Read Tangkhul Naga EZEKIEL 44 Bible Online

EZEKIEL 44 - Tangkhul Naga bible

EZEKIEL 44

¹Chiwui thili ana ili zingshoshong ngareikashoka kathara shimwui ngaveili thānshoka; kala chi shunghaisai.

²Kala ana ili hānga, “Ngavei hi shunghaichingra, mashohaipaimara, kala mi khipākha mazangpaimara; kaja PROHO Israelwui Varena chiwui eina zangkahaina; chiwui vang chi shunghaichingra kajina.

³Wunganaomāngna hiwui alungli pamda PROHOwui mangāli khamui shaipaira; ana shimphowui khāmong eina zangda chieina shokpapamra.”

⁴ Chiwui thili ana ili atungshongwui khāmongvāk eina khorumshimwui mangāli thānvai, kala ina yangkhavā eina, Varewui shim chi PROHOwui tekhamateina horchamri eina leisai. Chi theilaga ina mai mashunzanga.

⁵Kala PROHOna ili hānga, “Miwui naomayara, ningkachang eina namik eina yangkhuilu; kala Vare PROHOwui shimwui kakaso kala ain kala shiyan-chikan saikorawui pongli ina kahahāng hi mathāsek eina nganākhuilu; kala kathara shim hili zangkapai mi, mazangkapai mi chi mathālak eina machutkhuilu.

⁶“Kala ngakaikashe shimkhur, Israelwui shimkhur chili hānglu, Proho VAREna kahāngna: O Israelwui shimkhur nathumwui ningkakachai otsak chi chihohaolu;

⁷yur khangateiwui mi, wuklung ahui marimkashok mina iwui kathara shimli kazang tharan nathumna pha̱kaphayā ot, iwui kashakazā athao kala ashee makhao ngasaka. Nathumna sākhamāngda iwui tuingashit kaingasakhaira.

⁸Kala iwui kathara otla mamayonmana; kha yur khangateiwui mili iwui kathara shim mayon ngasaka.

⁹“Chiwui vang Proho VAREna hānga: Yur khangateiwui mi, ningla phasāla ahui marimkashok mi khipākha iwui kathara shimli mazangpaimana.”

¹⁰“Kha Israelna ma̱thui kahai tharan iwui eina yāmhaida meoma̱li kaphaning Levinaobingna chiwui tandi phungra.

¹¹Athumna iwui kathara shimli otram ngatha̱ra, khāmong khamayon ot sāda otram ngatha̱ki kajina; athumna mibingwui rikkatā kachigat kala pha̱kaphayā sāla athumna taithatta mibingli ngachonmira.

¹²Khikhalajila athumna mibing chiwui meoma̱bingli otram ngatha̱mida Israelwui shimkhurli pheingaphok khavai morei sāngasaka, chiwui vang eina, ina athumwui pongli ngashitta athumna athumwui tandi phungra da Proho VAREna hānga.

¹³Athum iwui ngalemli pāngmon akha sāda otram ngatha̱ khavai marāpaimara, lah iwui tharkhamatheng ot kala tharmathangmeikap kaje otbingli marānganaipaimara; kha athumna sākahai ningkakachai ot chiwui vang khayakphalungra.

¹⁴Chithālala ina athumli iwui shim mayonda chiwui ot yangmi khangayi kala sāmi khangayi sākhavai kapangsang kahaina.”

¹⁵“Kha Levi pāngmonwui ngachaili Zadokshi shimkhur, Israelnaobing ma̱thui kahai atamli iwui kathara shim khamayon athumle iwui ngalemli zangda otram ngatha̱ ngasakra; athumna ili otram ngatha̱mida athao kala ashee pha̱phayāra, da Proho VAREna hānga.

¹⁶Athumna iwui kathara shimli zangra, kala athumna iwui tabletungli rānganaida ili otram ngatha̱ra kala iwui ot sāra.

¹⁷ Athumna alunga kayāngli kazang tharan khamenga kachon ngavaikhuira, alunga kayānglila shimlunglila otram khangatha̱ tharan sahā kachon mangavaipaimana.

¹⁸Athumna khamenga kuitei teira, khamenga shānneira̱ neira, shairanra̱ shokkapai khaluma kachon mangavaipaimana.

¹⁹ Kala ayarshong yaruili kashok tharan otram khangatha̱ atamli khangavai kashankachon chi railaga kathara kāli haihaiki kajina, kala athumna kachon khangatei ngavaikhuira, maningakha tharkhamatheng chi athumwui kachon chieina kateili sāza̱haipaishina.

²⁰“Athumna kui masilakla phungki kajina lah samtan masangpaimara; athumna aton-tonmāng ngachammara.

²¹ Alungkayāngli kazang atamli pāngmon khipākha drakhāra̱ mamangpaimara.

²² Athumna ra̱meinaoli mangakumpaimara, lah sha̱naoli mapāngpaimara, kha Israel shimkhurwui mafakathui kachingva̱ sha̱nao, lah pāngmon akhawui rameiva̱li khuipai.

²³ “Athumna kathara eina yaruiwui ot khangatei hi iwui mibingli tamchitheiki kajina, kala kathar eina khamakhaowui khangatei hi athumna mibingli tamchitheiki kajina.

²⁴Khonzar khangarok atamli athumna mashun bichar sāmira kala athumna iwui ain athishurda bichar sāmira. Retmi kahai phanitli athumna iwui ain kala shiyan mayonphalungra; kala athumna iwui sabbath mayonra.

²⁵ “Athumna kathinaowui ngalemli vāda athum khalatta masākhamāngkhuipaimara; chithālala, ava̱ avāwui vang, anaongarāwui vang, kala, mafakathui azara̱ngarāwui vang sākhamāngpaira.

²⁶Sākhamāng kahai thili, zimiksho shinithang ngaranglaga tharkhuira.

²⁷Kala ana alungkayāng, kathara kāli zangthang, katharapamli otram khangatha̱ chitharan suiham chigat pha̱phalungra da Proho VAREna hānga.

²⁸“Athum shimlui mavaipaimara, I athumwui shimluina; Israelwui alungli nathumna athumli shimlui mayarpaimana.

²⁹ Tharāzat, suihamchigat kala khayonchigat athumna shaira; kala Israelli ningshida rākachigat saikora athumwuisera.

³⁰Atheiyur saikorawui matheikhare kala rāchigatkhare ot saikora chi athumwui sāra; kala nathum mahaimei khavai nathumwui hātkhuikhare chi athumli milu.

³¹ Vanao nilala, sā nilala, kathisā kala khazursā pāngmonbingna mashaipaimana.”