athumli hānglu: Vare PROHO ina kachangkhat eina kahāngna, kaja, makhayā mi kathiwui vang iwui ringkaphā maleimana; kha makhayā mi china makhayā otsakwui eina latungda ringsi kaja chāng; latunglu, nawui makaphāwui eina latunglu; kaja khisathuda na thirakhala, O Israelnaobing?”

¹²“Miwui naomayara, nawui mibingli hānglu, khangaronga mi china khalāng ot sahaisakha awui khangarong china mahuimimara; kala makhayā mi china awui makhayā otsakwui eina ningngateida latungakha kharing samphangra; khangaronga mina awui khangarong chieina maringrarmara.

¹³Khangaronga mili ina ringngasakra da hānglala, khalattawui khangarongli shitsangda morei sāhaisakha, awui khangarong ot akhala maphaningungmimara, kha ana morei kasā chiwui vang thira.

¹⁴Latluida makhayā mili, ‘Na thiphalungra’ da hānghailala, awui makhayā otwui eina mai ngareiungda khamashung eina sākhangayi saakha,

¹⁵makhayā mi china hamkahai chi hanmiluida, likakhui otla hanmiserhaiakha, kala okathuiwui shiyan mayonda morei masāluiakha, ana ringlakra, a mathilakmara.

¹⁶Ana morei sākahai malaimiserhaida awuitungli maphaningluimara, ana khamashung ain zatkhangayi sāhaira, a ringlakra.

¹⁷“Kha nawui mibingna, athumwui khayonpa hailaklaga, ‘PROHOwui otsak mamashungmana’ jiya.

¹⁸Khangaronga mina awui mai ngareithuihaida morei saakha, chiwui vang a thira.

¹⁹Kala makhayā mina awui makhayā apong eina ningngateida khamashung zatkhangayi zatakha, chieina ana kharing samphangra.

²⁰Kha nathumna, ‘PROHOwui otsak mamashungmana’ da hānga. O Israelwui shimkhur! Nathum mi kachiva̱li kachichāwui otsak athishurda ina bichar sāra.”

²¹ Ithumli raithāda kum tharāda kakhanewui kachang katharā, zimiksho kaphangāthang, Jerusalemwui eina yāmkashoka mi akhana ili rāhānga, “Keinung khuithuihaira.”

²²Yāmkashoka mipā chi marāranglakha ayā kathā PROHOwui pāngna ili saza̱mida, mipā chi kharā eina ngathorshong, ikhamor makāda tui matuipaihaowa; kala khak mangasha̱luithuwa.

²³PROHOwui tui chi ili rāhānga:

²⁴“Miwui naomayara, sāshimānmi kahaia Israelwui ngaleili khaleibingna, ‘Abrahamva amānga, kala ana lam hi samphanga; ithumva kachungkhaya, kachangkhat eina ithumli metchang kahaina’ da hāngda lei.

²⁵“Chiwui vang eina athumli hānglu, Proho VAREna hānga: Nathumna asā ashee eina ngarumda shai, kala nathumwui mik meoma̱li yanga, kala ashee shokngasaka; chithakha lam hi nathumna samphangpaira da phaningla?

²⁶Nathumna raighai ngasina, nathumna ningkakachai ot sai kala khongnai preiva̱li sākhamānga; chithākha nathumna ngalei chi khuirala?

²⁷“Athumli hibing hi hānglu, Proho VAREna hānga: Kachangkhat eina ina kahāngna kaja, sakathān kahaipamli khaleibing raighai eina thiserra; kala lamli khaleibingli ina sāli chishaira; keinungli khalei kala lungkhurli khaleibing kazātkashi eina chithitra.

²⁸Kala ina ngalei hi ramchomihaora; kala awui khangamkharei pangshap maleiluimara; kala Israelwui kaphung eina tangda ramchomihaida khipākha marāchonsangluimara.

²⁹Ningkakachai ot athumna sākahai saikora hiwui vang apam hi ramchomi kahai chitharan, I PROHOna kaji athumna theikhuira.

³⁰“Miwui naomayara, nawui vanga, nawui apongli ngazekta khalei nawui mibing shim phako kachida kala khāmongphei kachida, ‘Rālu, PROHOna khi hāngkhala kaji rānganālu’ da nathum akha eina akha hāngngaroklu.

³¹Mibingwui thāda athumnala rai kala nana kahāng chi nganākhui, kha kasāva masāmana; khamorle leikashi tui kachungkha hānga, kha alungshonga khalatta tongzā khavaimāng sai.

³²Yanglu, athumwui vanga na hi, leikashiva̱li rokshot unglak eina laa sākachiphun thāda kala tingteila leishiri eina huikachithei thāda, nawui tui nganākhui, kha athumna kasāva masāmara.

³³Hi ungkashung tharan—kala mashoilakla ungshungra—chitharan athumwuili marān akha leisai kaji theikhuinaora.”