Read Tangkhul Naga DANIEL 7 Bible Online

DANIEL 7 - Tangkhul Naga bible

DANIEL 7

¹Babylonwui awunga Belshazzarna mungkhare kum, Danielna pilakha mang akha shimana. Mang chi ana kapikhui, kala chiwui kasha̱a ara̱tui ana hāngmi.

²Ngayāshong mangshongli ina khamahā akha athei, kala yanglu, kazingram achikun matiwui masina kahaka shamadruli phankazama.

³ Kala azak ngatateida ngayiwui eina sāyur mati shokrāsai.

⁴ Khare chi kazingkha̱ thai kala khalāngwui angachāng kai. Kala ina yangda leilakha angachāng hekmihaowa kala khāngkhaninglaga mi thāda aphei khani eina ngaleili nganing ngasaka, kala miwui ningla ali sangmi.

⁵Kala yanglu, kakhane sā chiya singom thai. Sā chi khanukphei eina nganinga, kala akhamorli, ahā ngachaili arapthingra̱ kathum ngatama; kala hithāda hānga, “Ngakarthuida sā kachungkha shailu.”

⁶Chiwui thili ina yanga, kala yanglu, kuirāng thāda, vānaowui angachāng khumkhorli mati kai; kala sā chi akui mati kai; kala ali mungkhavai pangshap mi.

⁷ Chiwui thili ngayāshong iwui mangli khamate sā chi thei, kapang hāngkhavai makhalei azak yanglaga khangachee-khangachā sāna, ahāla marihā kai, chieina shailaga katatai chi naikazama. Khare sābingwui eina ngateihanghai, angaji tharā kai.

⁸ Angaji chi ina machukta leilakha, yanglu, khangatei angaji kateo akha shonshokrāsai, chi kashok eina rida kākasa angachee kathum angayung eina sutshokhaowa; kala yanglu, angaji chili miwui amik thāda kai, kala khamorla kāda tui kachungkha matui.

⁹ Ina yangda leilakha, wungpamkhongbing haikhami thei, kala ringching kaje mi akhana awui pam rākhui; awui kashankachon horam thāda chara, awui kuisam sahah tharzā kahai thai; awui wungpam khamalinga meiwonna, chiwui kāngphei kachuiya meina.

¹⁰ Awui ngalemwui eina meiwui kong akha longshoka; thing-thingna ali otram ngatha̱mi, thingtharā shidawui thingtharāna awui mangāli nganinga: chiwui thili bichar sāphoka, kala lairikla hārserhai.

¹¹Angaji china panglāk eina khamatui chi shāda ina yangvai. Ina yangkhavā eina, sā chili shaothatlaga sākazamkhuilaga mei eina riktā khavai mihaowa.

¹²Sā kateibing chi athumwui pangshap khuithuihaowa, kha atam kasha̱khawui vang mathi khavai mayāmi.

¹³ Ngayāshong mahākhami chili ina thei, kala yanglu, kazingramwui muiyāli ngasoda, miwui naomayara thāda akha kharā thei, kala ana Ringching kaje chiwuili rai, kala awui mangāli anganinga.

¹⁴ Ali pangshap kala tekhamatei kala wungram mi, kaja miyur saikora, yur saikora kala, tuiyur saikora ali otram ngatha̱ khavai; awui pangshap katang makhavai pangshapna; chi kashimān kaho maleimara; kala awui wungram chiya sākashimān maleimara.

¹⁵Daniel iwui vanga, mang chi theilaga ning chipālakhaowa, kala khi shoknikhala da ningkhariklaka.

¹⁶Ina chiwui ngalemli nganingkasā akhali, saikora hiwui kachangkhat khikhala kaji theikhui khavai ngahānyanga. Ana chiwui pongli kakhalat mathālak eina hāngmi.

¹⁷“Kahaka sāyur mati chi okathuili rāmungki kaji awunga matina.

¹⁸ Kha wungram chi mashimānda mashimānla, katang mavaila athumwui sāra.”

¹⁹Chiwui thili, khangateiwui eina ngateimeikap kaje khamate sā, khangachee hāngkhavai makhalei, marihā kakā pithraiwui pāngmareng kashoka, serkazamlaga kashaia, kala katatai chi naikakazama sā chiwui akachanga tui chi ina theingaihaowa;

²⁰ kala akuili angaji tharā kakā, naoda akha kashok eina leikasā kathum tātung kahai, kala angajili amik kala akhamor kālaga tui kachungkha matuida khangateibingli hakmeikap kaji chiwui pongli ina theingailakhaowa.

²¹ Ina yangda leilakha, angaji china katharabing chili rai ngararda

²²Ringching kajepa china rāda Chuimeikap kajewui katharabingwui vang bichar masamiranglakha kala katharabingna wungram chi masamphangranglakha eina tangda athumna yui.

²³Ana hithāda hānga: “Khamate sā chiya, okathuili khamate awunga akha rāra, ava khangatei wungram saikorawui eina ngateihangra, china okathui katonga shaihaora, aphei eina naikazamtāda akha̱-akhā sāda sakhaimihaora.

²⁴ Angaji tharā chiya, wungram hiwui eina awunga tharā shokra, athumwui thili akha shokra, ava kateibingwui eina ngateihangra, kala awunga kathum shimān ngasakra.

²⁵ Ana Chuikhamataiawuitungli makhamayā tui matuira, kala Chuikhamataiawui katharabingli chotchāng ngasakra, kala atamla, ainla ngachei khavai ngarānra; kala atam akhashi, khanishi, kala tangkhaishi, athum awui pāngli horsangmira.

²⁶Kha kārot kāda bichar sāthang awui pangshap khuithuihaora, mutchaohaora kala kakup eina tangda sāshimānhaora.

²⁷ Kala wungramla kala pangshapla kala kazingram hupvawui azingli khalei khareia wungram, Chuikhamataiawui katharabingli mihaora; athumwui wungram katang mavaimara, kala pangshap saikorana athumwui otram ngatha̱ra kala kahāng nganāra.”

²⁸Apong chiwui katanga chi hina. Daniel iwui vanga, ining chipālakhaoda maipanla ngacheihaowa; kha ina tui chi iningli phumhai.