Read Tangkhul Naga DANIEL 10 Bible Online

DANIEL 10 - Tangkhul Naga bible

DANIEL 10

¹Persiawui awunga Cyrusna mungda kakathuma kum, Belteshazzar kaho Danielli tui akha rāphong chithei. Kala tui chi mashunga, chi haklāk kahai raireiwui ponglina. Kala ana tui chi theishingkhui kala khamahā chi theikhuichaowa.

²Chikachāng haptā kathum peichaoda Daniel ina sifapama.

³Shaikaphā, zākaphā, sā kala drakhāra̱ ikhamorli akhala masangmana, kala ikhalatta kuilila haptā kathum peichaoda thao maneomana.

⁴Kachāng kharewui zimiksho maga̱da khamatethang, ina kahaka Tigriswui kongpheili nganingda leilakha,

⁵ ina imik yangkakā eina, yanglu, khamenga kachon ngavaida Uphazwui sinā eina kasā shānneira̱ neilaga mi akha thei.

⁶Aphasā beryl thai, amai rikhān khangashei thai, amik meiwon thai, pāngthei eina pheithei ruimaling kahai pithrai thai, kala awui akhon mi tarākhawui akhon thai.

⁷Khamahā chi Daniel imāngna thei, ili khangasobing chiya matheimana; athumli khangacheena pemhaida athum khalatta ngathum khavai yāmhaowa.

⁸Chieina imāngli nothahaida hakkhamahā khamahā chi yangpama, kala I yāng kānhaowa; iwui kahora maipān onching onhaowa, kala I pangshap maleithuwa.

⁹Chiwui thili awui tuikhon ina shai; kala awui akhon chi kashā eina I ngaleili ngakhumshām eina pivāhaowa.

¹⁰Kha yanglu, pāng akhana ili rāsāza̱da ipāng eina khuksao kathirthirda thuingawokhui ngasaka.

¹¹Kala ana ili hānga, “O Daniel, leishikhai kahaia mi! Ina nali kahāng tui hi khuisanglu, ngatarda thuinganinglu, kaja ili nawuili chihokharāna.” Ana tui chi hāngmamānlakha ina kathirriri thuinganinga.

¹²Chieina ana ili hānga, “Mangacheealu Daniel! Theishingkhui khavai nana khayāshida Vareli ning horsang kharethang eina thuida, nawui tui shāmihaira, nawui tuiwui vang kharāna.

¹³ Persia wungramwui wungnaona ili maga̱da akhathangwui vang nganingphinmihaowa, kha wungnaobingwui khareia Michaelna ili rāngachonmida, Persia wungramwui wungnaoli ngasoda chili nothāhaida kharāna.

¹⁴Kala naoda nawui mibingli khi shokra̱khala kaji nali hāngchithei khavai kharāna. Kaja khamahā hi rārāda khalei atamwui vāngna.”

¹⁵Tui chiwui athishurda ana ili hāngkahai chitharan, ina mai ngaleizingshong mashunzanga kala khak mashokthuwa.

¹⁶Kha yanglu, miwui naomayara kathā akhana imorchaili rāsāza̱ya; chieina ikhamor makāda matuipaihaowa. Iwui mangāli khanganingpa chili ina hānga, “O iwui amei, khamahā hiwui vang eina ili phasā kachot samphangda I yāng maleithura.

¹⁷Ameiwui raona ameili kathāda ngazekrarrakhala? Kaja ara ili yāngla maleithura, kala khaksuila maleithura.”

¹⁸Latluida mizak thāda kathei akhana ili sāza̱da pangngasaklui.

¹⁹Kala ana hānga, “O leishikhailak kahaia mi, mangacheealu, nali chingrihairanu, pingmeida malung zangmeilu.” Kala ana ili kahāng eina I pangsanghaida chieina hānga, “Ishameina hāngmilu; kaja nana ili pangngasakhaira.”

²⁰Chieina ana hānga, “Ina nawuili khiwui vang kharākhala da na theila? Ara ina Persia wungramwui wungnaoli ungngararra; kala ina ali sāshimān kahai eina Greece wungramwui wungnao rāra.

²¹Kha khamashunga lairikli khi kapisanghailikhala kaji ina nali hāngra: nawui wungnao Michael maningla, ili khangashika wungnaobing khipākha maleimana.”