Read Tangkhul Naga EZEKIEL 45 Bible Online

EZEKIEL 45 - Tangkhul Naga bible

EZEKIEL 45

¹Nathumna ngalei khangayar tharan PROHO wui vang khuining thing maga̱da phangā kasāng, thing maga̱ kapāk akai akha yarshokmira kala chi kathara leikhai ngasāra; kala apam hi katonga katharana.

²Hiwui alungli asān-aret ngarithida khuining shāphangāngā eina tharkhamatheng apam sāra, kala chili kuimareida khuining hangphangā khamasai eina haihaira.

³Kathara luiyam chiwui alungthung khailaga akhali tharkhamatheng shim chi leiki kajina; chi tharmathengmeikap kaje apamna.

⁴Hi kathara apam sāra, PROHOli otram khangatha̱, katharapamli otram ngatha̱khami pāngmonbingwui sāra; kala chili athumwui shim sāra kala katharawui apam sāra.

⁵Akhum khangatei, khuining thingmaga̱da phangā kasang kala thingtharā kapāk Khorumshimli otram khangatha̱ Levibingwui sāra; keinungli chi athumwui shimluina.

⁶Kathara luiyamwui vang nathumna ngakheikhang haikahai chi khuining thingmaga̱da phangā kala apāk thingphangā eina thari sāra; hi Israel katongawui keinung sākhavaina.

⁷Kathara luiyamwui uishong yāshong, Israelnaobingwui lam vāshungda kala athumwui aretli ngarida tamkhuilaga chi wungnaowui lam sāra.

⁸Hi Israelli awui shimlui sāra. Kala iwui mi Israelnaobingli wungnaobingna marekharekluimara; kha ichichāshiwui shang athishurda Israelwui shimkhurli ngalei chi khuingasakra.

⁹“Proho VAREna hithāda hānga: Shaphaira, O Israelwui wungnaobing! Sāshida marekharekluialu, mashun kala khangarong eina bichar sāmilu, iwui mibingli kashamshang kashamtā masāluilu, da Proho VAREna hānga.

¹⁰ “Nathumna khān tamkhavai chi tin nilala, luk nilala khamashung khāntam singra:

¹¹“Kathenga otyur tamkhavai khuilui eina ara̱yur tamkhavai tin ngarithiphalungra, khuilui nilala, tin nilala, tharāna chumrānao akha sāra; kaja chumrānao hina kachangkhat theikapai khāntamna.

¹²“Shekel akhali gerah maga̱ leira; shekel phangāna shekel phangā sāra, shekel tharāna shekel tharā sāra; kala nathumwui minā akhana shekel hangphangā sāra.

¹³“Nathumna pha̱kaphayā sāki kaji chi hina: Kehu homer akhawui eina khuilui akhum tharukwui akha, napai homer akhawui eina khuilui akhum tharukwui akha,

¹⁴kala thao tāzak khavai (homer akhali bath tharā khalei thāda) cor akha bath tharāwui akhum akhara;

¹⁵kala shākhani khalei yaoshangwui eina yao akha da Israel shimkhurbingwui eina khuilu. Hi athumli pheomi khavai, tharāzat kachigat, rikkatā kachigat, ningyatchigat sākhavaina, da Proho VAREna hānga.

¹⁶“Mi saikora pha̱kaphayā ot hi Israel awungali miki kajina.

¹⁷Kala wungnaona Israelnao saikorawui vang, phanit atamli, sabbaththang, changwokthang, kala phanitthang, rikkatā kachigat, tharāzat kachigat, ra̱shak kachigat saikora hi khangarān samiki kajina. Kala suiham kachigat, tharāzat kachigat, rikkatā kachigat, ningyat kachigat, saikora hi Israel shimkhurli pheomi khavai ana ngarānmiserki kajina.”

¹⁸“Proho VAREna hithāda hānga: Kachāng kharewui zimiksho kharethang nathumna achuk kapei mukkānao akha khuilaga tharkhamatheng shim chi sāmathākhuilu.

¹⁹Pāngmonna suihamchigatwui ashee khuilaga khorumshimwui khāmongthingli hanphutwui akongnā achikun matili, kala alung kayāngwui pakra̱li neomira.

²⁰Kachikathāna matheimada sayonhaiakha, kachāng chiwui zimiksho kashinethang chi tākam eina sāpapamra; chithāda khorumshim chi sāmathākhuira.”

²¹ “Kachāng kharewui zimiksho tharāda khamatethang, nathumna makānkhamiwui phanit mayonra, kala shinithangwui vang khawok makazang khamui shaira.

²²Chithanga wungnaona, awui vang kala Israel katongawui vang suihamchigat sākhavai mukkānao akha chigatra.

²³Kala phanitwui shinithang chili, PROHOli rikkatā kachigat sākhavai, achukkapei, khangakhai makhalei mukkānao shini yaovā shini da ana mira; kala thangkachida suihamchigatwui vang yaovā ava̱va̱ chigatra.

²⁴Kala ana tharāzat kachigat sāda, sei; me kala thao lengkhor ava̱va̱ hiwui vang khuilui ava̱va̱rip chigatra.

²⁵ “Kachāng kashinewui zimiksho tharāda kaphangāthang, kala shinithang phanit kasā chiwui vang ana ngaraichāda suihamchigatwui vang, tharāzat kachigat kala thaowui vang chithāda michingra.”