Read Tangkhul Naga EZEKIEL 41 Bible Online

EZEKIEL 41 - Tangkhul Naga bible

EZEKIEL 41

¹Chiwui thili ana ili shimreili thanvāda pakra̱ chi atamyanga; pakra̱ chiwui lākhala lākhala khuining tharuruka.

²Kala zangkhavai chi khuining tharāna; kala zangkhavaiwui wui [3] phākho khanini khuining phangāngāna. Shimrei chi tamkhayang eina khuining hangmati sānga, aretla hangmatipapama.

³Kala ana alungshong zanglaga pakra̱ chi tamyangda khuining khaniya; kala zangkhavai chi khuining tharuk kala arāp khuining shininina.

⁴Kala ana kā chiwui asān tamyangda, asān khuining maga̱, aret maga̱ da shimreiwui eina kānshoka. Kala ana ili, “Hi tharmathengmeikap kaje kāna,” da hānga.

⁵Chiwui thili ana khorumshimwui phākho tamyanga: kashā khuining tharuka; kala kuimareida khalei kāwui phākhobing khuining matiya.

⁶Kā hi mathāng kathum lei, akhali akhana matunga, mathāng ava̱va̱li kā thumrārā lei. khorumshim chiwui kuikhamareili chikhun ngakhārshoksera kala chiwuitungli shim sakāmaronda phākho khangatei maleiluimana.

⁷Ngakhārkashok chiwui athishurda sakākhamaronwui vang shim chi hakkāmamāna. Khorumshim chiwui arāp lākhali chonkhavai lei, khamazewui eina sakāmamānda ato kāli kāshunga.

⁸Kala ina khorumshimwui kuikhamareili tārong akha sākahai chila thei. Shim chiwui shimphunga asān khuining tharuka.

⁹Ayar phākho khuining phangāya; kala angachaili khalei nganing khavai chi khuining phangā pāka.

¹⁰Khorumshim kuimareida pāngmonbingwui kā khuining maga̱ga̱ mataka.

¹¹Ayar kābingwui khāmong shokhailaga taikahai chiwui eina khani shoshoka, akhana atungshong ngareishanga, akhapāna azingshong ngareitai; kala nganing khavai chi ungshung vāshungda khuining phangāya.

¹²Khorumshimwui zingtunvāk ngareikhavā shim chi khuining hangshini pāka; kala shim chiwui kashāna kuimareida khuining phangā, asānna hangchikona.

¹³Chiwui thili ana khorumshim chi tamyangda khuining shākha sānga; kala yāngkhup kala shim eina chiwui phākho zangda khuining shākhaya;

¹⁴aretla, zingshoshongwui yāngkhup zangda shākhapapama.

¹⁵Chiwiui thili zingtunshongwui yāngkhupli ngareivāda khalei shim chiwui asān kala phākho chi khaninishong tamlaga khuning shākhapapama. Khorumshimli Zangkhavai Kā, Tharkhamatheng Apam, kala Tharmathengmeikap kaje Apam chi thing

¹⁶zaimitsanga, kala chonnar eina charfa kāshungda shopai shungpai kaji chikhai eina khoma,

¹⁷tharmathengmeikap kaje kāli zangkhavai khāmong ato chila chikhai eina rommit hai. Tharmathengmeikap kaje kāla, shimreila, Cherubim khaneirong ruksanga;

¹⁸Cherubim khaniwui ngachaili khaneirong ava̱va̱ sāsanga. Kala Cherub ava̱va̱wui amai khanini kai;

¹⁹mimaipāna khaneirongvāk yangvai kala kazingkha̱maina khaneirong akhapāli yangvai; Khorumshim kuimareida chithāda leisera;

²⁰Cherub eina khaneirong chi khorumshimwui khāmongpheili ngalei eina thuilaga shimtung kāzokta shimtung katongali yeksanghai.

²¹Shimreiwui khāmongthing kapāk eina kashā ngaraichai; kala kathara apamwui mangāli thing eina kasā hanphut thāda akha lei.

²²Chiwui kajui khuining kathum, asān khani, aret khanina; aphei eina arāp thing eina sāsera. Kala ana ili, “Hi PROHOwui mangāli khalei tablena” da hānga.

²³Shimreila, kathara kā chila khāmong khanini uta;

²⁴kala khāmong akhali aphek khanini kai, shungung shungvā sākapai aphek akharipa.

²⁵Shimrei khāmongli phākhowui thāda Cherubim kala khaneirong ruksangsera. Shimphowui mangāshong thingwui tārong akha lei.

²⁶Shimphowui phākho khaninili khaneirong ruksanga kala charfala alungshong rāngasunzanga.