Read Tangkhul Naga EZEKIEL 9 Bible Online

EZEKIEL 9 - Tangkhul Naga bible

EZEKIEL 9

¹Chiwui thili ana ikhanāli panglāk eina vaosangda hānga, “Keinungwui shaokathatabing, kachichāwui sāshimān khavai khutlai singripta rānganailu.”

²Kala yanglu, mi tharuk, atungshong ngareikashanga ato ngaveishongwui eina, kachichāwui sāshimān khavai khutlai singlaga rai kala chili mi akha, khamenga kachon ngavai, lairik kapi khavai akha singda athumli ngasoda rai. Athumna zangda pithrai hanphut ngalemli nganinga.

³Chitharan Israelwui Varewui tekhamatei cherubimwuitungli leikasā chi atungshong kāhaowa; kala kachon khamenga khangavaia, lairik kapi khavai kasingapā chili ana hoi.

⁴ Kala PROHOna ali hānga, “Jerusalem keinung peida kuivālu, kala chiwui alungli ningkakachai ot kasā theilaga ngahuida ringkhangā athumwui khaveili leishai chukmihailu.”

⁵Kala khangateibingli kahāng chi ina shai, “Awui thili keinung kuimareida vālaga ashaothatlu; khipālikha mayangkheipaimara, kala nathumna lukhamashanla machitheipaimara;

⁶kasarnao, yaronnao, sha̱nao, angangnao, kala preinaobingli ngalāngda sāthatserhaolu; kha leishai kachukbing khipālikha masāza̱paimara. Kala hi iwui kathara shim eina sāphoklu.” Chieina athumna shimli khalei khararnaobing chili shaothatphoka.

⁷Chiwui thili ana athumli hānga, “Shim hi sākhamānghaolu, kala kayāngla mingun eina pemngasaklu. Ot sāphokulu!” Chieina athumna keinungli khaleibingli shaothatvai.

⁸Athumna sāthat mahunglakha imāngli chipamhaowa, ngakhumshāmhaida ina vaoda hānga, “Iya, Proho VARE! Jerusalemli nawui malungkhavāt heishokta Israelwui katai saikora sāthatserhaorala?”

⁹Chieina ana ili hānga, “Israel eina Judahwui shimkhurna yonkahai hakmahākachangkhata; ngalei ashee eina pemhaira, kala keinung mashun makhaning otsakna pemhaira, kaja athumna, ‘PROHOna, ithumwui ngalei horhaira, kala ana matheimimana’ da hānga.

¹⁰Iwui vanga, imikna mayangkheiluilakmara, lukhamashanla maleiluimara, kha athumwui otsak athishurda sāman mira.”

¹¹Kala yanglu, kachon khamenga khangavaipā kala lairik kapi khavai singkazatapā china pao khuirāda hānga, “Nana ili kakaso thāda ina sāhaira.”