Read Tangkhul Naga HOSEA 1 Bible Online

HOSEA 1 - Tangkhul Naga bible

HOSEA 1

¹ Judahwui awungabing Uzziah, Jotham, Ahaz kala Hezekiahwui thotli kala Israelwui awunga Joashwui naomayara Jeroboamwui thotli PROHOna Beeriwui naomayara Hoseali rākahāng tuina.

²PROHOna Hoseali rimeikapta khangazek tharan, PROHOna ali hānga, “Vālu, laga napreiva̱̱ sākhavai khayorva̱̱ sha̱nao akha akhuilu, kala khayorva̱̱wui nao pharākhuilu, khikhalajila ngalei hina PROHOli horhailaga hakmahāmeikap kaji khayorva̱̱wui ot sāhaira.”

³Chieina ana Gomer kahova̱ Diblaimwui naongalāva̱li akhui, kala ana nao vaida mayarnao akha pharai.

⁴ Kala PROHOna ali hānga, “Awui ming Jezreel holu; kaja khaleilaga awui thili Jezreelwui asheewui vang eina Jehuwui shimkhurli ina tandi mira kala Israel shimkhurwui wungram chi ina tangngasakhaora.

⁵Kala chithanghon Israelwui malā Jezreelwui tampākli ina sātekra.”

⁶ Ana nao akha vailuishitta sha̱nao akha pharai. Kala PROHOna ali hānga, “Awui ming Loruhamah holu, khikhalajila ina Israelwui shimkhurli pheomi khavai malumashanluilakmara.

⁷Kha ina Judahwui shimkhurli lumashanra kala athumwui Vare PROHOwui mangā eina ina athumli kanshokmira; ina athumli malā eina nilala, raighai eina nilala, rai kasā eina nilala, sigui eina nilala, sigui katongbing einala kanshokki kaji maningmana.”

⁸Lo-ruhamahna na̱ reikahaiwui thili nao vaida mayarnao akha pharai.

⁹Kala PROHOna hānga, “Awui ming Loammi holu, khikhalajila nathum iwui miyur maningmana kala I nathumwui Vare maningmana.”

¹⁰[1] Chithālala Israel yurwui mashing mashānkharar mangatamkapai shamadruwui situi thahaora; kala athumli kahāng, “Nathum iwui maningmana” majiluila athumli “Kharinga Varewui naongarābing” hohaora.

¹¹Kala Judahwui mibing eina Israelwui mibing kaziprumhaora kala athum khalattawui kathāna akha kapangra; kala athumna ngalei chili mungra, kaja Jezreelwui thot malinglakra.