Read Tangkhul Naga JOEL 2 Bible Online

JOEL 2 - Tangkhul Naga bible

JOEL 2

¹Zionli talla̱ khonglu, ning ngashar khavai iwui kathara kaphungtungli chi khonglu! Apam kachiva̱wui mina kathirranu, kaja PROHOwui atam rārāli, nganaihaira,

²tangkhamang khangami thangkha, muiyāna tangmangting kahai thangkha, chiyākha matheilakrang kaje, naodala matheiluilaki kaje, kapanga yur akhawui mi kachungkha kaphung pemluishitra.

³Athumwui mangāli mei chuiya; khanukshong meiwonna hapa, khare atamliva ngalei chi Eden yāmgui thai; kha athumwui thili ramcho lamhāngna, kala akhanida mayāmshokmana.

⁴ Athumwui azak sigui thai, kala rai sigui thāda yonga.

⁵Siguigariwui ngarungning kahai thāda, athumna kaphungtonli ngawokkai; meiwon mermer kachui thāda, māfala chuitai; kapinga raimi thāda raiwui vang ngarān kahaina.

⁶Athumwui mangāli mibingna khananga, mai thengcheng eina.

⁷Rai kapingbing thāda athum muivai, raimi thāda phākho ngareikai. Kachichāwui apongli zatta khangatei mama̱thuimara.

⁸Athum akha eina akha mangahei ngarokmana, kha kachichāwui pongli zata; athumna zeighai tungli yongvālala khipākhana makhāmrarmana.

⁹Athumna keinungli ngawokkāna, athumna phaklāngli yongkāna, athumna shimlila yākzanga; athumna khale thāda charfa einala zangra.

¹⁰ Athumwui mangāli neina̱ khanuka, kazingna nganuka. Zimik kachāng tangmanghaira, kala sirāna mahorluimana.

¹¹ Awui raimimāngli PROHOna vaoda hānga, kaja awui ashangva̱ hakmahālaka, kahāng athishurda kasāpā chi panglaka. Kaja PROHOwui zimiksho haklaka, kala sāshilaka; khipāna khāngshaprakhala?

¹²“Kha aruila” PROHOna hānga, “ningtongda kakhum eina, sifada chapsasui,

¹³kachon maningla, kha nathumwui ning serkhākta latunglu.” Nathumwui Vare PROHOli latunglu. kaja ava lumashan, leishitheilaka, malung mavātzarmana, leikashi mangacheilakmana, makaphāwui vang ning ngatei.

¹⁴PROHO nathumwui VAREna ning ngacheihaida ana mavātlakla somilapai. Chitharan Vare PROHOwui vang muisakchigat, ra̱shakchigat nathuma chigatpai.

¹⁵Zionli talla̱ khonglu; kathar eina khumlu; khamashung eina kaziplu;

¹⁶yaruili kazipkhuilu. Yarui kakazip chi tharngasaklu, ararbingli ngahotkhuilu; naoshinaobing, angangnaola ngakuikhuiserlu. Khām kahaia china awui kā eina shokranu, kala mākhām kahaiva̱nala awui kā eina rāranu.

¹⁷Khamong eina hanphut ngachaili PROHOwui otram khangatha̱ pāngmonbing; chapngachāda “Nawui mibingli huimilu, PROHO! Nawui malungkhavāt, miyur kateina mana̱shi khavai masāmialu, ‘Athumwui Vare kali leikhala’ da athumna khi hāngkhavai lei.”

¹⁸Chieina PROHOna awui ngalei shivāmhaoda, awui mibingli lumashanmi.

¹⁹PROHOna awui mibingli ngahānkāda hānga, “Yanglu, ina nathumli, māngum, zam kala thao chihorāra; chieina nathum chirchomrihaora, kala yur khangateiwui mangāli nathumli mamana̱shi ngasakmara.

²⁰Atungshongwui mi khuithuihaora, katheng kala ramcho ngaleili kashamvāhaora, kharebingli zingsho shamadruvāk, khanaobingli zingtun shamadruvāk, chiwui eina kashui nganamshirut nganamshokra; kaja ana kahaka ot kachungkha sāmihaira.”

²¹“Mangacheelu, O ngalei! ringphāda mathānlu, khikhalajila PROHOna hakkhamahā ot kachungkha sāmihaira!

²²Mangacheelu, khararli khalei sāyur, lamhāngwui seizat timfahaira; thingrongna athei mathei, khaorārong kala drakhārong sorngasaida matheira.”

²³“Mathānlu O Zionnaobing, kala nathum Vare PROHOli ringphālu; kaja nathum ringkhavai thaklāk eina kazing romihaira, nathumwui vang makhavāta zingrot rotāmihaira; zingrot khare, zingrot khanao khangachā tākam eina.

²⁴Lanpum mātheina pemluira, ra̱shakchigat kala thaona vaichum pemluira.

²⁵Iwui raimi kachungkha chihoda, khaohyurna, khaohsomna, haori philāva̱na shaimi kahai zingkum chi ina hanmiluira.

²⁶Nathumna kapen eina tangda zāda nathum Vare PROHOli masotmira; ana nathumwui vang phaningla makakhui ot sāmihaira. Kala iwui mibingli kakhayak mamiluimara.

²⁷Israelwui alungli I lei kaji nathumna theira; kala Vare PROHO I mānga, katei maleimana kajila, kala iwui mibingli kakhayak mamiluimara.”

²⁸ “Kala naoda hithāda shokra, chiya, phasā khavai kachiva̱li iwui manglā heirormira. Nanaomayara, nanao ngalāva̱ ngarāna marānra, khararnaobingna mang machutra, kala yaronnaobingna khamahā theira.

²⁹Kala rao sha̱nao, rao mayarnaobinglila, chitharan ina iwui manglā heirormira.

³⁰“Kazinglila, okathuilila ashee, mei kala meikhut eina machut kachungkha chitheira.

³¹ Zimikna tangmangtinghaora, kachāngna ashee onhaora; khangachee PROHOwui zimiksho marāranglakha.

³² Hithāda shokra kaja PROHOwui mingli khangakaobingli huimira, kaja PROHOna hāngkahai thāda Zion kaphungli, ‘Jerusalemli yāmkashok mi leisāra, athumwui ngachaili PROHOna hokakhui zanga.’”