Read Tangkhul Naga EZEKIEL 39 Bible Online

EZEKIEL 39 - Tangkhul Naga bible

EZEKIEL 39

¹Kala na, “Miwui naomayara, Gogli makhamayā marānmilu, kala hānglu, Proho VAREna hānga: Yanglu, ina nali mamayāmana, O Meshech eina Tubal wungnaowui kathāna Gog!

²Ina nali kuimareida atungshongwui tāmeikap kajepamwui eina Israel kaphungli thānvāra;

³chiwui thili nawui uishong eina nawui malā ngaphittāmihaora kala nawui yāshong eina malāthing chihotā ngasakra.

⁴ Na Israelwui kaphungli thisangra, na kala nawui ashangva̱ kala nali khangasobing saikora; ina nathumli vānaoyur saikora, sāyur saikorali chishaira.

⁵Nathum khamasai lamhāngli thisangra; kaja ina hānghaira da Proho VAREna hānga.

⁶Ina Magogli kala shamadrupheili tāphup eina okathui athumli mei chihovāra; chieina I PROHOna da athumna theira.

⁷Iwui katharaming chi iwui mi, Israelnaobingli theingasakra; kala iwui katharaming hi ina masāmakhao ngasakluilakmara; chieina miyurbingna I Israelli PROHO, Kathara china da theikhuira.”

⁸“Yanglu, atam rārāli, makahatlakla shokra da Proho VAREna hānga. Ina hāngkahai zimiksho chi china.

⁹Chitharan Israelwui keinungli kapambingna khutlai, chāngvei, talla̱, kachākthing kala malāthing, kazei kala zeipa̱ angamuikhuilaga thing sāda rikra, kum shini peida rikra;

¹⁰chithāda athumna luili kala ngahongli thing mavāphaluimara, kaja athumna khutlaibing chi rikshapra; athumli khangaponbing chili athumnala ngaponkhuira, athumli sākakathānabing chili athumnala sākathānmihaora,” da Proho VAREna hānga.

¹¹“Chiwui atamli Gogli chifa khavai Israelwui apam akha mira, shamadruwui zingshoshong khalei Ramkazatawui Leiwuk kaho chili; kaja Gogli kala awui mibing saikorali apam chili chifara; kala kharam khavābing mazatpaimara; kala apam chiwui ming Hamon-gog Leiwuk da phokra.

¹²Apam chi sāmathākhui khavai Israelnaobingna mingun chuikaphum kachāng shini zangra.

¹³Apam chiwui mi saikorana chifara; kaja ina iwui tekhamatei chitheithang hi athumwui vang maikakā otna da chitheira da Proho VAREna hānga.

¹⁴Kachāng shini kākapei eina athumna mi phāsanglaga ara̱-arā taikahai chi phumngasakta samathākhuira.

¹⁵Kala chiwui thili kachikathāna mira̱kui atheiakha, Hamom-gog Leiwukli maphumranglakha eina tangda, theikhui khavai machut sāra.

¹⁶(Apam chiwuili Hamonah kaho keinung akhala lei.) Chithāda athumna ngalei chi sāmathākhuira.”

¹⁷ “Nawui vanga, miwui naomayara, da Proho VAREna hānga: Vānaoyur saikorali kala sāyur saikorali hānglu, apam kachiva̱wui eina ina ngarān kahai pha̱kaphayāwui zātkhānli rāzangserlu; Israelwui kaphungli nathumwui vang ina pha̱kaphayāwui zātkhān kahakva̱ akha ngarānmihaira; chili sā shaira, ashee mangra.

¹⁸Nathumna kapingabingwui asā shaira, kala okathuiwui wungnaobingwui ashee mangra—yaowui, yaonaowui, mewui, seiwui kala Bashanwui keimathao kahai saikorawui.

¹⁹Ina ngarānmi kahai pha̱kaphayā zātkhān chili nathumna katho eina tangda athao shaira, ashee eina maripra.

²⁰Kala iwui tableli sigui kala katongbing, raikapingbing, khangamabingli ngasoda nathumna shaira da Proho VAREna hānga.”

²¹“Kala ina yurbingli iwui tekhamatei chitheira, kala yur saikorana ina sākahai iwui bichar, kala ina ipāng eina athumli parkahai chi theira.

²²I athumwui Proho VAREna da Israelwui shimkhurna chithang eina theiphokra.

²³Kala Israelwui shimkhurna khare kachāng tukthui kahai chi athumwui moreiwui vangna da theira, khikhalajila athumna ili matheimilakla kasāwui vang ina mayangkhamina kala yangkashibingwui pāngli horsangmihaida shaothat kahaina da miyurbingna theikhuira.

²⁴Athumwui makathar athishurda kala morei kasāwui athishurda inala chithāda kasāna, kala mayangkhamina.”

²⁵Chiwui vang Proho VAREna hānga: “Ara ina Jacobwui shimlui hanmiluira, kala Israelwui shimkhur katongali lumashanmiluira; kala iwui katharamingli machipat ngasakluimara.

²⁶Athumna ngalei chili chingri eina pamda khipākhana athumli mangang khangasak tharan, ili matheimilakla sākahai saikora, kala athumwui kakhayak saikora malaihaora,

²⁷athumli ina yangkashibingwui ngaleiwui eina shimli thanungkhami tharan, kala athumwui vang eina miyur saikorawui mangāli iwui tharkhamatheng theikhangasak tharan.

²⁸Athumli raithāhailaga thanungluishit kajiwui vang I, athumwui Proho VAREna da theikhuira. Khipālikha ina miyurbingwui ngachaili mataimihailakmara;

²⁹kala iwui Manglā Israelwui shimkhurtungli sangkhami tharan athumli mayangkheiluimara, da Proho VAREna hānga.”