Read Tangkhul Naga AMOS 4 Bible Online

AMOS 4 - Tangkhul Naga bible

AMOS 4

¹Tui hi nganālu, Samaria kaphungli khalei Bashanwui seivā nathum, kachāmabingli rekakhareka, kala khavātabingli yomkachizaibing; gahara ngarāli, ithum mangkhavai khuiungmilu kajibing.

²Proho VAREna awui tharkhamatheng eina ngashithaira, kaja yanglu, “Nathumwuitungli zimiksho chi rārāli, nathumli athumna mari khanghui eina, kala nathumwui ngachaili naomeikap kaje mi eina tangda khaihsui eina khuithuihaora.

³Kala phākho akhur eina nathum kachiva̱ shokra, kala nathumli Harmonli ahorsanghaora,” da PROHOna hānga.

⁴“Bathelli rālu kala chonmakānlu; Gilgalli vāda morei mataisang ngasaklu, ngathor kachida nathumwui pha̱kaphayā khuirālu, kathumthathang eina tithe khuirā jilu;

⁵ningkashiwui pha̱kaphayā khawok kazang khamui chigatlu, lemmet kachigat phongmilu, chi hāngchitheilu; kaja nathumna chikathā sāngailaka, O Israelnaobing! da PROHOna hānga.

⁶“Nathumwui keinung hupvali ina nathumli ahā kathar mi, kala nathumwui apam hupvali kashakazā vātngasaka, chithālala nathumna ili malatungmana,” da PROHOna hānga.

⁷“Kala ina mā hātnanai kachāng kathum vātlakha, kazing maro ngasakmara; ina keinung akhali rongasakra, khangatei akhali marongasakmara; luipam akhali rotāmira, marokatā pam chi thenghaora;

⁸chieina keinung khani kathumna khangatei keinung akhali tara̱ phavāra, kha chirchomri kahai masamphangmara; chithālala nathum ili malatungmana,” da PROHOna hānga.

⁹“Ina theishiraili kumshāt rāngasakta aga̱-akai eina nathumli hāngmachina; ina nathumwui yāmgui kala drakhā yāmgui shimān ngasaka; nathumwui khaorāthei kala olive khaohli chishai; chithālala nathumna ili malatungmana,” da PROHOna hānga.

¹⁰“Egyptli kasā thāda kazātkashi rāngasaka; nathumwui yaronnaobing raighaili ina chithita; ina nathumwui siguila khuithuimihai, nathumwui rāmrah nganamkashina nātāng kainanai sāmi; chithālala nathumna ili malatungmana,” da PROHOna hānga.

¹¹ “Varena Sodom eina Gomorrahli shimān khangasak thāda, nathum kaikhalila ina shimān ngasaka, nathumli meira̱ sutmi kahai thādala sāyanga, chithālala nathum ili malatungmana,” da PROHOna hānga.

¹²“Chiwui vang eina, O Israel, ina nathumli hithāda sāra; ina nali sāki kaji chiwui vang, nathumwui Vareli samphang khavai khangarān sālu, O Israel!”

¹³Kaja yanglu, kaphung kasaa, masi sākashoka, kala awui kaphaning mili hāngkhame, ngathorshong tangmang khangasaka, okathuiwui atungli kazata, ashangva̱wui Vare PROHO chi awui mingna!