Read Tangkhul Naga DANIEL 4 Bible Online

DANIEL 4 - Tangkhul Naga bible

DANIEL 4

¹Nebuchadnezzarna okathuili khalei miyur saikora, tuiyur khangatatei saikorali kahāng: Chingri kahai nathumli mataisangranu!

²Reimeikap kaje Varena ili chitheikhami khudam kala matakhak kahai chi nathumlila kachithei khamathā ot akhana da phaninga.

³Awui sākachithei hakkhamahā! Awui pangshap matakhak kahai! Awui wungram katang mavaimana, kala awui ngalei thot kachiva̱ vāpei.

⁴Nebuchadnezzar, imāng keinungli ringphālak eina okthuida yansāngsa̱ eina leisai.

⁵Ina pilakha mang akha shimana, kala mang china ili ngachee ngasaka; kala khamahā chi theilaga malung tātung ngasaka.

⁶Chiwui vang eina Babylonli khalei thangkhama saikora hokhuida mang chiwui kakhalat hāngmi khavai hukhum akha miya.

⁷Chieina laivā kathembing, ningyo kathembing, Chaldeanaobing kala kachāng sirāli machukkatheibingli kahāng eina athumna chiwui kakhalat mahāngmirarthuwa.

⁸Naolak eina iwui varewui ming kaphoka Belteshazzar kaho, manglā katharana ngasokhame Daniel rai; kala ina ali,

⁹O Belteshazzar, maheikathem saikorawui akhavā, kathara varebingwui manglāna nali ngasomi, kala kathuka tui nawui vang sakkhanā maleimana da ina thei. Ili kashiman mang chi hina, mang chiwui kakhalat hāngmilu.

¹⁰“Ina pida leilakha ili mahākhami chi hina: Ina thei, yanglu, okathuiwui alungthungli thingrong kajuiva̱ akha phorsai.

¹¹Kala thingrong chi haksangda kahakva̱ sāthuihaowa, kala aton kazing kāzokta okathui apam kachiva̱li thei.

¹² Thing chiwui anahla mathāshuna, atheila kachungkha matheida saikorana kashai samphanga. Sāyurbingna chiwui khaya̱li ngasāmkhui, kala paikazata vānaobingna thingphāngli ngayinkhui; kala manglākapai kachiva̱na zākhavai samphanga.”

¹³“Ina pida leilakha mangshongli, khamayona, kathara mi akha kazing eina katā thei.

¹⁴Ana panglāk eina vaoda hānga, ‘Thingrong chi ta̱teklaga aphāng thapserhaolu,’ anahla thaplaga athei katonga herkathānhaolu; sāyurbing khaya̱li mapamluiaranu, vānaobingla aphāngwui eina yāmhaoranu.

¹⁵Kha thingngun chiya mariphek kala pithraiphek eina khalaplaga luili khalei nganaozao kahai khawolungli haipapamlu.” “Chi ikra̱ matak ngasaklu; ngaleiwui sāyurli ngasopamranu;

¹⁶awui ning ngacheihaida sāyurwui ning zangranu; chithāda awuitungli shini shida peingasakranu.

¹⁷Kakaso hi ra̱khayangpā chiwuina, kala kathara chiwui kakasona, kaja kharingabingna theikhuira chiya Reikhamataiya china miwui wungram munga kala awui mikhangai chili miya, kala ngazanmeikap kaje chili mungngasaka.”

¹⁸“Mang hi Nebuchadnezzar awunga ina katheina.” “Chieina O Belteshazzar, hiwui kakhalat hāngmilu; khikhalajila iwui wungramli khalei thangkhama khipānakha chiwui kakhalat mahāngmirarthura, kha kathara manglāna ngasokhamiwui vang nana hāngmishapra.”

¹⁹Belteshazzar kaho Daniel chi khananghaida kasha̱khawui vang khituikha mamatuipaithuwa. Chieina awungana hānga, “Belteshazzar, mang kala chiwui kakhalatna nali mangachee ngasakalu.” Belteshazzarna ngahānkai, “Iwui amei, mang chi nali yangkakharingbingwui vang ngasaranu kala chiwui kakhalat chi nawui yangkashebingwui vang ngasāranu!

²⁰Nana mangshong kathei thing akha phorlaga kahakva ngasāthui kahai, aton kazing kāzokta okathui katongana kathei,

²¹kala thingnah timfa eina athei kachungkha matheida saikorana kashai kala chiwui khaya̱zingli sāyurna ngasāmkakhui, vānaobingna thingphāngli athip rāsākakhui chi—

²²O awunga, chi nana. Nawui reikhamatai kazing kāzokta okathui kuimareida vāpeihaira.

²³Kala awungana yangda leilakha, ra̱khayanga, kazingram eina katā kathara china, ‘Thingrong chi ta̱tek haolu, kha angun che mariphek kala pithraiphek eina khalaplaga phorngasaksālu, luiwui timfa kahai khawoli ngasoda ikra̱ matakpi ngasaklu; kala ramsāli ngasopamranu; chithāda shini shida ali peingasakranu’;

²⁴kaji chiwui kakhalat chi hina, O Awunga: Reikhamataiya chiwui bichar iwui amei awunga nawuitungli katāna,

²⁵kaja miwui eina nali kashamhaida khararwui sāyurli ngasopamra; nali mukkā thāda khawo phāshai ngasakra, kala nali kazingramwui ikra̱na ya̱ngasakra, kala Reikhamataiya china mikumowui wungramli mungra kala ana mikhangai mi chili mira kaji nana matheikhuiranglakha eina tangda shini shida peingasakra.

²⁶Kala thingngayung chiwui angun chi haisalu da kakaso athishurda, Kazingramna munga kaji nana theikhui kahaiwui thili nawui wungram samphangnaora.

²⁷Chiwui vang eina O awunga, iwui kahāng hi khuisangmilu; morei ot horhaida kathar pongli zanglu, khalāng ot chihohaida khangazanbingli lumashanmilu, chingri eina sāngmeida okthui khavaina.”

²⁸Saikora chi awunga Nebuchadnezzarli shoksera.

²⁹Kachāng tharāda khani kākapei eina, ana Babylonwui keinung shimtungli yaothuizatta leilakha,

³⁰awungana hānga, “Iwui khangamkharei tekmatei khavai, iwui keinung hirikha kahaka Babylon hi iwui pangshap eina sākakhui maningmala?”

³¹Awungana tui chi hāngmahunglakha kazingramwui eina akhon akha shai, “O awunga Nebuchadnezzar! Hi nali kahāngna: Awunga ngalei nawui eina kānthuihaira,

³²nali mibingwui pamkhavai eina kashamhaora, kala nava khararwui ramsābingli ngasopamhaora; kala mukkā thāda kum shini khawo phāshai ngasakra; chieina mikumowui wungpam hi Reikhamataia ana mungda mikhangayili miya da matheiranglakha eina tangda shini shida vāfara.”

³³Chili ngalāngda hāngkahai tui chi Nebuchadnezzarwuitungli shokhaowa. Miwui eina kashamhaida mukkā thāda khawo phāshai, kala ahah khalāngwui thāda sānghaowa, kala awui panglingkor vānaowui angasat thāhaowa.

³⁴“Zingkum peihaida atam ungkashung tharan, Nebuchadnezzar ina kazingramli yangkai, kala ning ungrāsai, chieina ina mashimānda makashimān Reikhamataia kharinga chili khayāshida masot chigata: “Kaja awui wungram mashimānda makashimānna, kala awui awungram thot kachida leichinga;

³⁵okathuiwui mi awui mangāli khikha maningmana; kazinglila okathuilila awui kaphaning athishurda sai; khipānakha mangakaishirarmana, Khi kasākhala? da khipākha mangahānrarmana.

³⁶“Iwui ning ungluishit kaji atamli; iwui wungram, iwui khayākakā tekhamatei saikora hanmiluishita. Iwui wungva̱-wungvābing, wungphembing ili phaungluishita, iwui wungram sakāluishita, kala kharewuili lāngda mataisangmi.

³⁷“Ara, kazingramwui awunga chili Nebuchadnezzar ina khayāshida masot miya; ava khamashung otmāng sai, khangarong pongli zata, kala lāngkaso athumli maishi ngasakshapa.”