Read Tangkhul Naga DANIEL 1 Bible Online

DANIEL 1 - Tangkhul Naga bible

DANIEL 1

¹ Judahwui awunga Jehoiakimwui mungda kakathuma kum, Babylonwui awunga Nebuchadnezzarna Jerusalemli rākuinamhaowa.

² Kala Judahwui awunga Jehoiakimli PROHOna Nebuchadnezzarwui pāngli Varewui shimli kahai khorkhong kaikha eina ngasoda horsangmihaoda Shinar ngaleili awui khorumshimli khuiunglaga awui varebingwui lan kazipshimli unghaiserhaowa.

³Chiwui thili awungana awui akhoka ahonga Ashpenazli, Israelwui mibing, chiya wungnao shimkhur eina khayākakā shimkhur khaniniwui eina mi kaikha khuirālu da kasoi,

⁴athumwui ngachaili, kanghāngri kahai, mayar khamathā otsak saikorali thangkhamei, awor kathema, mashunmakhui theithangkhama, kala awungawui keinungli otram ngatha̱kashapa mibingli Chaldeanaowui tui kala mayek tamchithei khavai kasoi.

⁵Awungana athumli mathāmeithui kaji kashakazā kala ana khamang drakhāra̱ thangkachida mishak-mizā khavai ngarānmi. Athumli kum kathumwui vang lairik chishutra, kala atam ungkashung eina awungawui mangāli khuirāki kajina.

⁶Athum chi Judah shangnaowui eina Daniel, Hananiah, Misha-el, kala Azariah hibingna.

⁷Kala akhoka ahonga china athumli aming phokmida Danielli Belteshazzar, Hananiahli Shadrach, Michaelli Meshach, kala Azariahli Abednego hoi.

⁸Kha Danielna awungawui shaikaphā mangkaphā kashakazā kala drakhāra̱ chi manglaga masākhamāngmara da nganingtithaowa; chiwui vang eina akhoka ahonga chili ali masākhamāngmi khavai poi.

⁹Kala Varena akhoka ahongawui mikyanli Danielli lumngasaka;

¹⁰kala akhoka ahonga china Danielli hānga, “Awungana milu kaji kashakazā chi mazāmada nawui tholā yaron khangateibingli nawui phasā ngazanmeihaipaishinada ngacheeya. Awungana ikui rangmihaipai.”

¹¹Chieina, Danielna athumli kaja Daniel, Hananiah, Mishael, kala Azariahli yangmi khavai akhoka ahongana phāsangkahaia otram ngatha̱khame chili ahānga,

¹²“Narao ithumli tharāthangwui vang hanthing-hanrā eina tara̱māng milaga khayangkhuimilu.

¹³Chiwui thili awungawui kashakazā kazābing eina ithumwui azak kala phasā yanglaga theikakhui athishurda sāmilu.”

¹⁴Chieina ana athumwui tui khuida tharāthang sāyanga.

¹⁵Tharāthangwui thili khayang eina awungawui kashakazā kazā saikorali, azakla, phasāla athum mati phāmeikharhaowa.

¹⁶Chieina otram ngatha̱khame china awungawui kashakazā kala athumna mangki kaji drakhāra̱ chi khuithuimihailaga hanthing-hanrāmāng mi.

¹⁷Athum mayar mati chili Varena lairik kathemla aworla kachungkha ngarumsangmi; kala Danielna mang kala khamahā saikora theishingkhuikashap lei.

¹⁸Atam ungkashung eina awungana kakaso athishurda akhoka ahonga china athumli Nebuchadnezzarwui mangāli khuivai.

¹⁹Athum saikorali awungana ngazekyangserlaga, awungawui mangali khanganingbingwui ngachaili athum mati kaja Daniel, Hananiah, Mishael, kala Azariah, athum kathā khipākha mazangmana.

²⁰Awor ayāyāva̱ ngahānlaga wungramli khalei mahei kathembing, laivā kathembing, khanong sākatheibingli athumna tharā shida themmeihaowa.

²¹Kala chithāda Danielna awunga Cyruswui mungkhare kum eina tangda pamsai.