Read Tangkhul Naga HOSEA 10 Bible Online

HOSEA 10 - Tangkhul Naga bible

HOSEA 10

¹Israel hiya hekmaheilak kahaia athei khamatheia drakhārongna. Awui athei chungmeimamān, awui hanphut chungmei sakai; awui ngalei haksangmamān awui pakra̱ chungsangmamāna.

²Athumwui wuklung chi makhamashungana; ara khayon chi athum khalatta phungphalungra. PROHOna athumwui hanphut sākhaira, kala athumwui pakra̱ sākazamhaora.

³Aruiva athumna hāngra: “Ithumwui awunga maleimana, kaja ithumna PROHOli mangacheemana, kala awunga akhana ithumwui vang khi sāmithukrakhala?”

⁴Athumna matui phaphai; khamasaili shākhi sāphaphai; chieina hu khalei khawo thāda bichar urshoka.

⁵Samariali kapama mibingna Bethavenwui seinaowui vang kathira. Chiwui mibingna chiwui vang chapra, kala meoma̱li khokharuma pāngmonbingna chapngachāra, pākthui kahai tekhamatei chiwui vang.

⁶Mha, ot chi khalattana Assyriali khuivāhaora, kahaka awunga chili shai sāda mikhavai. Ephraimli khayak ngasakra, kala Israelna awui meoma̱wui vang khayakra.

⁷Samariawui awunga shimānhaora, tara̱ khamalao thāda shimānhaora.

⁸ Israelwui morei, Avenwui kajuipapam, sākazamhaora. Ka̱shāt-ka̱reng athumwui hanphutungli phorhaora; kala athumna phungreibingli, ithumli farorlu da hāngra, kala phungrābingli, ithumli minrorlu jira.

⁹ Gibeahwui atam eina thuilaga na morei sāhaira; O Israel; athumna sāchingda lei. Gibeahli raina athumli mangaphanrarmarala?

¹⁰Yuiung-yuikhavā miyur hili rākkhavai ina rāra; kala yurbingna athumwuitungli kuinamra, athumwui khayontungli khalāngwui vang kharāk tharan.

¹¹Ephraim hi mā khanaili leikashe rākkahai muklāva̱ ngasāsai; chieina awui khamathā akahung chi mashichinla khākhaisai; Judahna lui saophalungra, Jacobna lui maomathāphalungra.

¹² Nathum khalattawui vang khamashung khangarong yaolu, makhangachei leikashi athei chi hātkhuilu; rampho kahai ngalei chi marākkhuilu, kaja hi PROHOli phākazat atamna, chieina ana rāda huikhami chi nathumwuitungli rotāmira.

¹³Nathumna morei saosanghaira, nathumna mashun-makhaning hātkhuihaira, nathumna kakapikwui athei chi phāshaihaira. Kachiwui vangkhala kaja nathumna nathumwui siguigārili chihama, kala sorkhangasai raikapingbingli chihama,

¹⁴chiwui vang nathumwui miyur ngachaili raikhon shokra, kala nawui raipan saikora sākazamhaora, Shalmanna rai sāthang, Beth-arbel sākazam kahai thāda; ava̱ngarāli nao eina ngasoda akha̱-akhā ngasāmihaowa.

¹⁵Chithāda nathumlila shokra, O Israelwui shimkhur! Nathumwui hakkhamahā makaphāwui vangna. Siphan-zingrotlungli Israelwui awungali katatchaohaora.