Read Tangkhul Naga AMOS 1 Bible Online

AMOS 1 - Tangkhul Naga bible

AMOS 1

¹ Tekoa ngaleili yaokahoma akha sākasā Amosna, Israelwui pongli Judahwui awunga Uzziah kala Israelwui awunga Joashwui naomayara Jeroboamwui atamli, neina̱ makhanukranglakha zingkum khaniwui atamli Israelwui pongli katheina.

² Kala ana hānga: “PROHOna Zionwui eina khanganga, kala Jerusalemwui eina akhon vaowa; yaokahombingwui seihomphung sifaya, Carmel Kaphungton thenga.”

³ PROHOna hithāda hānga: “Damascuswui chonkhamakān kathumwui vang, kala matiwui vang, shongrān chi ina mayangmimara; khikhalajila athumna Gileadli mariwui yairong eina ngaphitkazama.

⁴Chiwui vang Hazaelwui shimkhurli ina mei chihotāra, kala china Ben-hadadwui raipan mutmira.

⁵Ina Damascuswui maripan sakhaimira kala Avenwui Tampākli mi mapān ngasakmara, kala Beth-edenli khānthing kasinga, kala Syriawui mibing Kir kaho apamli raithāhaora” da PROHOna hānga.

⁶ PROHOna hithāda hānga: “Gazawui chonkhamakān kathumwui vang, kala matiwui vang, shongrān chi ina mayangmimara; khikhalajila athumna Edomli mikhavai mi katonga raikathāli khuithuihaowa.

⁷Chiwui vang Gazawui ngavei kuimareida ina mei chihotāra, kala raipan chuitup tāmira.

⁸Ashdodwui eina chili okkathuibing ina katathaora, kala Ashkelonwui khānthing kasingalila; Ekronli mamayāmada ina pāng parra, kala Philistinewui shākkahai shimānhaora.” da PROHOna hānga.

⁹ PROHOna hithāda hānga; “Tyrewui chonkhamakān kathumwui vang, kala matiwui vang, shongrān chi ina mayangmimara; khikhalajila athumna mi katonga Edomli horsangmihaowa, kala chinaongarāwui ngashit kahai athumna maphaningungthuwa.

¹⁰Chieina Tyrewui ngavei kuimareida mei chihotāra, kala china raipan chuitup tāmihaora.”

¹¹ PROHOna hithāda hānga: “Edomwui chonkhamakān kathumwui vang, kala matiwui vang, shongrān chi ina mayangmimara. khikhalajila lukhamashan katāva̱li horhaida, raighai singda achināli kharomzata; kala awui malungkhavāt mamalailakmana, kala awui khonkashi katang mavaimana.

¹²Chiwui vang Temanli ina mei chihotāra, kala china Bozrahwui raipan chuitup tāmira.”

¹³ PROHOna hithāda hānga: “Ammonnaowui chonkhamakān kathumwui vang, kala matiwui vang, shongrān chi ina mayangmimara, khikhalajila athumwui lam haksang khavai Gileadli naokhavai sha̱naobingli wuk rāmkhaimi.

¹⁴Chiwui vang ina Rabbahwui raipanli mei thotra, rai ngararthangwui khavao eina ngasoda, sur kakhaning zimiksholi siphan zingrot eina ngasoda,

¹⁵kala athumwui awungali, awui wungnaobing eina ngasoda raikathāli khuithuihaora” da PROHOna hānga.