Read Tangkhul Naga DANIEL 5 Bible Online

DANIEL 5 - Tangkhul Naga bible

DANIEL 5

¹Belshazzar awungana zātkhān kahakva akha sāda wungnao thingthingli ngasoda phāshak phāzai.

²Belshazzarna drakhāra̱ mazapkhayang tharan, awui wungnaobing, apreiva̱ ngarā, angashirva ngarā, athum saikorana, avāva̱ Nebuchadnezzarna Jerusalemwui khorumshimwui eina khuikhaung sinā kala lupāsā eina kasā tengkotbing chili sangda mangkhavai khuirālu da kasoi.

³Jerusalemli khalei khorumshimwui eina khuikhaung sinā kala lupāsā eina kasā, tengkotbing chi khuirāmida awunga, awui wungnaobing, apreiva̱ ngarā kala awui angashirva ngarā saikorana chiwui eina drakhāra̱ manga.

⁴Athumna mangda sinā, lupā, pithrai, mari, thing, kala ngalungwui varebingli masot chigata.

⁵Kashuirak eina mipāng akha rāchithei kala awungawui dolan phākholi rākapi, thaomei shārkhavaili kāroda kakapi chi awungana thei.

⁶Chi theilaga awungawui maipān ngacheihaowa, kala ning chipāhaida kathirriri khuksao eina khuksao ngatākkapopa.

⁷Awungana laivā kathembing, Chaldeanaobing kala kachāng sirāli machukkatheibing thākta ahokhuilu da vaowa. Kala awungana Babylonwui thangkhamabingli, “Kapi kahai hi pākatheia kala chiwui kakhalat hāngmishapa chili hungrisi kaji khamenga kachon ngavaimira, akahungli sināchā ngachāmira, kala wungramli kakathuma khamunga akhavā sāngasakra.” da hānga.

⁸Chieina awungawui thangkhama mi saikora rai, kha khipānakha kapi kahai tui kala chiwui kakhalat matheirarthuwa.

⁹Chieina awunga Belshazzar chipālakhaowa kala maipānla ngacheihaowa; awui wungnaobingla matakhakhaowa.

¹⁰Awungawui kala wungnaobingwui tui chi shālaga awungva̱ chi morsong khavaipam chili rārāsai; kala awungva̱na hānga, “O awunga, okpeimeiranu! Nawui ning machipaaranu lah maipānla mangacheiaranu.

¹¹Nawui wungramli manglā kathara khangaso mi akha lei. Navā Nebuchadnezzarwui thotli, kathemla thangkhameila varenao thāda paisor eina katheiwui vang, navāna ali laivā kathembing, mitrang kathembing, Chaldeanaobing kala sirā machukkatheibingwui kathāna sāngasaka,

¹²khikhalajila mathameikap kaje manglā, kathem kala theithangkhamei, mang kakhalatwui theishingkakhui, chānjam hāngmikashap, kala kasak otla phāshok kashap Belteshazzar, awungana Daniel kaho chi lei. Ali ahokhui ngasaklu, ana hiwui kakhalat hāngmira.”

¹³Chieina Danielli awungawui mangāli khuirai. Kala awungana Danielli hānga, “Judahwui eina ishāvā awungana raikatha atamli Judahwui eina khuikhaung Daniel kaho chi nala?

¹⁴Kathara chiwui manglā nali ngasomi, kala theikashap, theishingkakhui, kala hakmahālak kahai awor nawuili lei da ina shāhaira.

¹⁵Yanglu, thangkhamabing, laivā kathembing iwui mangāli khuirāda kapi kahai tui chi pālaga ili chiwui kakhalat hāngmi khavai khuirai; kha chiwui kakhalat khipākha mahāngmirarthuwa.

¹⁶Kha nana kakhalat hāngmishapa kala kasak kapai chi nana phākhuimishapa da ina shai. Chieina ara nana ili kapikahai hiwui kakhalat hāngmishapakha, nali hungrisi kahai khamenga kachon ngavaimida sināchā nawui kahungli ngachāmira, kala iwui wungramli nana akhavā kakathuma sāra.”

¹⁷Chieina Danielna awungawui mangāli ngahānkai, “Nawui lemmet na khalattawui vang ngasāranu, kala nawui sāman khangateiwui sāhaoranu; chithālala rākapi kahai chi ina pāmira, kala chiwui kakhalat awungali chitheimira.

¹⁸“O awunga, Reikhamataiya Vare china navā Nebuchadnezzarli wungpam eina hakkhamahā kala tekhamatei eina khangamkharei mi;

¹⁹ali chiyākha reikhangasakwui vang mibing, yur saikora, tuiyur kachiva̱ awui mangāli kathira kala ngachee; ana shaothatkhangaili shaothata, huimikhangaili huimi, juingasakhangai chili juingasaka, kala nemngasakhangai chili nemngasaka.

²⁰Kha ana ngam-uda hiksor eina kala lāngsosor eina kasā tharan wungpamwui eina khuishokhaida awui tekhamatei shimān ngasaka;

²¹mishangwui eina kashamhailaga ningla sāyur thāda sāmihaida ramgadhāli ngasopam ngasaka, mukkā thāda ali khawo shaingasaka, kala Reikhamataiya Varena mibingwui wungramlila munga, kala awui mikhangai chili mi kaji matheikhuiranglakha eina tangda ikra̱ matakpi ngasaka.

²²“Kha awui naomayara Belshazzar, nanala hi thatheilaga naning mahamsangmana;

²³kha kazingramwui PROHOli mamayāla na khalatta langsoi, kala Khorumshimli kahai khorkhong singlaga na, wungnaobing, napreiva̱ ngarā kala angashirva ngarā drakhāra̱ mangda, sinā, lupā, pithrai, kori, mari, thing kala ngalung eina sākakhui mik makathei, khanā makashā vareli khorumlaga nali nganaokhame thangkachida thānkhame Vare chili khayā mashimana.

²⁴“Chieina awui pamkhavaiwui eina arui pāng chihorāda rākagapina.

²⁵“Kala kapi kahai tui chi hina: ‘MENE, MENE, TEKEL kala PARSIN.’

²⁶Chiwui kakhalat hithai: MENE, Varena nawui wungram atam shānhaira kala khangachang khuirāhaira;

²⁷TEKEL, nali khān tamyanglaga makāpeithuwa;

²⁸PERES, nawui wungram ngayarkhailaga Medes eina Persianaobingli mihaira.”

²⁹Chieina Belshazzarna kasoda Danielli hungrisi khamenga kachon ngavaimi, kala sināchā akha akahungli ngachāmi; kala awui pongli Babylon ngaleiwui khamunga kakathumana da chishāta.

³⁰Chithang ngayā ngalāngda Chaldeawui awunga Belshazzarli shaothathaowa.

³¹Kala zingkum hangtharukta khani sha̱kha kāshung kahaia Darius kaho Medepa china wungram chi khuihaowa.