Read Tangkhul Naga EZEKIEL 48 Bible Online

EZEKIEL 48 - Tangkhul Naga bible

EZEKIEL 48

¹Shang-shangwui aming chi hina: Atungshongwui thari eina thuida, Hethlon vākhavai shamadru eina haophoklaga Hamath zangkhavai Hazar-enon vāshungda (Atungshong Damascus eina Hamathwui thari), kala zingsho eina thuilaga zingtun vāshunga, chi Danshiwui yarna.

²Danshiwuili ngasunkhuilaga, zingshowui eina thuilaga zingtun vāshungda Ashershiwuina.

³Ashershiwui eina thariphunglaga zingsho eina thuilaga zingtun vāshungda, chi Naphtalishiwuina.

⁴Naphtalishiwuili ngasunkhuilaga, zingshowui eina thuida zingtun vāshungda, chi Manassehshiwuina.

⁵Manassehshiwuili ngasunkhuilaga, zingshowui eina zingtun vāpeida, chi Ephraimshiwuina.

⁶Ephraimshimwuili ngasunkhuilaga, zingshowui eina zingtun vāpeida Reubenshiwuina.

⁷Reubenshiwuili ngasunkhuilaga zingshowui eina zingtun vāshungda Judahshiwui sāra.

⁸“Judahshiwuili ngasunkhuilaga, zingshowui eina zingtun vāpeida, tharkhamathengpam sāki kaji, aret khuining thingmaga̱da phangā kahaka, kala zingshowui eina zingtun vāshungda shang-shangli khami chili ngaranthan kaji apam chi hina.

⁹“PROHOwui vang nathumna phaishoki kaji lam chi, asān khuining thingmaga̱da phangā, aret thingmaga̱ jira.

¹⁰Hi katharapamwui lamna: pāngmonbingna, atungshong, asān khuining thingmaga̱da phangā, zingtunshong khuining thingtharā, zingshoshong thingtharā da khui, kala PROHOwui tharkhamathengpamvāk azingshong khuining maga̱da phangā.

¹¹Hi tharchigat kahai Zadokwui naomayarawui vangna; kaja Israelnaona kala Levinaona mama̱kathui thāda athumna mama̱thuimana.

¹²Hi athumwui vang eina phaishok kahai lamna, Levinaowuili tharikhuida tharmathengmeikap kaje apamna.

¹³Pāngmongbingwuili ngasunkhuilaga Levinaowui lam, asān khuining thingmaga̱da phangā, aret thingtharā jira. Katonga asān khuining thingmaga̱da phangā, aret thingmaga̱na.

¹⁴Hi athumna khayorla mayorpaimana, khangatha̱la mangatha̱paimana; mi khangateili mamipailakmana kaja, hi PROHOwui vang kathara apamna.

¹⁵“Katei aret khuining thingphangā, asān thingmaga̱da phangā hi keinungwui ot khangatatei sākhavaina. Shimla sāpai, kayāng sādala haipai. Alungli keinung akha leira;

¹⁶ kala chiwui asān-aret; atungshong khuining thingmati shāphangā, azingshong thingmati shāphangā, zingtunshong thingmati shāphangā, kala zingshoshong thingmati shāphangā jira.

¹⁷Keinung chiwui kuikhamareili kayāng leira: Atungshong khuining shākhani hangphangā, azingshong shākhani hangphangā, zingtunshong shākhani hangphangā, kala zingshoshong shākhani hangphangāna.

¹⁸Katharapamli ngaran khavai, taida khalei chi zingshoshong khuining thingtharā, zingtunshong thingtharā lei. Hili kashok kashakazā chi keinungli ot kasābingwui vang sāra.

¹⁹Kala keinungli ot kasābing, chiya Israelwui shangnao saikorawui eina, athumna vāsangra.

²⁰Katharapam, keinung katonga zangda, nathumna phaishokki kaji chi, asān-aret khuining thingmaga̱da phangā eina kuira.

²¹“Katharapamwui kala keinungwui shimlui ngalem uishong yāshong khalei chi wungnaowui shimlui sāra. Tharkhamatheng pam chili ngarānda zingshoshong zingtunshong, khuining thingmaga̱da phangā kala shang-shangli khami chili ngalengda khalei lam hi wungnaobingwui sāra. katharapam chiwui alungli tharkhamatheng shim chi leira.

²²Kala keinungwui kala Levipāshiwui lan chi awungawui shimlui lungli leira. Awungawui shimlui chi Judah eina Benjaminwui ngachaili leira.

²³“Mangarinrang kaje shang kateibingwui vang: Zingshowui eina thuilaga zingtun vāshungda Benjaminwuina.

²⁴Benjaminshiwuili ngasunlaga zingshowui eina zingtun peida Simeonshiwuina.

²⁵Simeonshiwuili ngasunkhuilaga, zingshowui eina zingtun peida Issacharshiwuina,

²⁶Issacharshiwuili ngasunkhuilaga, zingshowui eina zingtun peida, Zebulunshiwuina.

²⁷Zebulunshiwuili ngasunkhuilaga, zingshowui eina zingtun peida Gadshiwuina.

²⁸Kala Gadshiwuili ngasunkhuilaga, azingshong Tamarli thariphunglaga Meribath-kadesh tāshunga, chiwui eina Egyptwui Kong pharonvāda Great Sea tāshungra.

²⁹Hi Israel shang kachiva̱li ngayarmiki kaji lamna, kala ava̱va̱ shili hithāda ngayarmiki kajina, da Proho VAREna hānga.

³⁰ “Keinungwui eina shokkhavai apong chi hina: Atungshong, khuining thingmati shāphangā kasānga chili

³¹ ngavei kathum leira, Reubenshiwui ngavei, Judahshiwui ngavei, kala Levishiwui ngavei; keinungwui ngavei kachiva̱ Israel shang shangwui aming phokra.

³²Zingshoshong, khuining thingmati shāphangā kasang chiwuili ngavei kathum; Josephshi ngavei, Benjaminshi ngavei kala Danshi ngavei.

³³Azingshongwui khuining thingmati shāphangā kasānga chiwui ngavei kathum; Simeonshi ngavei, Issacharshi ngavei, kala Zebulunshi ngavei.

³⁴Zingtunshong, khuining thingmati shāphangā kasāng chiwui ngavei kathum; Gadshiwui ngavei, Asheshiwui ngavei kala Naphtalishiwui ngavei.

³⁵Keinung chiwui kuikhamarei khuining thingtharāda chishatna. Kala ara keinung chiwui aming, PROHO chili lei, da hora.”