Read Tangkhul Naga AMOS 3 Bible Online

AMOS 3 - Tangkhul Naga bible

AMOS 3

¹Egyptwui eina ina thānkashoka O Israelwui mibing, kala shimkhur katonga, PROHOna nathumli mamayāla kahāng tui chi nganālu:

²“Okathuiwui shimkhur saikorawui eina ina nashi shimkhurmāngli thei; chieina nathumwui khayonkhamāngwui vang ina nathumli tandi mira.

³Ot sakrum khavai maleila; mi khani zatkasaila?

⁴Sāshai makhalei tharan kazingkha̱na ngahongli khangangla? Khikha mashaila kazingkha̱na akhurli nirpamla?

⁵Ngaleili khalen masangla vānaona mankasaila? Khikha mamanla khalenna kāppaila?

⁶Keinungli talla̱ khonglaga makhangachee kali lei? PROHOna kasā maningla kathāda keinungli kalākashi tāpaira?

⁷ Kachangkhat awui rao marānbingli maphongmila, Proho VAREna khikha masālakmana.

⁸Kazingkha̱na khanganghaira, khipāna mangacheera? Proho VAREna hānghaira; khipāna mamarānra?”

⁹Assyriawui [1] raipanli hānglu, kala Egyptwui raipanli ahānglu, “Samariawui phungreili nathum khalatta kaziplu, kala awui alungli hakkhamahā khonkazar, kala rekakharek chi yanglu.”

¹⁰“Raipanwui alungli sākashi kala khaleekasa̱ pemda kharui kahai athumna kathāda mashungkhuirakhala da matheimana.” da PROHOna hānga.

¹¹Chiwui vang eina Proho VAREna hithāda hānga: “Yangkashena ngalei rākuinamda, nathum mangākrarmara, kala raipan sākazamihaora.”

¹²PROHOna hithāda hānga: “Kazingkha̱ khamorwui eina yaophei khani nilala, khanākainao nilala yaokahomna ngapaikakhui thāda, Samariali khalei Israelnaobingli, petwui monpakkai kala petphei eina ngasoda kankhuira.”

¹³“Nganākhuilu, kala Jacobwui shimkhurwuitungli shākhi sāda hāngchitheilu” da saikorawui PROHOna hānga:

¹⁴ “Chithang Israelna khayonkhamāng kasāwui vang ina tandi mira, Ina Bethelwui hanphutli tandi mira; kala hanphutwui angachee sātekhaida ngaleili tātungra.

¹⁵Si-shimla kala lum-shimla ina sākazamra; kala mafahāwui shimla shimānhaora, kala shimrei sākahaibingla maleiluimara” da PROHOna hānga.