Read Tangkhul Naga EZEKIEL 36 Bible Online

EZEKIEL 36 - Tangkhul Naga bible

EZEKIEL 36

¹“Kala miwui naomayara, Israelwui phungreibingli marānmida hānglu, O Israelwui kaphungbing, PROHOwui tui nganālu,

²Proho VAREna hithāda hānga: Khikhalajila yangkashibingna nathumli mana̱shida, ‘Aha, achālakhawui khamathā kaphung ithumwui sāthuihaira’ da hānga.”

³“Chiwui vang marānlu, kala hānglu, Proho VAREna kahāngna: Mha, apam kachiva̱wui eina nathumli rasākazammihaida nathum hi yur saikorana ngapaithui kahaia ngasā kahaiwui vang, kala miyurbingna meisumshimli zakshilāk eina chān sākhanganaowui vang,

⁴eina Israelwui kaphungbing, PROHO VAREwui kahāng nganālu: Proho VAREna hithāda hānga phungreibing, phungrābing, kongrābing kala tampākbing, sākathānmi kahai kala ramcho kahai keinungbing; kuimareida khalei miyurbingwui zeikakharuiwui sāshai ngasāhaira.”

⁵Chiwui vang eina Proho VAREna hānga: “Iwui ngalei khalattawui vang mathānthup eina kala ningkachailak eina khuira kala ngaponra da kasā Edom kala khangatei yur saikorawuitungli iwui malungvātshun kahai alungli kahāngna.”

⁶“Chiwui vang eina Israelwui pongli phungrei, phungrā, kongrābing kala tampākbingli hithāda marānlu, Proho VAREna kahāngna: Yanglu, nathumna yurbingwui misui morei kaphungwui vang I malungvātlakhaida kahāngna;

⁷chiwui vang eina Proho VAREna hānga: Ina khangashit kasāna kaja, nathumwui ngalemli khalei miyur saikora athum khalatta hāngkhamachin phungphalungra.

⁸Kha O Israelwui kaphungbing, nathumva aphāng kachungkha shokta iwui mi Israelnaobingwui vang atheila matheira, kaja athum thākta shim hanungra.

⁹Kaja yanglu ina nali mikyan yangmira; luila vāsangda athei-araila lingsangra;

¹⁰mila ina mataisang ngasakra, Israelpam kachiva̱li, ramcho kahai chi keinung sakāluida mi kachungkha okthuira.

¹¹kala ina mila sha̱keila mataisangmira, kala kachungkha pharāsangra; kala ina kharewui tākam eina okthui ngasakra kala khare kachangwuili lāngda phāmeida sāmira. Chitharan I PROHOna da nathumna theinaora.

¹²Mha, ina nawuitungli mi pānlui ngasakra, iwui mi Israelnaobing eina tangdala, kala na athumwui shimluikat ngasāra, kala nana athumli nao mavātmiluimara.

¹³“Proho VAREna hithāda hānga: Khikhalajila yurbingna nali, ‘Na mi kashaiana, kala nawui yurli nana nao shumngasaka’ da hānga,

¹⁴chiwui vang eina na mi mashaipailuimara kala yurli nao mashum ngasakluimara da Proho VAREna kahāngna.

¹⁵Kala nali ina yurbingwui mana̱kashe masā ngasakluimara, kala mibingwui maikashi nana maphungluimara kala nawui yurli phei mangaphoklui ngasakmara da Proho VAREna hānga.”

¹⁶PROHOwui tui chi ili rāhānga:

¹⁷“Miwui naomayara, Israelnaobingna athumwui ngaleili pamlakha, athumwui otsakna kala kasākhavāna sākhamāng ngasaka; iwui mangāli athumwui acham, ngarang mahungda khalei khamakhaova̱ sha̱nao thai.

¹⁸Chiwui vang eina athumna ngaleili ashee tākhangasakwui vang kala athum khalatta sākhamāng khavai kasā meoma̱wui vang ina iwui malungkhavāt tāror ngasaka.

¹⁹Ina athumli yurbingwui ngachaili, ngalei apam kachiva̱li kashamvāser kahaina; athumwui acham aram kala kasākhavāwui athishurda ina bichar sai.

²⁰Kha athumna yurbingwui ngachaili vāda, khavāvāpamli athumna iwui katharaming makhao khangasakwui vang mibingna athumli, ‘Athum hi PROHOwui mina, kha athumlila kashamhaira’ da hānga.

²¹Israelnaobingna khavāvāpamli makhao khangasaka iwui katharamingwui vang ina saklak eina phaninga.

²²“Chiwui vang eina Israelwui shimkhurli hānglu, Proho VAREna hithāda hānga: Ina arui saki kaji hi nathumwui vang maningmana, O Israelwui shimkhur! Kha nathumna khavāvā pamli makhao khangasaka kathara iwui mingwui vāngna.

²³Miyurbingwui ngachaili nathumna sāmakhao kahaiya, khareia kathara iwui mingwui vang athut khuiki kajina; nathumwui miktāli athut kakhui tharan miyurbingna I, PROHOna da theinaora, da Proho VAREna hānga.

²⁴Kaja ina miyurbingwui eina, kala okathui apam kachiva̱wui eina kazipkhuida nathumwui ngaleili khuiungmira.

²⁵Ina tara̱ khamathing nali kasirrorda nathumwui makhaokasā chi tharserhaora, meoma̱ phaningkasāwui eina ina tharmihaora.

²⁶ Ina ning kadhar sangmira, kala ina manglā kadhar sangmira; kala ina ngalungwui malung chi khuishokhaida asāwui malung phonmira.

²⁷ Kala ina iwui manglā nali sangmida iwui shiyan-chikanwui alungli zatkhavai kala ngasharlak eina ain mayon ngasakra.

²⁸Navā ngarāli ina mikahai ngalei chili nathum okthuira; kala nathum iwui mi sāra, kala I nathumwui Vare ngasāra.

²⁹Kala ina nathumwui khamakhao saikorawui eina kanmira; kala ina kashakazā kachungkha shokngasakra kala nathumwuitungli chāmrei marālui ngasakmara.

³⁰Ina thingrong kala yāmguiwui heiun kachungkha ungngasakta, miyurbingwui mangāli kachām-khangaiwui maikashi chi matheiluimara.

³¹ Chitharan nathumna makhayā ot kasāsā kala ningkakachai morei sākasā saikora chi phaningungra; kala nathum khalatta nathumwui khayonkhamāng kala khangui ot sākahai saikorawui vang ningkachaira.

³²Ina sāki kaji hi nathumwui vang maningmana, kaji hi theilu da Proho VAREna hānga. Nathumwui otsak chi phaningunglaga vaishilu, O Israelwui shimkhur.”

³³“Proho VAREna hithāda hānga: Ina nathumwui morei pheomihaithang, ina keinungbingli mi okthuiluishitser ngasakra, kala sākazam kahai apam hupta sākāluira.

³⁴Ramcho kahai chi lui vāsangluira, rākatheibingna ramchona da phaningkasā chi mathaluimara.

³⁵Kha, ‘Ramcho lam hi Edenwui yāmgui thāhaira, kala sākazam kahai keinungla mi pānluida ngaziplak eina sākāluiserhaira,’ da athumna hāngra.

³⁶Kuimareida khalei miyurbingna, sākazamhaida shimān kahaipam saikora PROHOna sākāmilui kajina, ramcholila lingsangmilui kajina, kaji theikhuira. Hi PROHO, ina hāngkahaina, mashoila ina sālakra.”

³⁷“Proho VAREna hithāda hānga: Athumwui vang sāmi khavai Israelwui shimkhurli hila pongasakngai: Ashiwui mi yaoshang thāda mataisang khavai.

³⁸Athumna poakha, pha̱kaphayāwui yaoshang thāda, retsangmi kahai phanit atamli Jerusalemli yao kachipem thāda athumwui mi keinung kachida chipem ngasakra. Chitharan I PROHOna da athumna theinaora.”