Read Tangkhul Naga JOEL 3 Bible Online

JOEL 3 - Tangkhul Naga bible

JOEL 3

¹“Kaja yanglu, chikachāng kala atam chili, Judah eina Jerusalemwui lan hanmiluishit kaji tharan,

²Miyur saikorali ina Jehoshaphatwui tampākli khuivāda, iwui mibing kala iwui shimluikat Israel shimkhurwui vang bichar sāra; khikhalajila athumna ngayarkhaida miyur kateiwui ngachaili chaiyāngmihaowa,

³kala Iwui miyurli kalā yanglaga khayorva̱ akhawui vang mayarnao akha ngatha̱ya, kala ngalānao akha zamwui vang yorlaga mangvaihaowa.

⁴ “O Tyre, Sidon kala Philistinewui ramrei saikorali khaleibing! Khikhakhawui vang nathumna ili athut kakhuila? Nathumna chithāra jiakha ina ngalāngda thaklāk eina athut khuida nathumwuitungli tāra.

⁵Kaja iwui lupāsā kala sinā nathumna khuihaira, kala kharei lan nathumwui varebingwui shimli khuivāhaira.

⁶Judah eina Jerusalemwui mibingli, athumwui apam eina katāva̱li khalei khuithuihaida Greeknaobingli yorsanghaira.

⁷Kha ara nathumna yorsang kahaipam chiwui eina ina athumwui ning ngatha̱ ngasakta nathum khalattawuitungli athut khuira.

⁸Nanaomayarabing kala ngalāva̱bingli Judahwui naomayarabingwui pāngli ina yorsangra, athumna katāva̱li khalei yur Sabeanbingli yorsang maronra da PROHOna hānghaira.”

⁹Miyur saikorawui alungli hi chishātlu: Rai sākhavai ngarānlu. Raili kapingabingli ning ngatha̱ ngasaklu; athum saikora rānganaiserlu.

¹⁰ Tin eina raighai sākhuilu, katatshat khavai khainao eina kazei sākhuilu; khangazana chinala I rai kapingana jiranu.

¹¹Thakta rālu, kuikhamareili khalei miyur saikora, nathum chili rāda kazipserlu. O PROHO, nawui rai kapingbing chihotāmilu.

¹²Yurbingna athum khalatta ning ngatha̱ ngasakta Jehoshaphatwui tampākli rāranu; Kaja chiwui kuikhamareili khalei miyurbingli ina bichar sākhavai pamra.

¹³ Chāngkui chi singlu, kaja hātkhavai chi minhaira. Zanglu, zangchon kachuplu, kaja vaichum chi pemhaira, kaja athumwui makhayā chi hakmahālakhaira.

¹⁴Mi kachung, mi kachung, bichar sākhavai tampākli! Kaja PROHOwui zimiksho nganaihaira, bichar sākhavai tampākli.

¹⁵Zimik kachāng tangmangtinghaira, sirābingna athumwui kahor khuithuihaowa.

¹⁶ Zionwui eina PROHOna khanganga, kala Jerusalemwui eina akhon vaorai, kala kazing eina okathui nganuka. Kha awui mibingwui vang PROHOva ngayin khavaina. Israelwui vang raipanna.

¹⁷“Chieina iwui kathara kaphung Zionli somkapama, I PROHO nathumwui VAREna da nathumna theira, Kala Jerusalem kathara ngasāda miyur khangatei chili mazatluimara.

¹⁸ “Kala chithang chi phungreibingna kashima drakhāra̱ ngayara, phungreibing china seina̱ longra; kala Judahwui kongrānao saikora tara̱ longra; PROHOwui shimwui eina ura̱ okra kala Shittimwui tampākli tara̱ chaimira.

¹⁹“Egypt lam machohaora, kala Edom ramcho lamhāng ngasāra; Judahwui mibingli sāshāt sāhaida lei,

²⁰Kha Judahli mashimānda, kala Jerusalemli thot-thot pānra.

²¹Ina ashee chiwui athut khuira, kala athumwui khayon mapheomimara, kaja PROHOna Zionli pama.”