Read Tangkhul Naga EZEKIEL 43 Bible Online

EZEKIEL 43 - Tangkhul Naga bible

EZEKIEL 43

¹Chiwui thili ana ili zingshoshongwui ngaveili thānvai.

² Kala yanglu, Israelwui Varewui tekhamatei zingshoshong eina rārāsai; kala a kharāwui akhon tara̱ kachungkhawui akhon thai; kala awui tekhamateina okathui horra.

³Kala ina kathei khamahā chi, ana keinung sāshimān khavaiwui atamli kathei khamahā chithāda thei, kala Chebar kongli kathei khamahā chithai; kala ina ngaleili mashunzanga.

⁴Varewui tekhamatei china khorumshimwui zingshoshong khalei ngavei chieina rākazang tharan,

⁵Manglā china ili khāngkhuida alungwui kayāngli khuivai; kala yanglu, PROHOwui tekhamatei china khorumshim chi pemtinghaowa.

⁶Mipā china iwui ngalemli nganingda leilakha Khorumshimwui eina mi akhana ili kahāng chi shai;

⁷kala ana hithāda hānga, “Miwui naomayara, apam hi iwui wungpamkhong haikhavaipamna, kala iphei naikhavaipamna, Israelnaobingli ngasoda ina katang mavaila hili okthuichingra. Kala Israelwui shimkhurna iwui katharamingli masāmakhaoluimara; athum saikora, wungnaobingla, phokaphā otsak eina, kala athumwui awungabingwui kathingun eina masākhamāng ngasakmara.

⁸Iwui zangkhavaipamli athumwui zangkhavaipam kala iwui khāmongpheili athumwui khāmongphei sakāda, phākho akhamāng eina mataka. Athumna ningkakachai ot sāda iwui katharaming sākakhamāngwui vang malungvāthaida ina athumli yumkhangasakna.

⁹Ara varebingli kaphaning ot kala awungabingwui kathingun chi iwui eina katāva̱li haihaoranu, chieina ina athumli ngayurpamchingra.”

¹⁰“Kala miwui naomayara, athumwui khayonkhamāng chi phaningkhuida khayak khavai Israelwui shimkhurbingli khorumshim azak, angarān mathāsek eina hāngchitheilu.

¹¹Kala athumna sakā kahai chiwui vang khayāmalaakha, khorumshim chiwui zangkhavai, shokkhavai, ngarānkharirik kahai chi meisā eina hāngchitheilu; kala chili sāki kaji kakaso kala ain saikora kapichitheida kakaso hi mathālak eina mayon khavai sālu.

¹²Khorumshim chiwui ain chi hithai: kaphung hiwui ari-arāp kuimareida kaphungton kāpeida tharmathengmeikapki kaji apamna. Yanglu, khorumshimwui ain chi china.”

¹³Hanphutwui asān-aret (khuiningkha kala pāngmayāpar eina katama khuining:) Aphei nganing khavai chi khuining akha juira, khuining akha pākra kala kuimareida akhamong pāngmayāparkhara.

¹⁴Hanphut chiwui kajui: ngaleili rungkahai apam chieina thuilaga nemkhameiya akongnā kāshungda, khuining khani kala khuiningkha pāk jira; kala teokhamei akongnāwui eina thuilaga hakkhamei akongnā eina tangda, khuining matira, kala khuining akha pākra;

¹⁵hanphutwui mei sākhavai chi khuining matira; kala meiphung chiwui eina, khuining ava̱va̱ kasānga angaji mati nganingra.

¹⁶Hanphutwui meiphung chi khuining tharāda khanini asān-aret ngaraichāra.

¹⁷Akongnā chila asān-aret ngarida khuining tharāda matitira kuimareida tangkhaira, apheina khuiningkha jira. Hanphutwui chonkhavai zingshoshong ngareira.

¹⁸Kala ana ili hānga, “Miwui naomayara, Proho VAREna hithāda hānga: Hanphutwui ainbing hithāda sāra: Rikkatā kachigat pha̱khavai kala chili ashee kasirror khavai hanphut chi sākāthang,

¹⁹nathumna iwui ngalemli otram ngatha̱miki kaje Levishiwui pāngmonbing, Zadokshi shimkhurli suihamchigatwui vang mukkā akha khuimilu.

²⁰Kala nathumna chiwui ashee kateokha khuilaga hanphutwui angaji mati chili achikun matiwui akongnāli kala akhamong kuimareida neomira; chithāda hanphut chi samathākhuida chiwui vang pheomi khavai sāra.

²¹Nathumna suihamchigatwui mukkā chi khuida, kathara apam kānshokta, ngarān kahaipam chili riktāra.

²²Akhama kathā khangakhai makhalei mevā akha suiham chigatwui vang pha̱phayāra, kala mukkā eina tharkhangasak thāda chila sāpapamra.

²³Nathumna chi sāmathākup kahaiwui thili achuk kapei mukkā akha kala khangakhai makhalei yaovā akha da pha̱ra.

²⁴Nathumna chi PROHOwui mangāli khuirāra, kala pāngmona machi ikrorlaga PROHO wui vang rikkatā kachigat pha̱ra.

²⁵Suihamchigatwui vang nathumna shinithang me ava̱va̱ chigatlu; kala achuk kapei mukkā akha, khangakhai makhalei yaovā akha da mi jilu.

²⁶Shinithangwui vang athumna hanphut sākhamathā ot sāda maseikhuiki kajina kala tharngasaki kajina.

²⁷ Kala athumna zimikshobing hi kupkahaiwui thili, kachishatathang eina thuida pāngmonbingna nathumwui rikkatā kachigat, ningyatchigat pha̱kaphayā ot sāda ina khuisangmira da Proho VAREna hānga.”