Read Tangkhul Naga JOEL 1 Bible Online

JOEL 1 - Tangkhul Naga bible

JOEL 1

¹Hi Pethuelwui naomayara Joelli PROHOna khami paona:

²Nganālu, O khararnaobing, shākhuilu, ngalei hiwui mibing saikora! Nathumwui atamlila, navā ngarāwui atamlila hikathā kashokhairala?

³Nanao ngarāli hi hānglu, athumna anao ngarālila hāngranu, kala anaobingna naobingli hangmaronluiranu.

⁴Khaohyurna taikahai chi, khaohsomna shaihaowa. Khaohsomna taikahai chi; khaohyurna shaihaowa; khaohyurna taikahai chi, haoriphilāva̱na shaihaowa.

⁵Khamaripbing! thuimathukta chaplu; kala zamkhor khamangbing, ringngālu; kaja mangkaphā khuithuimihaira, nathumwui khamor eina.

⁶ Khikhalajila iwui ngaleili shānla makakhui kapanga yur akhana ngasunghaira; awui hā kazingkha̱wui hā thai, kala kazingkha̱ ava̱wui sārana [1] thai

⁷China iwui drakhārong shumi, kala khaorārong sākazamihaira; china thingkor hemlaga herserhaowa, kala aphāng chithenmiserhaira.

⁸Mākham kahaiva̱ kachingva̱na mākham kahaiawui vang bora ngavailaga, chapkhangachā thāda.

⁹Tharāzat, ra̱shakchigat katathaira. PROHOwui shim eina pāngmonbing, otram khangatha̱bingna sifaya.

¹⁰Lui sākazamhaida, ngaleina sifaya; kaja athei-arai sāshimānhaoda, ra̱shakshirei kānhaowa, thao thenghaowa.

¹¹Khananglu, O luikhavānao! Ringngālu, O drakhā yāmgui khamayonnao, tharāzat, napaizatwui vang; kaja hātki kaji lui arema sāhaira.

¹²Drakhāthei thenghaira; khaorārong thenghaira. Kabothei, khaneithei, theithukthei, lui arong saikora thenghaira; kala naomayarabingli khamathān maleiluimana.

¹³O pāngmonbing! bora ngavailaga chapngachālu, O hanphutwui otram khangatha̱bing sifalu, O iwui Varewui otram khangatha̱bing ngayā bora ngavaipilu! Khikhalajila Varewui shim eina tharāzat kachigat, ra̱shakchigat khāmserhaira.

¹⁴Kathar eina khumlu, khamashung eina kaziplu, Khararnaobing kala ngalei hili khalei mi katonga hokhuilu, kala nathum Vare PROHOwui shimli PROHOli ngakaolu.

¹⁵ PROHOwui atam nganaihaira, chithang iyavo! Sashap-pangshapawui eina kashimān chi kharāna.

¹⁶Kashakazāla, ringkaphā khamathānla, Varewui shimwui eina ithum miktāli makatatmala?

¹⁷Athābing leilungli thenghaowa, zātshimla masaihaowa, heiun maungthuda, mākei arema sāhaowa.

¹⁸Sāna kathāda ringngākhala? Seishang kachiva̱ pa̱ngapāhaowa kaja seizāt maleithuwa; yaobingla khāsuthaowa.

¹⁹lamhāngwui seizāt meina chuihaoda, PROHO! nali ngakaoli; luiwui thingla meiwonna chuiserhaira.

²⁰Ramsā eina tangda nali ngakaoli, khikhalajila kongrāla thengserhaowa; kala lamhāngwui seizāt meina chuiserhaowa.