Read Tangkhul Naga EZEKIEL 38 Bible Online

EZEKIEL 38 - Tangkhul Naga bible

EZEKIEL 38

¹PROHOwui tui chi ili rāhānga,

² “Miwui naomayara, Meshechwui, Tubalwui wungnaobingwui akhavā, Magog ngaleili khalei Gogli yangvāda marānmilu,

³kala hānglu, Proho VAREna hānga: Yanglu, ina nali mamayāmana, O Meshech eina Tubal wungnaowui akhava Gog.

⁴Ina nali shireikarkhuilaga khānghui eina namakhāli hokkhuira; kala ina nawui raimi, sigui, sigui raimi, raisāri khangavai athum saikora, talla̱ kasingbing, chāngvei kaphungbing, raighai kasingbing shimenshoksera;

⁵Persia, Cush, kala Put athum saikora, chāngvei kala kuihon eina ngasoda.

⁶Gomer eina awui raimi katonga, atungshong tāmeikapta khalei Beth-togarmahli awui raimi katonga—nali mi kachungkha ngasoda lei.

⁷Ngarānlu kala ngarānkazaklu, na kala nali kuimarānda kazip kahai ashangva̱, kala athumwui vang raikān sāmilu.

⁸Atam kasāngkhawui thili nali mathotkhuira; kala zingkum kasāngkhawui thili chingri eina khalei, mashikachina Israelwui phungreibingli yur ngatateidawui eina rakapāna kala chiwui mibing saikorali nana rai sāda kashamshokra, kala chingri eina pānra.

⁹Nana siphan zingrot thāda mangāshong, ngaleili muiyā khangapui thāra, na eina nawui mina, kala rākhangachonbing zangda sorkhangasai raimi thānlaga muivāra.”

¹⁰“Proho VAREna hānga: Chithanghon nawui ningli raza̱da makaphā ot sākhavai chukmaja̱ra,

¹¹kala, ngavei makhavaiya, ngaveila makashunga, chingri eina okthuida khalei kha̱bingli akaira, da hāngra;

¹²kala yurbingwui eina latungda sākazam kahaipamli ungkapama okathuiwui alungthungli kapambing chiwui eina angaponkhui khavai ngarānra.

¹³Sheba eina Dedan kala Tarshishwui leih khalonbing eina chiwui kha̱bingna, ‘Ngaponkida kharāla? Sinā, lupāsā, sha̱kei, lan ngapaikhuiser khavai mi hiyākha thānkazatla?’” da hāngra.

¹⁴Chiwui vang, miwui naomayara, Gogli marānmida hānglu, Proho VAREna hithāda hānga: “Iwui mi Israelnaobing chingri eina okthuithang na khalatta phaningkhuira,

¹⁵kala atungshongwui tāmeikap kajepam eina mi kachungkha thānlaga, sigui tongda, sorkhangasai raimi eina ngasoda,

¹⁶iwui raimi Israelnaobingli, ngaleili muiyā khangapui thāda tāngararra. Khanaowa atamli ina nali khuirāda, iwui tharkhamathengwui vang zakshilāk eina athut khuingasakra, O Gog. Chieina yur saikorana I Varena kaji theikhuira.

¹⁷Proho VAREna hithāda hānga: Achalakha iwui mibingli ngarar khavai khuirāra da Israelwui marānbingna hāngkahai chi nala?”

¹⁸“Kha Gogna Israelli ngararthanghon iwui malungkhavāt ngathunghaora da Proho VAREna hānga.

¹⁹Kaja iwui yuishāt eina lungthot ngasha̱da kahāng hina kaja, chithanghon Israel ngaleili panglāk eina nganukra;

²⁰ngayiwui khaih, khamasaili kapaiya vānao, ngaleiwui ramsābing, ngaleili khangawo akha̱-akhao, kala okathuili khalei mi saikora, ili theilaga nganukyikhaora; phungreibingla minhaora, lungzilunghār kaihaora kala phākho kachiva̱ ngaleili ja̱tāserhaora.

²¹Chinaongarā sāthat ngarokra, khangachee-khangachā ayur kachiva̱ Gogli makhamayā rāshung ngasakra da Proho VAREna hānga.

²² Kazātkashi kala ashee kashok eina ngasoda ina bichar sāra; alila awui mibinglila kala athumli khangasobing saikorawuitungli theih eina ngasoda zingrot machatla rotā ngasakra, meiwui zingrot rotā ngasakra.

²³Chithāda iwui khangam-kharei kala tharkhamatheng miyur kachungkhali theikhui ngasakra. Chieina I PROHOna da athumna theikhuira.”