Read Tangkhul Naga EZEKIEL 34 Bible Online

EZEKIEL 34 - Tangkhul Naga bible

EZEKIEL 34

¹PROHOwui tui chi ili rāhānga:

²“Miwui naomayara, Israelwui yaokahomabingwuitungli marānmilu, marānlu, kala athumli hānglu, yaokahomabing eina tangdalila, Proho VAREna kahāngna: O Israelwui yaokahomabing, khalatta phākachizātbing! Yaokahomabingna yaobingli phāchizātki kaji maningmala?

³Asā nathumna shai, athumwui ahah kachon sākhuida ngavai, asā kakākā taithatshai, kha nathumna yaobingli maphāchizatmana.

⁴Khangazanabingli nathumna pangkhavai masāmimana, kakazāli maraimimana, pheipāng katekali mangahāmimana, pākthui kahaibingli mangakuikhuimana, shimān kahaibingli maphavāmana; kha tandi milaga sāshilak eina athumli nganaowa.

⁵ Chithāda athumli homkhame mi makhaleiwui vang kachichāpāk eina thuihaida athum ramsāwui sāshai ngasāhaowa.

⁶Iwui yaobing pākyanghaida phungrei kachida kala phungrā kachida ma̱zata; okathui peida vāshunga, kha khipānakha maphāvāmana.”

⁷“Chiwui vang eina yaokahomabing! PROHOwui tui nganālu:

⁸Kachangkhat eina ina kahāngna, da Proho VAREna hānga, khikhalajila yaokahoma makhaleiwui vang, iwui yao saikora sāshai ngasāhao, kala iwui yao saikora sāyurbingwui kashakazā ngasāhaowa; kala iwui yaokahomabingna iwui yaobingli maphāla kala maphāchizatla athum khalatta phāshakhaokada;

⁹chiwui vang eina yaokahoma nathum, PROHOwui tui nganālu.

¹⁰Proho VAREna hithāda hānga, Yanglu, athumli ina mamayāmara; iwui yaobingwui kashong nathumwuitungli tāra, kala yaobingwui asāla mashai ngasakluimara. Athumna mashailui khavai iwui yaobingli ina athumwui khamor eina ngatangkhuira.”

¹¹“Kaja Proho VAREna hānga: Yanglu, I khalattana iwui yaobingli aphākhuira.

¹²Yao kachichā eina kazat tharan yaokahomabingna aphākakhui thāda inala iwui yaobingli aphākhuira; kala kakhanang kachot atamli kachichāpāk eina kazat apam kachiva̱wui eina ina ngatangkhuiserra.

¹³Kala ina mibingwui eina khuishokta, ngalei apam kachiva̱wui eina kazipkhuiserra, kala athumwui ngaleili khuiungmira; kala ina Israelwui kaphung tara̱ khaleipam kala mina okkathui apam kachida mizāra.

¹⁴Ina athumli wonui katimpamli phazā ngasakra, kala Israelwui phungrei kajuipam athumwui azāt phazā khavai sāra; athumna wonnui katimpamli ngaleosangra, kala seizāt khamathā Israel kaphungli zāpamra.

¹⁵Iwui yaobingwui kahoma ina sāra, kala ina athumli ngayaipi ngasakra, da Proho VAREna hānga.”

¹⁶ “Shimān kahaibingli ina phākhuira, kala pākthui kahaibingli ngakuikhuira, sheikasha̱bingli ngahāmira, khangazanbingli pangngasakra, kala asā kaphābing kala kapangabing chili mashun alungli phauira.”

¹⁷“Iwui yaonao nathumwui vanga, da Proho VAREna hānga: Yanglu, yaonao eina yaonao, yaovā eina mevā ina ngatei ngasakra.

¹⁸Wonui khamathāli nathumna phākazā chi mashapthuda seizat kateibing chi phei eina naikazamra, kala khamathinga tara̱ mangrada katei chi nathumwui phei eina naimakhuira kajila?

¹⁹Laga nathumwui pheina naikazam kahai chi zāra kala nathumwui phei eina naimakhui kahai chi mangrala?”

²⁰“Chiwui vang eina Proho VAREna athumli hānga: Yanglu, I khalattana asā kaphā yao eina asā makaphā yaowui ngachaili bichar sāmira.

²¹Khikhalajila nathumna khangazanbingli ngaheilaga, angaji eina thotta katātāva̱li kashamvāser kahaiwui vang,

²²ina iwui yaobingli kankhuira, athum sāshai masāluimara; kala ina yao eina yaoli bichar sāmira.

²³ Kala ina athumli yaokahoma akha, iwui rao Davidli phāsangra, kala ana athumli phāchizātra: ana athumli phāchizatta athumwui kahoma sāra.

²⁴ Kala PROHO ina athumwui Vare sāra; kala iwui rao Davidna athumwui ngachaili wungnao sāra; PROHO ina hāngkahaina.

²⁵Athumli ina chingri eina okthui khavaiwui tuingashit akha sāra, kala ramsā kashammiserhaida yansāngsa̱ eina lamhāngli okthuira kala khangang maleila ngahongli pira.”

²⁶Athum kala iwui kaphungli kuimareida khalei apam saikorali ina somira; kala atam kharā tharan ina zingrot rotāmira; sokhamiwui zingrot ngasāra.

²⁷Kala luili khalei thingrongna athumwui athei matheira, kala ngaleina heiun mataimeida shokra; kala athumna yansāngsa̱ eina okthuira; ina athumwui langkonthing sātekmihaida narkahai athumwui pāng eina ina thānkashok tharan, I PROHOna kaji athumna theikhuinaora.

²⁸Athum yurbingwui sāshai mangasāluimara, lah ngaleiwui ramsāna matukshailuimara; kha athumna yansāngsa̱ eina okthuida khipālikha mangangluimara.

²⁹Kala ina athumwui luivāt heiun kachungkha mataisang ngasakta ngalei hili kathai-kachām matheimara; yurbingnala mamana̱shiluimara.

³⁰Kala athumna I PROHO Varena, athumli ngasomida lei kala Israelwui shimkhur hi iwui mina kaji athumna theinaora da Proho VAREna hānga.

³¹“Nathum iwui yaobing, iwui wonuipamwui yaobingna, kala I nathumwui Varena,” da Proho VAREna hānga.