Read Tangkhul Naga EZEKIEL 47 Bible Online

EZEKIEL 47 - Tangkhul Naga bible

EZEKIEL 47

¹ Chiwui thili ana ili khorumshimwui khāmongli thānunglui, kala yanglu, khāmongpheiwui eina tara̱ zingshovāk okshoksai (kaja khorumshim chi zingsho ngareiya); kala tara̱ chi zingtun khāmongthingpheizingwui eina hanphutwui azingshong longtai.

²Chiwui thili ana ili atungshongwui khāmongvāk eina thānshoka, kala zingshoshong khalei ayar ngaveivāk thānvai, kala tara̱ chi azingshong shoksai.

³Tamkhavai khara̱ akha singlaga zingshoshong mipā china khuining thingkha shikha tamkhui; kala ili tara̱lungli thānzangda pheikhumrankha kai.

⁴Chiwui thili ana khuining thingkha tamvālui, kala ili tara̱ chili thānvai; kala khuksaorankha thuka. Latluida ana khuining thingkha tamkhuilaga ili thānvalui, chile kashanrankha thuka,

⁵Latluida ana thingkha tamkhuilui; kala chili kong leisāhaoda I makānrarthuwa; kaja tara̱ kathuk chi mara̱yākakha makānkapai kong sāthuihaowa.

⁶Chieina ana ili, “Miwui naomayara, hi theihairala?” da hānga. Chiwui thili kongpheili thānvālui.

⁷Ina vālui kaji eina kongphei khaninili thingrong kachungkha phorkasā thei.

⁸Kala ana ili hānga, “Kong hi zingshoshong longvālaga Arabahli azanga; kala tara̱ khangarungpamli hi akazang eina mathingserhaowa.

⁹Kala tara̱ hina vākashung pam kachiva̱li manglākapaiyur mathimara, khaihla kachungkha zangra; kaja tara̱ hi akazang eina shamadruwui tara̱ mathing khavaina; chithāda chili khalei saikora kharing samphangra.

¹⁰Khaikaphānaona shamadrupheili nganingra; En-gediwui eina thuilaga En-eglaim eina tangda khailan khangkhavai pam ngasāra, Great Sea thāda khaihyurla kachungkha zangra.

¹¹Kha rāpurpam khangavātpamwui tara̱ mamathingmara; athum chiva machi khuikhavaipam sāra.

¹² Kala kongphei khaninili shaikapai atheirong kachungkha phorra. Athumwui anahla mangahuilakmara, atheila matheichingra, kachāng kachida athei kathar matheira, kaja chili khalonga tara̱ chi tharkhamathengpamwui eina katāna. Athei chi kashakazā sāra, anahna ari sāvaira.”

¹³Proho VAREna hithāda hānga: “Israel shang tharāda khaniwui shimlui ngayarkhami chiwui thari hithāda sāra. Josephna akhum khani khuira.

¹⁴Kala nana ngaraichā eina ngayarmilu; Ina navā ngarāli mira da ngashit kahai hi nathumwui shimlui sāki kajina;

¹⁵“Lam chiwui thari hithara: Atungshong, Great Sea eina thuilaga, Hethlonshong Hamath vāzang khavaivāk, Zedad,

¹⁶Berothah, Sibraim vāshungda (Damascus eina Hamathwui ngachaili), Hauranli khalei Hazer-hatticon atharikhuira.

¹⁷Chithāda shamadru eina thuilaga atungshong Damascus eina Hamathwui ngachaili khalei Hazar-enon vāshungra. Hi azingshongwui tharina.

¹⁸“Zingshoshong, Hauran eina Damascus ngachaili khalei Hazar-enon eina thuilaga, Gilead eina Israelwui ngachai Jordan pharonda zingshoshongwui shamadruvāk Tamar vāshungra. Hi zingshoshongwui tharina.

¹⁹“Azingshong, Tamar eina thuilaga Meribath-kadeshwui tara̱ vāshungda, chiwui eina thuilaga Egyptwui Kong pharonda Great Sea vāshungra. Hi azingshongwuina.

²⁰“Zingtunshong, Great Seana Hamathwui zangkhavai shong kāroda thari sāra. Hi zingtunshongwuina.

²¹“Nana hithāda nathumwui alungli Israel shang-shangwui athishurda ngayarmira.

²²Nathum saikora kala nathumli ngasopamda nao pharāsang kahai athum saikoralila ngayarmiserki kajina. Athumla Israelshang thāda luichumnaosera; chiwui vang athumlila Israel shangli khayar thāda yarphalungra.

²³Khipāshikha shangli zanglala athumwui shimlui nana yarki kajina da Proho VAREna hānga.”