Read Tangkhul Naga EZEKIEL 35 Bible Online

EZEKIEL 35 - Tangkhul Naga bible

EZEKIEL 35

¹ PROHOwui tui chi ili rāhānga:

²“Miwui naomayara, Seir Kaphungli ngareivāda chiwuitungli marānlu,

³kala hithāda hānglu, Proho VAREna kahāngna: Yanglu, O Seir Kaphung! Ina nali mamayāmana, iwui makhamayāpāng nali tāngrāra, kala ina nali ramcho sāngasakra.

⁴Ina nawui keinung saikora sākazammihaida ramcho sāngasakra, chieina nana I PROHOna da theikhuira.

⁵“Khikhalajila nana katang makhavai yangshāt ningchānghaoda; kala Israelwui khanaowa tandi atamli kala athumwui unshimui atamli nathumna athumli raighaili horsangmihaowa;

⁶chiwui vang eina, Proho VARE, ina kachangkhat eina kahāngna kaja, nali ashee shokngasakra, kala nali asheena shurzatra; khiwui vangkhala kaje nana ashee shokkhangasakwui vang yonhaira, chiwui vang eina nali asheena shurzatra.

⁷Ina Seir Kaphung hi sākazamhaida ramcho ngasakra, kala chili khaung khavā saikorali ina katatmihaora.

⁸Kala ina nawui phungreibing kathingun eina pemngasakra; kala nawui phungrā, tampāk kala kongrā saikorali raighai eina sāthat kahai kathinguna pemserra.

⁹Ina nali katang makhavai ramcho sāngasakra, kala nawui keinungbingli khipākha maokthuiluimara. Chieina I PROHOna da nathumna theikhuira.

¹⁰“Khikhalajila nathumna, yur khani hi kala ngalei khani hi iwui sāra, ithumna chibing chi khuira, da hānga—PROHO leilei laga—

¹¹chiwui vang, kachangkhat eina ina kahāngna da Proho VAREna hānga, nana athumli malungvātta kala yuishida kasā chi tākam eina inala nali sāpapamra; kala ina bichar kasā tharan, I khipākhala da chitheira.

¹²Nathumna Israelwui kaphungli ‘Ramchomihaira, ithumwui shai sāmihaira’ da khamashāt saikora chi PROHO, ina shāsera da nathumna theikhuira.

¹³Nathum khamor eina ili mashātlaga nathum khalatta mai kākhangasak chila ina theiserra.”

¹⁴Chiwui vang eina Proho VAREna hānga: “Okathui katongana ningyāng ungkhavai nali ina ramcho ngasakra.

¹⁵Israel ramchohaida nathumna shimlui kakhuiwui ringkaphā thāda nathumlila chithāda sāmira, O Seir Kaphung kala Edom, nathum saikorali. Chitharan I PROHOna da nathumna theinaora.”