Read Tangkhul Naga EZEKIEL 46 Bible Online

EZEKIEL 46 - Tangkhul Naga bible

EZEKIEL 46

¹“Proho VAREna hithāda hānga: Alungkayāngwui khāmong azingshoshong khangareipa chi zimiksho tharukthang shunghaichingra, kha sabbaththang eina changwokthang shohaira.

²Wungnaona shimpho khāmongvāk eina zangra, kala khāmongpheili nganingra. Pāngmonbingna awui vang rikkatā kachigat kala ningyatchigat pha̱mida ana khāmongpheili khorumra. Chiwui thili ana shokhaora, kha ngazin eina tangda khāmong chi shohaira.

³Sabbath eina changwokthang mibingna zangkhavai khāmong ngalemli PROHOli khorumra.

⁴“Sabbaththang wungnaona PROHOli rikkatā kachigat kapha̱ chi, khangakhai makhalei yaonao tharuk, yaovā akha jira;

⁵kala tharāzat kachigat sākhavai yao akhawui vang khuilui akha mira, kala ana kashap eina tangda tharāzat kachigatwui vang yaonao akha mira, kala khuilui akhawui vang thao lengkhorkha sangra.

⁶Chāngwokwui katharukathang, ana achukkapei mukkānao akha, khangakhai makhalei yaonao tharuk kala me akha mi jira;

⁷tharāzat kachigat tharan ana mukkā akha eina ngasoda khuilui akha, yao akha eina ngasoda khuilui akha; kala yaonaobing eina ngasoda ana kashap eina tangda mira, khuilui ava̱va̱wui vang thao lengkhor akharip sangra.

⁸Wungnaona kazang tharan, ana shimphowui khāmongvāk eina zangra, kala chieina shokpapamra.

⁹“Retmi kahai phanitli mibingna PROHOwui ngalemli kazang tharan, atungshongwui khāmong eina kazangpā china azingshongwui khāmong eina shokra; azingshong eina kazangpā china atungshong eina shokra; mi khipākhana zangkhavai chieina mashokpaimara, kha angatar eina shokki kajina.

¹⁰Athum kazang tharan, wungnaola athumli ngasozangra, kashok tharan ala ngasoshokra.

¹¹Phanitli kala ngashit kahai tamli, tharāzat kachigat sākhavai mukkānaoli khuilui akha, mevā akhali khuilui akha, kala yaonaowui vang mikashap eina tangda mira, khuilui akhali thao lengkhor akha ngaso jira.

¹²“Rikkatā kachigatwui vang nilala ningyatchigatwui vang nilala wungnao akhana ningyat eina thāda PROHOli chigatakha, zingshoshongwui khāmong chi awui vang shomira; kala awui rikkatā kachigat nilala, ningyatchigat nilala, sabbaththang kapha̱ thāda ana pha̱ra. Kala ana shokkahaiwui thili khāmong chila shunghaora.”

¹³“Ngathor kachida PROHOli rikkatā kachigat sākhavai ana kumkhawui yaonao khangakhai makhalei akha chigatchingra.

¹⁴Ngathor kachida tharāzat kachigat sākhavai eina ngasoda, khuilui akhawui sharuk tharukwui akha, kala mathir naikhavai thao lengkhor akhawui akhum kathumwui akha, PROHOwui vang chigatchingra; hi machatlakla chikatki kaji rikkatā kachigatwui sharphahorbingna.

¹⁵Chithāda, ngathor kachida, yaonao, kashakazā kachigat kala thao machatlakla rikkatāchigat sākhavai ngarānmiphalungra.

¹⁶“Proho VAREna hithāda hānga: Wungnaona anaongarāli shimlui ngayarmiakha chi athumwui sāra, chi shimluikat athishurda kakhuina.

¹⁷Kha ana awui raobingwui ngachai eina akhali awui shimlui yarakha, chihokhami kum eina tangda khuimara; awui naomayarabingmāngna khuichangki kajina.

¹⁸Wungnaona mibingwui shimlui makhuipaimara; athumwui apam eina makashamshokpaimara, awui naomayarali khayar chi awui shimlui khalei chiwui eina miki kajina, chithāda iwui mibing khipākhawui eina mangapaikhuipaimara.”

¹⁹Chiwui thili ana ili pāngmonbingwui kathara khāmong atungshong eina thānvāda zingtun vāmeimeikap kaje chili apam akha thei.

²⁰Ana ili hānga, “Suihamchigat, khayonchigat pāngmonbingna han hangkhavai pam chi hina; athumna khuilaga hili naira, kaja kayāng ayārshong mibingna kathara ot chi masāmakhao khavaiwui vangna.”

²¹Chiwui thili ana ili yāngreishong shokta, ana ili achithek matili thānvai, kala achithek matili thanvāda chili kayāng ava̱va̱ leisai.

²²Kayāngkharei chiwui achithek matitili kayāng katenao ava̱va̱ khalei chi khuining hangmati sānga, kala thumrā pāka, matiti chi ngarithisera.

²³Kayāngnaowui arapli lungkhor akharip leisera, kala chiwui khanema chili meithalung shomhai.

²⁴Chiwui thili ana ili hānga, “Khorumshimwui otram khangatha̱bingna pha̱kaphayā hangkhavai chakshang chi hina.”