Read Tangkhul Naga DANIEL 11 Bible Online

DANIEL 11 - Tangkhul Naga bible

DANIEL 11

¹Medewui Dariusna mungkhare kum ina ali pangshap sangmi.

²Ara ina nali mashun tui chi chitheira. Yanglu, “Persiali awunga kathum shokluira, kala khamate chi athumli shāngmeikharra; ana shānghaoda pangshap leikahai tharan Greece wungram sheikhayāngra.

³“Chiwui thili pangshap khaleia awunga akhana mungda awui sākhangangai sāra.

⁴A nganingshap kaji eina awui wungram ngayānghaida mati sāda zingsho, zingtun, atung kala azingda ngayaryānghaora, awui theisāna makhuimara, kala ana khamung thāda maleiluimara; kaja awui wungram ngapaikhuida khangateili mihaora.

⁵“Chiwui thili azingwui awunga pangshunhaora, kha awui wungnao akha ali pangmeida shokra kala awui wungram hakshunra.

⁶Zingkum kasha̱khawui thili athum mashit ngarokta azingwui awungawui naongalāva̱na atungshongwui awungali chingrihai khavai favāra, kha athumwui khamashit mapongmara. Ala, gaharala, awui naola, kala ali ngasokhavā raobing saikorala sāthatserhaora.

⁷Chiwui thichangli ngalāva̱shi shimkhurwui theisā akhana awunga phungra. Ana atungshongwui awungawui raimili rai tāra, raipan shangkaida ana yuira.

⁸Kala ana athumwui varebing, pāng eina sākakhui, sinā lupāwui meoma̱bing kala khorkhong Egyptli phungkortāhaora; kala atam kasha̱kha atungwui awungali rai masāmara.

⁹Chiwui thili atungshongwui awungana azingwui awungali rai atāra kha awui ngaleili latungluihaora.

¹⁰“Awui naomayarana raimi kachungkha kazipkhuida rai sāra, athum pemtha̱-pemtaida rāra, kala latluida awui raipan eina tangda ngarar-ungluira.

¹¹Chieina azingwui awungana malungvātta atungshongwui awungali ngararra, ana mi sorkhangasai kazipkhuida ngararra, kha mayuimara.

¹²Kala mi sorkhangasai khuikahaiwui thili awui ning mathānra, kala ana mi thingthing chihorāra, kha mayuimara.

¹³“Kaja atungshongwui awungana kharewuili chungmeida sorkhangasai kazipkhuira, kala kum kasha̱khawui thili, ana raimi kala kashakazā khutlai peilāk eina ngararra.

¹⁴Atam chitharan azingwui awungali kachungkhana mamayāmara; kala nathumwui ngachaili sākashe mibingla athum khalatta khamahā hi ungshung khavai thuingararra; kha athum mararmara.

¹⁵Chieina atungshongwui awungana rākuinamda, raipan sākharik kahai keinung khuithuihaora. Kala azingshongwui raimi manganingthukluimara, ana hākakhui raimibingla nganingkham khavai pangshap maleiluimara.

¹⁶Kha ali rākhangarara china awui sākhangai rāsāra, kala ali khipākha mangasungrarmara; kala ana tekhamatei lam awui sāda pangshap saikora awui pāngli leira.

¹⁷“Ana awui raimi saikora thānrāda chingri eina pānrum khavai anao ngalāva̱ akha mira, kha china awui vang manganingrarmara lah khikha masāvaimara.

¹⁸Naoda ana shamadrupheili khalei apamshong mai ngareivāra, kala athum kachungkhali khuira; kha raimi kathāna akhana awui lāngkaso tangngasakhaora kala ana awuitungli lāngsoshānra.

¹⁹Chiwui thili awui lamli latungra; latungda awui raipanli kashimān shokra kala kali vāhaokhala da matheiluimara.

²⁰“Chiwui thili awui mahut akha shokra kala ana wungram tekmatei khavaiwui vang shaih ngashai khavai khangashaia chihora; kha zimiksho kasha̱khawui thili a thihaora, hi malungkhavāt kala rai eina maningmara.”

²¹“Awui thili wungnao makhaning shāt kakā awunga akha rāra; yansāngsa̱ eina khalei atamli kashuirak phāreksek eina rāra.

²²A kharā tharan yangkashi saikorali zakshilāk eina yuira, ngashit kahai wungnao chilila yuira.

²³Kala ali ngashikphokkhaleowui eina minamlak eina ana sāra; kala ana mi kateokhamang eina pangshapa ngasāhaora.

²⁴Hāngkhamathin maleilakla ana ngalei tummeikap kaji pamli vāda, avāva̱ ngarāna, kala avā ngarāwui avāva̱ ngarāna makasā ot chi ana sāda ngaponkakhui thongthāng awui thi kashurbingli ngayarmiserra. Ana raipanbing sākhai khavai ngarānra, kha kasha̱khawui vangmara.

²⁵“Kala ana raimi kachungkha thānda awui pangshap chishotta azingshongwui awungali rai tāra, kala azingshongwui awungana sorkhangasai raimi thānda ngararra, kha a mangasungrarmara kaja awuitungli makaphā apong ngarānhaora.

²⁶Ali phazākhangarumbing eina tangda awui vang makachangthura; awui raimibing yaikachuptāhaora, kala kachungkha thira.

²⁷Awunga khani chi phazāngarumlala, ningphum otsak ngatei ngarokra kala ani eina ani kapik ngarokra. Anina ningkachāng chi masamphangmara, khikhalajila chiwui atam marāranga.

²⁸Kala ana ot kachungkha khuida aramli latungra, kha awui ningva kathara tuingashit chili mamayāchingmara. Awui sākhangai sāda awui ngaleili latungra.

²⁹“Atam ungkashung eina ana azingshong tāluira; kha kharewui mathāmara.

³⁰Kaja Kittimwui jahas ali ngasung khavai shangngarokra, chieina ana ngacheeda hanthuihaora, kala malungvavāt eina kathara tuingashit chi sāshimān khavai sāra. Kala kathara tuingashitwui eina ngareithui kahaibingwui kahāng khuisangtha̱ra.

³¹ Awui eina raimibingna rāda khorum khavaishim, kala raipan sāmakhaora, kala rikkatāchigat chikatching kaje hanphut chila khuithuihaora. Kala chili shimān khavaiwui ningkakachai ot chi athumna sakāra.

³²Tuingashit chi kaida ot kasābingli ana sotkhamasao tui eina suikhuira; kha Vareli katheia athumna nganingtitta ngararra.

³³Atam kasha̱khawui vang raighai, meilung, tukkathui kala sākashimānli tāzangsālala, athumwui alungli thangkhamei kathānabingna yaruili theikhui ngasakra.

³⁴Athumna tākazang tharan, athum khangachon teomeikha samphangra. Kala kachungana athum khalatta sotmasaoda chibingli zangrumra;

³⁵kala athumwui ngachaili kachikathā thangkhamabing kongluira, athumli sāmathāda tharkhui khavai, kala atam maungranglakha eina tangda charkhavai, kaja retsang kahai atam chi leifaya.

³⁶ “Kala awungana awui ningkhān eina sāra, akhalatta varebingli pangshap reimei kaji chitheira, kala varebingwui Vareli mahāngkhamararao tui kachungkha hāngra. Malungkhavat makupranglakha eina tangda ana reisangra; kaja ngarān kahai athishurda ungshungphalungra.

³⁷Ana avāva̱ ngarāwui varebingli lah sha̱naobingna leikashelila mahengsangmara; ana vare khipākhalila mahengsangmimara; kaja ana hakmeithuiya da khalatta sora.

³⁸Hibingwui mahutle ana raipanwui varebingli khayāshira, kala avāvā ngarāna makathei vareli sinā, lupāsā, aman kasaka lunggui kala aman kasaka ot ana chigatra.

³⁹Ana pangmeikap kaje raipan chi makatheia khangateiwui varebingwui pangshap eina ngararra; ali khamayābingli ana khayā kāngasakra. Ana athumli khamunga sāngasakra kala lamla aman milaga ngayarmira.

⁴⁰“Khangachanga atamli azingwui awungana ali rai tāluira; kha atungshongwui awungana siguigari, sigui raimi, kala jahas kachungkha eina siphan thāda rāra, kongra̱ kathui thāda ana ngalei kachungkhali rai tāra.

⁴¹Ana tekhamatei ngaleili rāra. Kala mi thingthing pitāra, kha hibing hili awui pāng eina kanmira: Edom eina Moab kala Ammon ngayarda makhuimara.

⁴²Ana kha̱wungbingli apāng katingvāra, kala Egyptwui ngalei mayāmshokmara.

⁴³Ana sinā kala lupāsā kazip khavaiwui khamunga ngasāra, Egyptwui aman kasaka otbingla; kala Libya eina Ethiopiala awuili maron maron shurvāra.

⁴⁴Kha zingshoshong eina atungshongwui pao shālaga a ngacheehaora, kala malungvavāt eina kachungkha shimān khavai sākathāna.

⁴⁵Kala ana awui kachonshim shamadru eina kathara kaphungwui ngachaili sākāra; kha chithālala awui khangachang atam rāra, ngachonmi khavai khipākha maleisāmara.”