Read Tangkhul Naga EZEKIEL 37 Bible Online

EZEKIEL 37 - Tangkhul Naga bible

EZEKIEL 37

¹PROHOwui pāng iwuitungli saza̱mi, kala awui manglāna ili tampāk akhawui alungthungli khuivai; kala chili mira̱kuina pemtinghai.

²Kala ana ili kuimareida thānvai kala yanglu, tampāk chili pemting eina, kala yanglu, saikora chi thengthuthairasai.

³Kala ana ili hānga, “Miwui naomayara, ara̱kuibing hi ringluipairala?” da khangahān eina ina, “O PROHO VARE nana katheina” da ngahānkai.

⁴Latluida ana ili hānglui, “Ara̱kuibing hili marānlu, kala athumli hānglu, O thengthut kahai ara̱kuibing, PROHOwui tui nganālu.

⁵ Proho VAREna ara̱kuibingli hithāda hānga: Yanglu, ina nathumli khaksui zangngasakra kala nathum ringra.

⁶Ina nathumwuitungli anonān phonmida nathumwuitungli asāla kāngasakra, kala ahui eina rommihaida khak suisangmilaga nathum ringunghaora; kala nathumna I PROHOna da theikhuira.”

⁷Chieina ili kakaso athishurda ina marānmi; kala ina marānmida leilakha akhon akha shai kala yanglu, ara̱kuina ara̱kuili pharon khangarokwui akhon ngasāsai.

⁸Ina yangkhavā eina, athumwuitungli anonān kāserlaga aphila kāda ahui eina romphinhaowa. Kha athum khakva masuimana.

⁹Chieina ana ili hānga, “Khaksuili marānlu, marānlu, miwui naomayara, khaksuili hānglu, Proho VAREna kahāngna: O khaksui, achikun matiwui eina rālu, kala shaothat kahaibing hiwuitungli ringkhavai khak suisangmilu.”

¹⁰ Chieina ana ili kakaso athishurda ina marānmi, kala khaksui chi athumli rāzangda athum ringhaowa, athum thuinganingserda hakkhamahā ashangva̱ ngasāthuihaowa.

¹¹Chiwui thili ana ili hānga, “Miwui naomayara, ara̱kuibing hi Israelwui shimkhur katongana. Yanglu, athumna, ‘Ithumwui ara̱kui thengthuthaira, kala ithumwui kachihān shimānhaira, ithum maringluimara’ da hānga.

¹²Chiwui vang athumli marānmida hānglu, Proho VAREna hithāda hānga: Yanglu, ina nathumwui chikhur shomira, kala nathumli chikhurwui eina ngakarthui ngasakra, O iwui mibing; kala ina nathumwui shim Israel ngaleili khuiungmira.

¹³O iwui mibing! Ina nathumwui chikhur shoda nathumli chikhurwui eina shok khangasak tharan, nathumna I PROHOna da theikhuinaora.

¹⁴ Kala ina iwui Manglā nathumli sangmira, kala nathum ringra, kala ina nathumli nathum khalattawui ngaleili chipamra. Chitharan PROHO ina hānghaira da nathumna theira, kala chi ina sāhaira da PROHOna hānga.”

¹⁵PROHOwui tui chi ili rāhānga:

¹⁶“Miwui naomayara, khāmshui akha khuilaga, ‘Hi Judah kala ali khangayur Israelwui naomayarawui vangna’ kala khangatei khāmshui akhala khuilaga, ‘Hi Joseph (Ephraimwui khāmshui) kala ali khangayur Israel shimkhur saikorawui na’ da kapilu;

¹⁷kala khani chi ngasunkhuilu, chieina napāngli lijei akhamāng ngasāhaora.

¹⁸Kala nawui mibingna, ‘Hiwui kakhalat ithumli mahāngmarala?’ da ngahānakha,

¹⁹athumli hithāda hānglu, Proho VAREna hithāda hānga: Yanglu, Josephwui (Ephraimwui pāngli khalei chi) kala ali khangayur Israel saikora chi ina khuira; kala ina Judahwui thingli ngasun ngasakta ipāngli akha sāngasakra.

²⁰“Nana kapi khavai thing khani chi athumwui mangāli kasing tharan,

²¹athumli hānglu, Proho VAREna hithāda hānga: Yanglu, Israelnaobingna miyurbingwui ngachaili zatkasa kachiva̱wui eina ina kazipkhuida athumwui ngaleili khuiungmira,

²²kala ina yur akhamāng sāngasakta aram ngalei, Israel kaphungli okthui ngasakra, kala awunga akhana athum saikorali mungda yur khani masāluimara, wungram khani sāda mangakailuimara.

²³Athumna meoma̱li phaningda yangkakharing ot eina masāmakhaoluimara, kala athumwui khalāng ot sāda masākhamāng ngasakluimara, kha hikathā makaphā otsakwui eina ina huimida tharngasakra; kala athumna iwui mi sāra, I athumwui Vare sāra.

²⁴Iwui rao Davidna athumwuitungli mungra; kala saikorawui yaokahoma akhamāng leira. Athumna iwui ain mayonra kala iwui shiyan-chikan ngarangra.

²⁵Kala iwui rao Jacobli ina mikahai navā ngarāna pamkasā ngalei chili athumna pamluira; athumla anao ngarāla, naobingwui naobingla chili leichingda iwui rao Davidna athumwui wungnao sāda mungra.

²⁶ Ina athumli chingri kahaiwui tuingashit akha sāra; chi athumli katang makhavai tuingashit kasana; kala ina athumli somira kala mataisang ngasakra; kala iwui kathara shim athumwui alungli haimichingra.

²⁷ Ina athumli ngasopamra, kala I athumwui Vare sāra, kala athum iwui mi sāra.

²⁸Iwui kathara shim athumwui alungli haimiching kaji chi theilaga, Israelli ina tharkhangasakna kaji miyurbingna theikhuira.”